1E a bua raneanean ara koora ao e a mangaingai;
A wene n raea atiibun te Tembora i nanon te kaawa.
2A riki b'a kaanga boora aika atiibu, m'anen Tion aika rorobuaka n ataei,
ake kaanga aron tamaroan koora ngkoa nakoira.
3E natinati te kameaanti aine,
ma titebo au aomata ma taian tiakaore ake a kikitaniia buniia.
4A mate ni baki ao n taka natiia b'a aki tabeakiniia;
a bubuti natiia kanaia nakoia aomata ma akea temanna ae e anganiia kanaia.
5A mate i nuukan te kaawa aomata ngkoa ake a am'am'arake raraoi.
A kakae kanaia i nanon turam aomata ngkoa ake a maiu ni kaub'ai.
6E rawaawata riki oreaia au aomata nakoia aomatan Etom,
ake a oreaki iroun te Atua n te aro a e karina.
7A itiaki riki ara uea n aine nakon te tinoo.
A ura ribaia n ai aron te ane, ao a takiakia ni maiureirei n ai aron te tabeiro.
8Ma ngkai a wene n aki kinaaki i nukan te kaawa, b'a a b'ata moaia b'a a mate;
ai ti te kun i aon te rii, n ai aron te kai ae m'auteretere.
9E raoiroi riki mateia ake a mate n te buaka nakon mateia
ake a mate n te baki, b'a akea kanaia are a na maiu iai.
10E uota te b'ai ae moan te kakamaaku te kaangaanga are e riki;
b'a a kaburoi oin natiia tiina b'a kanaia.
11E a bon koro unin te UEA;
n te aro are E a bon kabueka Tion n akea nikirana.
12Bon akea temanna ae kakoaua b'a e kona n niniaki Ierutarem,
ni moa mai roun te aomata n aki akaaka ni karokoa te uea.
13Ma e bon riki anne i bukina ngkai a bure burabeti ma ibonga,
a tiringiia aomata aika a raoiroi.
14A titibaua aia taan kairiiri i nukan te kaawa n ai aroia matakii,
ao a makunakuna n te raraa n te aro are bon akea ae kan tangiriia.
15A takaarua aomata ni kaangai, “Baane naako, b'a kam kam'araa, tai riingiira!”
ma ngaia are a rere man te botannaomata teuana nakon teuana ma akea ae butim'aia.
16Akea riki manga taben nanon te UEA irouia; E a bon kamaenakoia.
E a aki kubariia ara ibonga ma ara taan kairiiri.
17Bon akea te buoka ae roko, ti taratara ni karokoa bon akea ae ti a manga noria.
Ti tataninga i bukin te i buobuoki man te botannaomata ma bon akea ae i buobuoki.
18A toro karaniira ara kairiribai; e aki kona n reke naba nakonakora i nukan te kaawa.
E a bon roko ara bong; e a roko te toki.
19A birim'aaka riki ngkana a raweira nakon te ikare ngkana e b'akara kanana mai karawa n raweia.
A kakioira rikaaki i aon tabuki; a raweira i nanon te rereua.
20A uotaanako buroora are mwiokon maiura, are E a tia n rineia te UEA,
are teuare ti onimakinna b'a te tia kawakiniira mai irouia ara kairiribai.
21Kam na ngarengare aika aomatan Etom ma Uti; Kakatonga n aron ae kam kona.
B'a ae nang roko naba te kangaanga i aom; ko na kanakonakoaki naba ni bebeekan.
22E a tia ni b'ara ana bure Tion; E nang kab'araira te UEA man te kataenikaiaki.
Ma e na bon katuaeko te UEA ngkoe ae Etom, E na katereterei am m'akuri aika a kaairua.
Who We AreWhat We EelieveWhat We Do
2025 by iamachristian.org,Inc All rights reserved.
