2.Rongorongo 17 - Kiribati New Version Bible

Uean Iuta are Ieotiab'ata

1Ao e a manga uea Ieotiab'ata are natin Ata te m'aane ao e a manga kakorakora riki m'akana ni kaitaraa Iteraera.

2E katikuia taian taanga ni buaka ni kaawan nako Iuta ake nonoaki ake a buubura, n reitaki naba ma kaawan Iuta ake tabeua ao kaawa ake i Eberaim ake a tia n reke iroun tamana are Ata.

3Ngke e moan uea taman Ieotiab'ata i aon Iuta, ao e bon kakaonimaki nakon te UEA ma n rawa n taromauria te anti are Baara n aron are a karaoia ngkoa uean Iteraera.

4E bon katotoonga naba tamana Ieotiab'ata, ao e ongotaeka man taromauriia te UEA. Ma ngaia are, e kakab'aia Ieotiab'ata te UEA

5ao e buokia ni kakorakora nakon kabutan abanueana. A uoti taian b'aintangira kaain Iuta nakon Ieotiab'ata, ma e ngae ngke e a maan i mwiin rikirakena ni kaub'ai ao karineana,

6ao e bon teimatoa naba ni kakaonimaki nakon te UEA. E kamaunai taiani baangota ake baangotan te aba i Iuta, n reitaki naba ma taabo ake e taataromauriaki iai te anti are Nei Atera.

7I nanon ana katenua n ririki n tautaeka Ieotiab'ata, ao e a rineia ana mataniwi aika niiman ao e tuangiia b'a a na reireiniia aomata ana tua te UEA ni kaawa ni kabane aika a buubura ao kaawan nako Iuta. Ana mataniwi aikanne bon Benaira, Ob'aria, Tekaria, Netanera, ao Mikaia.

8Ao aikai taani buokiia ake ruaman ake kanoan Rewi: Temaia, Netania, Tebaria, Ataera, Temiramota, Ieonatan, Atonia, Tobia, ao Toba-Atoniia. Ao uoman ibonga aika raoia naba aika Eritama ao Ioram.

9A uoti taian katoto n ana Tua te UEA n taabo nako ike a nako iai ma reireiniia aomata.

10Ao a maaka m'aakan te Atua botannaomata ake i rarikin Iuta, ma ngaia are, bon akea mairouia ae e buakana Ieotiab'ata.

11Ao kaain Biritia, a uoti taian tirewa ao b'aintangira riki tabeua i bukin karekean te raoi. Tabeman kaain Arabia, a uoti itiua te ngaa itibubua taian tiibu m'aane ao taian kooti naba aika ti te bo m'aitiia.

12Ao ngke e a rikirake ni korakora Ieotiab'ata, ao e a karaoi taian nono ma kaawa aika a buubura

13ike e kaawakin iai ana b'ai nako. E bon kaawakin naba i Ierutarem ana tautia tabeman ake a m'aatai n te buaka

14man taian baronga ake Iuta ao Beniamin. A m'akoronaki taian tautia aikai ni kaineti ma aia kaainga.

Atena bon ngaia te mataniwi n ana taanga ni buaka Iuta, ao m'aitiia ana tautia bon tenibubua te ngaa aika a mena i aan ana kairiiri.

15Te kauoman ni mataniwi n te taanga ni buaka bon Ionatan, aika uabubua wanibwi te ngaa m'aitiia tautia ake a mena i aan ana kairiiri.

16Aia kateniman, bon Amatia are natin Tikeri te m'aane, are e a tia n anga nanona b'a e na m'akuri i bukin te UEA, ao uabubua te ngaa m'aitiia tautia ake a mena i aan ana kairiiri.

17Eriata bon te tia buaka ae e ninikoria are e mataniwiina te taanga ni buaka are Beniamin. Bon uabubua te ngaa m'aitiia tautia ake a mena i aan ana kairiiri, ao a bane n toa ma aia kainikatebe ao otangaia.

18Te kauoman ni mataniwi n te taanga ni buaka bon Ieotiab'ata, ao tebubua wanibwi te ngaa tautia aika a mena i aan ana kairiiri.

19Bon aikai taian taanga ni buaka ake a kaawakina te uea i Ierutarem, ao a aki warekaki koraki ake a kam'akuraki n taian kaawa aika a buubura ake a nonoaki i aon te aba ni kabuta.