Etekiera 6 - Kiribati New Version Bible

B'akan Iteraera

1E taku te UEA ae te Atua:

2Etekiera ae natin te aomata, ko na kaaitaraa tabukin Iteraera ao tuangiia ni kaangai:

3Kam na ongora, ngkami aika maunga ma tabuki ao taiani m'arua nako ma karaanga aika a uarereke! N nang kaitaraingkami Ngai ae te UEA ma ni kamanatuaingkami taabo ni bane ike a taromauriaki iai antiia ianena.

4A na riai ni kamaaenikunaki taian baonikarea ni kabane, ao i matan taian bouannanti N na tiringiia aomata ake a taromauriia.

5A na wenerua taiani mate ao taian rii i rarikin taian bouannanti ao taian baonikarea.

6A na bane n uruakaki kaawa nako i aon Iteraera b'a e aonga ni kakoauaki b'a a bon bane n uruaki taian baangota, bouannanti, ao taian baonikarea, a na bane b'aai aika a tia ni karaoi Iteraera n riki b'a b'ariko ni b'ai aika a uruaki.

7A na bane ni mate aomata ni kabuta te aba. Ao aika a reke maiuia a na ataia b'a boni Ngai ae te UEA ae I karaoi b'aai aikai.

8N na karaoia tabeman aomata b'a a na ri nanon te katuaaeaki aei, ma N na kamaaenikuniia nako buakoia botannaomata nako,

9Ike a na tauaki b'a buure. Ane a na uringai, ao a na ataia ae a tia ni kab'ainrangai ngke a kakaitaraai ao ngke a taromauriia taian bouannanti. Ane a na ribaia i bon irouia i bukin m'akuri aika a buakaka aika a tia ni karaoi,

10ao ane a na ataai b'a bon te UEA, ao a na riai n aki kakeaa manenan Au kakauring nakoia.

11Ao E a manga taku te UEA:

Etekiera, kaaioroi am timoi ao kabukibuki waem i bukin korakain nanom! Ko na tang n nanokawaki, i bukina ngkai a tia Iteraera ni karaoi m'akuri aika a rangi n ribaaki ao ngkai a nang tiringaki irouia te taanga ni buaka, ke ni mate man te baki ao te aoraki.

12Akana a maeka n taabo aika a raroa nako a na oreaki n te aoraki ae e kamaamate. Akana a maeka n taabo aika a kaan a na tiringaki n te buaka. Ao akana a tiku a na mate n te baki. N na aki taotaona nanou irouia!

13Aikai aomata ake a aki toki n angaanga te b'ai ni kaboiarara nakoia taian bouannanti n taian baonikarea ake a karaoaki i aon taian tabuki ke taberan maunga ao i aan nuun kaai aika taian oke. Ma ngkana a nooria aomata aika a mate i rarikin taian baonikarea, ao ane a na ataai iai b'a bon te UEA Ngai.

14N na karika abaia b'a te aba ae akea manenan kain aona, ni moa man Rereuan Maiaki nakon te kaawa are Ribera i meaang. Ao ane a na ataai bon Ngai ae te UEA ae I karaoi b'aai aikai.