Etira 7 - Kiribati New Version Bible

Rokon Etira i Ierutarem

1I mwiin ririki aika bati, ngke e uea Atatokititi i aon Botia, ao iai te m'aane ae arana Etira. E kataia ni kakae nako rongorongon rikiia ana bakatibu ni karokoa teuare Aron, mataniwiia ibonga, n aron aio: Etira bon te m'aane ae natin Teraia, natin Ataria, natin Irekia,

2natin Tiarum, natin Tatoka, natin Aituba,

3natin Amaria, natin Ataria, natin Meraiota,

4natin Teraia, natin Uti, natin Buki,

5natin Abitua, Bineati, Ereata, natin Aaron are te ibonga ae e rietaata.

6Bon te aomata ae e rangi atatai Etira n te tua n te aro are e a tia n anga te UEA ae Atuaia aomatan Iteraera nakon Moote, ao E kabobongaa nanon te uea n te aro b'a a na bane n reke baike e buubuti iai Etira.

7Ao a raona Etira n nako Ierutarem Iutaia ake tekorakina, n ikotaki ma ibonga, kanoan Rewi, taani katangitang, taan teiakina te Tembora, ao taani m'akuri. E riki aei n ana kaitiua n ririki Atatokititi n uea.

8E buoka Etira te Atua, ao e roko i Ierutarem ni moani bongin te kanimaua n nam'akaina

9n te kaitiua n ririki anne, i mwiin kiitanakin B'aburon ni moani bongin te moan nam'akaina.

10E a tia Etira ni kabanea maiuna ni kamateb'aia, ao n ongotaeka n ana Tua te UEA ma n reireiniia tabem'aang iai.

Anganakin Etira te Reta Iroun Atatokititi

11Bon te ibonga Etira ao te aomata ae e rangi n atatai n ana Tua te UEA, n ikotaki ma ana mwioko ake e a tia n anganiia Iteraera. N te bong teuana ao e a anga te reta te uea are Atatokititi nakon Etira ae e kaangai kanoana:

12Te Kamauri mairoun te uea ae Atatokititi nakon Etira are te ibonga, ao te aomata ae e atatai n ana reirei te Atua are i karawa.

13A kona n iriko Iteraera, ke taiani ibonga, ke kanoan Rewi aika i nanon abanueau, ao ngkana a kan iriko nako Ierutarem.

14I boraoi ni iango ma au taan iango ake itiman b'a ko konaa n nako Ierutarem ao Iuta ni kakoauaa raoi b'a e iraki ana tua Atuam.

15Ngkana ko nako, ao ko na uoti tirewa ao koora ake I a tia ngai ma au taan iango n anga ma te kukurei n nano nakon Atuan Iteraera, are e mena ana Tembora i Ierutarem.

16Ko na uoti tirewa ao koora aika ko rikoi man taabo nako i aon B'aburon. Ko na uoti naba b'aintangira ake a anga am aomata ao ibonga ma te kukurei ae e bati i bukin ana Tembora Atuam i Ierutarem.

17Ko na kamanenaa raoi te m'aane ni kabooi iai kaao, tiibu m'aane, tiibu ataei, te uita, ao te wain. Ao ko na karean i aon baonikarean ana Tembora te Atua i Ierutarem.

18Ngkana iai nikiran tirewa ma koora, ao kam na kamanenaa ngkoe ma am aomata ni b'aai akana kam taku b'a e na kukureia Atuami.

19Angan Atuam b'aai ake tabeua ake a tia n anga aomata b'a a na kabonganaaki n ana Tembora.

20Ngkana iai riki te b'ai ane kam na tangiria i bukin te Tembora, ao kam konaa ni kamanenaa te m'aane are ni kaub'ain te uea.

21Etira, bon te ibonga ngkoe ao ko atatai n ana tua te Atua ni karawa, ao I a tia n tuangiia taani kaawakin taiani kaub'ai ni kabane n te m'akoro n tautaeka i Maeao aia kabanea n tamaroa ni buokiko.

22A na kariaiakaki n anga te m'aiti ae tenua tengaa abubua te kirokuraem te tirewa, tebwi ma tenua tengaa nimabubua te kirokuraem te uita, uoua tengaa te riita te wain, uoua tengaa te riita b'aan te oriwa, ma kam na aki raka i aoia. Ao taian taoro ni kabane akana ko kainanoi.

23A na riai ni katauraoi b'aai ni kabane akana e na kainanoi Atuani karawa i bukin ana Tembora, b'a e aonga n aki manga un irou ao irouia uea akana a na tautaeka imwiiu.

24I tangiria b'a kam na ataia b'a akea te ibonga, kanoan Rewi, taani katangitang ma taan anene, taan tararua, taani m'akuri n te Tembora, ao taani m'akuri n te Tembora ake tekorakina aika a na manga kab'akai aekakin taekiti nako.

25Etira, ko na kamanenaa te wanawana ane e a tia n anganiko te Atua n rineia mataniwi, ao taani kairiiri ake a na tararuaia kaain m'akoron te tautaeka are i Maeao. A na riai taani kairiiri aikai n ataa ana tua te Atua, ao a na reireiniia aomata ni kabane aika a aki ataia.

26Ni kabaneia koraki akana a aki ongotaeka nakon ana tua te Atua ke ana tua te uea, a na katuaaeaki n aki nanoangaaki. A na kamateaki, ke a na kainaki n te karabuuti, ke a na kanakoaki man te aba, ke a na bane n anaaki b'aai ni kabane akana a b'ain.

Neboan te Atua Iroun Etira

27E taku Etira i bukina ngke e rangi n ataataiaomata Atatokititi:

Neboa te UEA ae Atuaia ara bakatibu. E boni kabobonga raoi karinean ana Tembora i Ierutarem iroun te uea.

28E a tia te Atua n tuanga te uea, ma ana taan iango, ao ana mataniwi aika a m'aaka b'a a na akoai. E a tia te UEA ae te Atua ni buokai, ao I a tia ni konaa ni kairiia rikaaki taani kairiiri aika Iutaia aika a m'aiti nako Ierutarem.