1E boni kakoaua B'araam b'a E na manga bon tuangaki iroun te UEA b'a e na kakab'aiaia riki Iteraera. Ma ngaia are, e aki kamanena te tabunea i bukin kakaean nanon te UEA n te b'ai ae na karaoia n aron n ana moan ma ana kauoua n tai, ma ngaia are, e tara nanon te rereua
2ao e nooriia barongan Iteraera aika katei auti n rianna i nano. Ao e rina n niniaki iroun Tamnein te Atua
3ao e taku,
“Bon natin Beore te mm'aane ngai,
ao a boni koaua au taeka,
ma ngaia are, kam na ongora n au rongorongo!
4E roko mairoun te UEA
te Atua ae Moan te M'aaka.
I bobaraaki nako Ina,
ao I noora te kaotioti i bukiia Iteraera.
5“Iteraera,
Ai tamaroara ami maeka.
6Kaanga ai aron taian b'ariko ni baam,
ke te nne n aroka ae mena i rarikin te karaanga.
Ti te bo ngkami ma aroka ake taian aroti aika rietaata
aika E a tia n uniki te UEA,
ke ai aron taian tira
aika maiu i rarikin te ran.
7A na rikirake ni
maiu raoi kanoam
kaanga aron taiani kai n am'arake
i rarikin te karaanga n ran.
E na tautaeka am uea ma te m'aaka
ao e na riki b'a te uea ae korakora riki
nakon Akaaka are kaain Amareka.
8E kaotinakoi ngkami te Atua mai Aikubita
n te korakora ae kaanga ai aron korakoran te kao anti mm'aane.
Kam na konaiia ami kairiribai
Kam na katebeia n ami kanoa ni katebe
ma ni kamanti riia.
9Kam wene kaanga raian,
aika katoki kuaia i mwiin uniia
Iai ae kona n aki karauingkami?
A na kakab'aiaki
akana kakab'aiaingkami
A na katekebuakaaki
ane katekebuakaingkami.”
10Ao ngke ongo aei B'araka, ao e rangi n un, ao e orea baina ao e taku, “I weteiko n nako mai b'a ko na katekebuakaia au kairiribai, ma ngkoe, ko kakab'aiaia tenua te tai.
11Naako naba ngkai, okira am auti! I tuangko b'a N na kabooko raoi, ma ngkai E aki kariaia te UEA b'a ko na karaoa te b'ai ae I butiiko, ao ko na aki kabooaki.”
12Ao e kaeka B'araam ao e taku, “I bon tuanga ngkoa am tia ua rongorongo
13b'a e ngae ngkana ko b'aintangiraai n te bareti ae onrake n te koora ma te tirewa, ma N na bon teimatoa naba n ongotaeka iroun te UEA. Ao I boni katereterea naba ae n na bon ti taekin baike E tuangai te UEA.
14Ma ngaia are, N nang nako n okira au auti, ma N na katikuko ma te kauring i bukin te b'ai ae a na karaoia Iteraera nako ia am botannaomata n te bong teuana.”
Ana ka aua n rongorongo B'araam15Ao e taku B'araam:
“Bon natin Beora te mm'aane ngai,
ao a koaua au taeka aikai,
ma ngaia are, ongora raoi n au rongorongo!
16E roko rabakau
mairoun te Atua ae Moan te Rietaata,
ae Moan te M'aaka.
I bobaraaki nako Ina,
ao I noori taiani kaotioti i bukiia Iteraera.
17“A tuai koro bukin baike
I noori n te kaotioti,
Ma n te bong teuana ane e na kaoti
uean Iteraera b'a kaanga te itoi.
E na kamaunanakoi ngkami kaain Moaba
ma ni kamaunaia baronga aikai
kam maeka n te rereua.
18Ao a kataenikaia Etom Iteraera
ao a taua abaia
te botannaomata are aia kairiribai.
19Ane a na tautaekanna ma ni
kamaunaia taian nikira ni maiu
ni kaawa akekei n kabane.
20“Ao I noora te kaotioti
i bukiia kaain Amareka: E korakora aia botannaomata,
ma ane a na mauna nako
n te bong teuana,
n aki manga nooraki.”
21“Ao aio te b'ai ae I nooria
i bukiia kaain Keena:
A taku n aia iango b'a a rangi ni mano,
ngke a maeka i buakon taiani b'aa,
22ma ane a na kamateaki,
ngkana a kataenikaiaki irouia I-Aturia.
23Ma bon akea ae na kona ni maiu
ngkana e bairea ana urub'ai te Atua.
24A na roko kaibuke mai Kubero,
ni uotiia aomata ake a na buakan
aban Aturia ma Ebera.
Ma n tokina,
e na boni mauna nako Kubero.”
25Ao ngke a bane ana taeka B'araam ao e a m'ananga n okira mwengana, ao e nako naba B'araka.
Who We AreWhat We EelieveWhat We Do
2025 by iamachristian.org,Inc All rights reserved.
