1Te UEA, I nakoim b'a N na kamanoai iroum;
Tai kariaia b'a N na reke irouia taan ribaai!
2Ko na buokai ni kamaiuai i bukina ngkai Ko raoiroi.
Ongo irou ao kamaiuai!
3Ko na riki b'a nneu ni katantan ae
mano raoi ae N na kakawaria, ao au nono ae matoatoa b'a nneu ni kamanoai;
Boni katanau ao otangau Ngkoe.
4Atuau, kamaiuai mairouia aomata aika buakaka;
Kamaiuai b'a N na aki reke i aani m'akaia aomata aika iowawa ma n aki ako.
5Te UEA ae ko tautaeka, e tiku au kaantaninga iroum;
I mwioko iroum ma ngke te kairake ngai.
6E mena mwiokoni maiu iroum mai moana ni karokoa tokina;
Ko a tia ni kakaawakinai man te tai are bungiaki iai.
N na neboiko n taai nako.
7E a riki maiu b'a te banna ni katoto nakoia aomata aika bati,
i bukina b'a Ko a tia n riki b'a te tia kamanoai Ngkoe ae matoatoa.
8I kakamoamoako n tataekina
mimitongim ni kabongnga.
9Ko na tai ribaai ngkai I a kara;
Ko na tai kitanai ngkae e a kab'ara rikaaki rab'atau.
10A taekinai au kairiribai;
A ikotaki ni maroroakina aroni kam'aneau b'a a na kamateai.
11A taku, “E a tia te Atua ni kitanna;
ti na ri mwina n taua;
akea ae na kamaiua.”
12Te Atua, tai kararoako mairou;
Atuau, tai tab'ara ma nako mai buokai!
13A bia konaaki ma ni kamaunaaki
aomata akana ekai nako.
A bia kamaamaaeaki ma ni kab'ainrangaki
aomata akana kani kaikoakai.
14N na kakantaningaiko n taai nako;
N na kakabatiaa m'aitin neboam.
15N na aki toki n tataekin taekani baika raraoi ake Ko a tia ni karaoi,
ma taekani kamaiuaia am Aomata iroum,
e ngae ngke e ri aon au atatai.
16N na nako ni korakoran te Atua ae te UEA;
N na tataekina taekan am M'akuri aika raraoi, aika ti am M'akuri.
17Te Atua, Ko reireiai ma ngke te teei ngai;
Ao I teimatoa ni kakarakin taekan am M'akuri aika Kamimii ni karokoa ngkai.
18Te Atua, tai kaaki taekau ngkai I a kara ao e a iaia iran atuu!
Ko na raonai n au tai n tataekin am
M'akuri ake ab'ab'aki ma ni kamimii
nakoia roroo nako aika na roko.
19Te Atua, e roota karawa am Raoiroi.
Ko a tia ni karaoi m'akuri aika ab'ab'aki;
Akea temanna ae ai arom.
20Ko a tia ni karoko kaangaanga i aou ma baika I a tia ni karawaawataaki iai,
Ma Ko na manga kaoka nako iu marurungiu;
Ko na kawakinai man te ruanimate.
21Ko na karakaa karineau;
Ko na manga kakukureiai riki.
22Atuau, Ko kakaonimaki nakoia am Aomata;
Ma ngaia ae N na anene ma te b'ai ni katangitang n neboiko.
N na katang anene n au b'ai ni katangitang nakoim,
Ngkoe ae Atuaia Iteraera ae Tabu.
23N na kanenea b'anaau n anene ni kakatonga n au tai ni katangitang i bukim;
N na anene ma nanou ni koaua
i bukina b'a Ko a tia ni kamaiuai.
24N na tataekin n taai nako taekani baika raraoi ake Ko a tia ni karaoi,
i bukina b'a a tia ni konaaki ma ni kab'ainrangaki
aomata ake a kataia ni kani kam'aruaai.
Who We AreWhat We EelieveWhat We Do
2025 by iamachristian.org,Inc All rights reserved.
