1I nanon ana katenua n ririki ni uea teuare Ieoiakim i aon Iuta, ao e m'aati uean B'aburon are Nebukaneta ma ana taanga ni buaka b'a e na taua Ierutarem. Ma ngaia are, a katobibia te kaawa b'a a na taua.
2Ao te UEA e kariaia Nebukaneta b'a e na kataenikaia te uea are Ieoiakim ma n anai kaub'ain te Tembora. E uotiia rikaaki tabeman taenikai nakon temboran antina i B'aburon, ao e karin taiani kaub'ai akekei i nanon te ru ni b'ai are i nanon ana tembora antina.
3Ao te uea e tuanga Atibenati are ana mataniwi temanna b'a e na rineia rorobuaka aika a nako man utu ni uea ao utu naba aika a kakannato mai buakoia Iteraera ake taenikai.
4A na riai n rineaki rorobuaka aika a botonimm'aane, a wanawana, aika a tia n reireiaki raoi, a birim'aaka aia iango, ao a aki aorakibuaka rab'ataia, n te aro b'a a na tau n riki b'a ana taani m'akuri te uea. A na reiakinaki te wareware ma te koroboki ni B'aburon iroun Atibenati.
5E anga ana taeka te uea b'a a na kakam'arakeaki mani kakamooaki n aron kanaia ao nimaia kaain ana bareti te uea ni katoa bong. Ao ngkana a koro tenua te ririki n te aro anne, ao a na manga kaotaki i matan te uea b'a e na nooriia.
6Ao ake a rineaki mai buakoia rorobuakan Iteraera bon Taniera, Anania, Mitiaera, ao Ataria. Boni kaain te baronga are Iuta rorobuaka aikai ni kabane.
7Ao te mataniwi arei e a anganiia araia aika a boou aika Taniera b'a Beretetiata, Anania b'a Tiateraka, Mitiaera b'a Metiaka, ao Ataria b'a Abeteneko.
8Ao e reke ana iango Taniera b'a e na aki kam'araea ni kang kanaia ao nimaia kaain ana baareti te uea, ake am'arake aika a kam'araa. Ma ngaia are, e a butiia Atibenati b'a e na buokia,
9ao te Atua e karika Atibenati b'a e na tatangira Taniera.
10Ao e rangi ni maaku Atibenati, ma ngaia are e taku nakon Taniera, “E a tia te uea ni baairei kanami ma nimami, ao ngkana kam aki taraa ni marurung n ai aroia rorobuaka ake tabeman, ao ane e na tiringai.”
11Atibenati are ana aobitia te uea e karekea temanna ae e na tarataraa Taniera ma raona ake teniman. Ao e taku Taniera nakon te tia taratara,
12“Taiaoka, ko na kam'arakeira man uaan taian aroka ao kamooira n te ran, n nikiran boong aika tebwina.”
13Ao ngkanne kam a manga kabotauira ma rorobuaka ake a am'am'arake n am'araken te baareti i mwiin tebwiina te bong, ao kam na karekei ami iango n aron taraakira.”
14Ao e kariaia b'a a na kataia i nanon tebwina te bong.
15Ao ngke e a roko te bong arei, ao a taraa ni marurung riki nakoia ake a am'am'arake n am'araken te bareti.
16Ma ngaia are, man te tai anne ao te tia taratara e a kariaia b'a a na am'arake man uaan taian aroka ao tiaki man am'arake ake e kakatauraoi te uea.
17Ao te Atua E anganiia rorobuaka aika aman aikai te rabakau n atai nanon koroboki ma te wanawana. Ao n reitaki ma anne ao E angan Taniera te rabakau ni kab'ara nanon taiani kaotioti ma taiani mii.
18Ao ngke a koro tenua te ririki ake e motikia te uea, ao e a uotiia rorobuaka akekei ni kabane Atibenati nakon Nebukaneta.
19E taetae te uea nakoia ao e a anaaki riki nanon te uea irouia Taniera, Anania, Mitiaera, ao Ataria nakoia rorobuaka ake tabeman. Ma ngaia are, a riki b'a kaain ana baareti te uea.
20E ngae ngkana e titirakiniia te uea n taian titiraki aika a kangaanga ke baika a matoatoa, ao a atai booia ni kabane, tebwina te tai rakan aia ataib'ai nakoia taani mamata, ma taan tabunea tabem'aang i nanon abanueana arei ni kabutaa.
21E teimatoa n tiku i nanon te baareti Taniera ni karokoa teiraken Tairati are uean Bootia n taua B'aburon.
Who We AreWhat We EelieveWhat We Do
2025 by iamachristian.org,Inc All rights reserved.
