1Kiti bon te aomata ae marurung ae kaain te baronga are Beniamin. Tamana bon Abiera, ao tibuna bon Abia.
2Bon iai natin Kiti te m'aane ae arana Tauro, ae tamaroa taraana, ao e ab'ab'aki riki nakoia Iteraera ni kabane.
3Bon iai tabeua ana aati, ma a tia ni birinako. Ma ngaia are, e taku nakon Tauro, “Kaira temanna te toro ao naako kakaei taian aati ake a tia ni birinako.”
4Ao e nako Tauro ma te toro nakon aaba ake a tabukibuki i Eberaim ao n abaia kaain Tiaritia, ma a bon aki roko n te reke taian aati. Ao i mwiina, a manga nakon abaia kaain Tiaarim ao Beniamin, ma bon akea naba iai aati.
5Ao n tokina a roko n te aba are a maeka iai kaain te kaainga are Tuba Ao e taku Tauro nakon ana toro, “Ti a nako n okira ara auti. Ngkana ti aki waekoa n oki, ao ane nang toki raraoman tamau n te aati, ao ane nang manga raraomaeakiniira!”
6Ao e taku te toro arei, “Taninga moa. Iai Ana aomata te Atua ae maeka n te kaawa ae kaan ma ikai. Bon te kamimii b'a a bane ni kokoro bukin baike e taekin ni kabane. Ti a nako ni maroroo ma ngaia. E na mena ngkoa ao e kona n tuangiira te tabo ae ti na kakaae iai.
7Ao e taku Tauro, “N na kanga ni kawara te burabeti ao akea uotau nako ina? Ao bon akea naba nikiran ara kariki i nanon te baeki. Tera ae ti na anganna?”
8Ao e taku te toro arei, “Bon iai au tirewa ae uarereke. Ti na anganna, ao ane na tuangiira b'a ti na kakaae ia te aati.”
9Ao e kaeka Tauro, “E nang tamaroa! Ti a nako n noora te aomata ae kakaoti nako ina te kaotioti!”
10Ao e nako Tauro ma te toro nakon te kaawa are maeka iai te burabeti.
11Ao ngke a tabe n tam'arakea te tabuki ike e mena iai te kaawa, ao a kaaitibo ma te ateiaine ae na itiran, ao a taku m'aane ake uoman akekei nako ina, “Ti kakaea te m'aane are a kakaoti taiani kaotioti nako ina, e memena n te kaawa aei ke e aki?”
12Ao e taku neierei, “Eng, e memena ikai. Bon are n te kaawa n te bong aei b'a e na karaoaki te angakarea ma te botaki n am'arake n te tabo n taromauri. Ao bon are i m'aaimi, ma kawaekoaingkami,
13ane kam na nooria ngkana kam rin ni mataroan te kaawa. B'a ane i aoni kawaina n otinako nakon te tabo n taromauri b'a e na am'arake ma iruwa ake a kaoaki. A aki kona n am'arake ni karokoa e tia ni kakab'aia te karea. Ngkana kam nako ngkai, ao ane kam na kauia.”
14Ao a nakon te kaawa, ao ngke a nang rin ni mataroan te kaawa, ao e a otinako, i aoni kawaina nakon te tabo n taromauri.
15Ao E a tia n tuanga Tamuera te UEA n te bong are i m'aain rokon Tauro ni kaangai,
16“I a tia n noora rawawataia Au aomata, ao I ongo aia wewete ni kani buokaki. Nakon te ingabong, ao N na kanakoa te m'aane man te baronga are Beniamin, ae na kamaiuia aomata mairouia kaain Biritia. I tangiriko b'a ko na kab'aroa b'aan te oriwa i aon atuuna ni kaotia b'a e na riki b'a aia tia kairiiri.”
17Ao e taratara Tauro Tamuera, ao E taku te UEA nako ina, “Bon anne te m'aane are I tuangko taekana. Boni ngaia are na tautaekana Iteraera.”
18Ao Tauro e nako ni kawara Tamuera i mataroan te kaawa ao e taku nako ina, “E maeka n te kaawa aei te m'aane are e nonori taian kaotioti. Kam kona n tuangai te kawai nakon ana auti?
19Ao e taku Tamuera, “Boni ngai te aomata ae I nonori taiani kaotioti! Naako ngkai tam'arakea te tabo n taromauri. Ko na am'arake ma ngai n te bong aei, ao nakon te moaningabong, I a kaeka am titiraki.
20Ko na aki raraoma n am aati ake a birinako tenibong te bong n nako. A tia n reke. Am b'ai ma am utu b'aai ni kabane aika rangi ni kakaawaki i aon Iteraera.”
21Ao e taku Tauro, “E aera ngkai ko tuangai te b'ai aei? Bon kaain te baronga ngai ae Beniamin, ae te kabanea ni uarereke ni baronga mai Iteraera, ao bon te kabanea ni mangori au kaainga mai buakon kaaingan te baronga.”
Am'araken Tauro ma Tamuera Ao Tikuna N Ana Auti Tamuera22Ao Tamuera e kaira Tauro ma ana toro nakon te ru ni katangaina n te tabo n taromauri. Ao e kaaniia teningaun aomata ikekei ake a roko b'a a na ira te botaki n am'arake, ao Tamuera, e angan Tauro ma ana toro nneia aika kakannato b'a a na tekateka iai.
23Ao e taku Tamuera nakon te kuuka, “I anganiko ngkoa m'akoron te iriko
24ae rangi n tamaroa ao I tuangko b'a ko na kaokoroa. Uotiamai ngkai.”
Ao e uota te iriko arei te kuuka ao e katikua i matan Tauro. Ao e taku Tamuera nako ina, “Aio kanam. Am'arake b'a I a tia ni katauraoia i bukim, ao I kaoiia aomata aikai b'a a na kamarorooko n am'arake.
Ao ngke a tia n am'arake Tauro ma Tamuera
25ao a kiitana te tabo n taromauri nakon te kaawa. Ao e a tia ni katauraoaki te kainiwene i bukin Tauro i aon taubukin te auti ae boraoi are ana auti Tamuera,
26ao e matu Tamuera ikekei.
Ao n otin taai n te ingabong are i mwiina, ao e wetea Tauro Tamuera nako taubukin te auti, ao e taku, “E a bo tain te uti! N na iriko ni kab'akako i mataroan te kaawa.”
Ao e teirake Tauro, ao a kaai n airi nako
27ao ngke a kaaniia tabon te kaawa, ao e tei Tamuera ao e taku, “Karimoa teutana am toro b'a n na tuangko te b'ai are tuangai te Atua.”
Tuangakin Tauro B'a E Nang Riki B'a Te UeaAo ngke a tia n rimoa teutana te toro arei,
Who We AreWhat We EelieveWhat We Do
2025 by iamachristian.org,Inc All rights reserved.
