1Ao e mate Tauro.
Ao i nanon taai akanne, e a tia Tawita ni kataenikaia kaain Amareka ao e okirikaaki nako Tikeraka.
2Tenua te bong i mwiina, ao e roko te tautia man ana taanga ni buaka Tauro. A mangaingai kunnikaina, ao iai taian tano i aon taubukin atuuna. E nakon Tawita ao e katorobubua i matana.
3Ao e titirakinna Tawita ni kaangai, “Ko nako mai ia?”
Ao e kaangai te m'aane arei, “I nako man ana taanga ni buaka Iteraera. I kataia ni karekea birinakou n rawea maiu.”
4Ao e titiraki Tawita ni kaangai, “Antai ae e tokanikai n te buaka?”
Ao e kaeka te m'aane arei ni kaangai, “A rairaki ara taanga ni buaka ni biri nako, ma a bon m'aiti ake a ikoaki ao a mate. Ao a bon mate naba Tauro ma natina are Ionatan.”
5Ao e titiraki Tawita ni kaangai, “Ko kangaa n ataia b'a e mate Tauro ma natina are Ionatan?”
6Ao e taku te rorobuaka arei:
I mena i aon te tabuki are Kireboa, ao I noora te uea are Tauro b'a e b'aka nako aon ana kainiwai. E kakioaki irouia ana kairiribai aika a aki rangi n raroa mai akuuna i aon aia kaanibuaka ao taan toka i aoia aoti.
7Ngke e rairaki ao e noorai, ao e weteai b'a N na kawaria. I nako ni kawaria ao I titirakinna b'a tera ae e tangiria.
8Ao e titirakinai ni kaangai, “Antai ngkoe?” Ao I kaekaa ni kaangai, “Kaain Amareka ngai.”
9Ao i mwiina, e kaangai, “Tiringai! N na boni mate, ao I rangi ni maraki.”
10Ma ngaia are, I a tiringnga. I ataia b'a e a bon rangi n ikoaki n te aro are e na bon aki reke maiuna. Ao I anaa ana baunuea ma ana burenibai, ao I a uoti nakoim, Teuae ko karineaki. Aikai baikai.
11Ao a raeuai aia kunnikai Tawita ma ana tautia i bukin rawawataia.
12Ao a tang ni kabongnga ao akea te b'ai teuana ae a kanna. Ao a bane n nanokawaki aomata i bukin natin Tauro are Ionatan, ao i bukiia naba ana aomata te UEA ake a mate n te buaka.
13Ao e titirakina te rorobuaka arei Tawita ni kaangai, “Ko maeka ia?”
Ao e kaeka te rorobuaka arei ni kaangai, “Bon kaain Amareka Tamau, ma ti maeka Iteraera.”
14Ao e taku Tawita nakoina, “Ko kangaa n aki maaku n tiringa te uea ae e rineaki iroun te UEA?
15Ao ko a manga taekina te b'ai are ko a tia ni karaoia.
16Ngkai boon am bure, b'a ko na manga tiringaki!”
Ao e taku Tawita nakon temanna ana tautia, “Nakomai tiringa te m'aane aei!”
Kunan Tawita Are Kanuringan Tauro17Ao e anenea te anene aei Tawita b'a kanuringan Tauro ao Ionatan,
18ao e tuangiia b'a e na reireiniia kain Iuta ni kabane te anene aei. E arana te kuna aei b'a, “Tangin Te Kainikatebe”, Ao aei te kuna aei:
19“N te tabuki are Iteraera, ao a wene ni mate
am taani buaka,
ao a b'aka am taani buaka
aika a korakora!
20Kam na aki taekinna i Kata
ke ni kabutanakoa rongorongona
i nanon kawain te kaawa are Atikeron.
Ane e na kukurei
antin Biritia te aine
ao e na kibakibarake ni kim'areirei.
21Ko na aki kab'aka te aoi ke te karau
i aon tabukin nako Kireboa.
Ko na aki karikirakei taian uita n te tawaana
i bukin karikirakean taian uita i bukin taian karea nakon te Atua.
A takanana aia otanga taani buaka
n taiani bokaboka,
ao e a tiku oin ana otanga Tauro
n aki karaneaneaaki.
22E teke konan ana kanoanikatebe Ionatan
ao a mate taani buaka.
E korokoro ana kabaang Tauro
ao e m'akoroua te kairiribai.
23E nang beebete karekean tangiraia Tauro
ao Ionatan.
A kaai ni maiu,
a kaai ni mate,
a biri m'aaka riki nakoia ikare
ao a korakora riki nakoia taian raian.
24Ainen Iteraera, taang i bukin Tauro.
E anganingkami te kunnikai ae e tamaroa ae e uraura
ao te b'ai ni katamaroa ae e karaoaki n te koora.
25A tia ni b'aka ara taani buaka
n te bobuaka ae e kabuebue,
ao e wene ni mate Ionatan
i aon tabukin nako Kireboa.
26Ionatan, I a aki manga nooriko!
I tangiriko
b'a kaanga tariu.
Ko kaakaraoa raoi ae e raoiroi nako iu,
ko kakaonimaki riki nakon te ainenum'a
nakon buuna te m'aane.
27“A tia ni b'aka ara taani buaka,
ao a uruaki aia b'ai ni buaka.”
Who We AreWhat We EelieveWhat We Do
2025 by iamachristian.org,Inc All rights reserved.
