1Ao e tataro Iona nakon te UEA ae Atuana mai kabin biroton te ika ao e kaangai,
2“I weteiko te UEA mai buakon rawaawatau,
ao ko kaekaai.
mai kabin te aonnaba i nanon abaia maate,
I tangira buokau ao Ko ongo irou.
3Karenakoai nako nano,
nakon kabiroron marawa,
ike e a otab'aniniai iai te ran,
ao a bane am naao aika a korakora ni b'aro i aou.
4I taku b'a I oreaki mai matam,
ao I aki manga nora riki am Tembora are e tabu.
5E roko te ran i aou ao e bonota ikeu.
E otab'aniniai taari,
ao a ninira atu taian keangi ni marawa.
6I ruo nakon wakaan maunga,
nakon te aba are e kainaki mataroana n aki toki.
Ma ngkoe, te UEA ae Atuau,
Ko tabekai rake mai nano ma te maiu.
7Ngke I namakinai b'a N nangi mate,
ao te UEA, I tataro nakoim,
Ko ongo irou mai nanon am Tembora.
8Akana a taromauri bouannanti aika akea maneia,
a tia ni kitana karineam.
9Ma N na anenea kamoamoam;
N na anga karea nakoim.
N na karaoa are I a tia n taetae n tuea iai.
Bon mairoun te UEA te maiu!
10Ao te UEA, E tuanga te ika b'a e na mumutaa Iona i aon te bike, ao e karaoa tuangana te ika.
Who We AreWhat We EelieveWhat We Do
2025 by iamachristian.org,Inc All rights reserved.