Taian Areru 18 - Kiribati New Version Bible

(Ana Areru Tawita; ana b'ai Mataniwiia taan anene. E aneneia Tawita nakon te UEA i mwini kamaiuana i rouna mairouia aiana, ao ai moa ra riki mairoun Tauro)Ana Anene n Nebo te Tia Tokanikai

1I tangiriko, te UEA, ae korakorau.

2Bon au b'a ni katantan ae rietaata ngkoe te UEA;

Bon au nono ae matoatoa,

ao te tia kamaiuai ngkoe;

Bon Atuau ae nneu ni katanai

ae I raba raoi i rouna;

mairouia taan ribaai;

3I wetea te UEA, ae ana b'ai te neboaki,

b'a E kamaiuai

mairouia taan ribaai.

4A otab'aniniai kakamakun te mate,

ao a taonai nako naona.

5A otab'aniniai kakamakun te mate,

ao e katauraoa ana b'ai ni kam'am'ane te mate i m'aiu.

6Ngke e kai nanou, ao I wetea te UEA,

ae Atuau b'a E na buokai.

E ongo b'anaau man ana tembora,

ao E ongora n tangu.

7Ao e m'aeiei ma n ruru aonnaba;

Ao a ingiing ni m'aeiei naba aani maunga,

i bukin unin te Atua.

8E ti nako bubun te ai mai b'airina,

Ao te ai ae ura ma te m'akaro n ai

mai wina.

9Ko kauka karawa

kanga ai aron te roki,

Ao E ruo rikaaki;

Ao te nang ae roro i aani waena.

10E toka i aoia kerubim

ao E kiba;

Ao E ukia te ang

ni kakibam'akaa.

11E rabunna n te roo;

E otab'aniniaki n nangi ni karau

aika matenten.

12A nako man te raneanea are i m'aina

taian aiti-buraoki aika b'aka ni karau,

ma kiakian ootan uran te ai.

13Ngke E taetae te UEA, ao ai aron

rebwen te baa b'anaana;

E ongo te aba b'anaan te Atua

are Moan te M'aaka.

14Ao E katebe kanoan ana kainikatebe

aika itiitini karawa,

Ao E kauamaaeia ni

kabirinakoia aiana.

15Te UEA, ngke Ko boaiia aiam, ngke e

korakora angini b'airim

n unim i rouia,

Ao e oti aontanon nanoni marawa,

Ao a oti naba aan aonnaba.

16E kanakoa baina te UEA mai karawa n tauai;

E katikai rake man raan.

17E kamaiuai mairouia aiau aika korakora,

Ao mairouia akana riribaai

b'a a rangi ni korakora riki nako iu.

18Ngke I reke n te kaangaanga,

ao a buakanai;

ma E kamaiuai te UEA.

19E kainaomataai man te kaangaanga;

E kamaiuai b'a kioina ngkae E kukurei irou.

20E anganai kaniwangau te UEA i bukin ae I karaoa ae e raoiroi.

E kakab'aiaai ngkai akea au bure.

21I a tia n ongeaba nakon ana tua te UEA;

Ao I tuai ni bure, n tan nako mairoun Atuau.

22I taratarai ana tua ni kabane n iri nanoia;

I tuai aki ongeaba nakon ana taeka.

23E ataia b'a akea au kairua,

Ao I a tia ni kawakinai mani karaoan te bure.

24Ma ngaia ae E anganai kaniwangau b'a

kioina ngkai I karaoa ae e raoiroi,

ao i bukina b'a akea au bure.

25Ko kakoroi bukin am Taeka nakoia

akana kakaonimaki nakoim;

ao nakoia akana moan te raoiroi

b'a moan te raoiroi naba Ngkoe.

26Ko kaotiko nakoia akana itiaki b'a

Ko itiaki;

Ao nakoia taan tiakana te aba, b'a

te tia tiakana naba te aba Ngkoe.

27Ko kamaiuia akana mangori,

ao Ko kamangoria akana kainikatonga.

28Te UEA ae Atuau, anganai te oota;

Kaota te roo ae I mena iai.

29Ko anganai te korakora ni buakaniia aiau,

ao te kona n tam'arakea nonon aia kaawa.

30Te Atua aio, moan te raoiroi arona;

A onimakinaki ana taeka!

Ai aron te otanga

nakoia ake a kataniia i rouna.

31Bon ti te UEA Atuara, ao akea riki;

Ao ti Ngaia kamanoara.

32Ngaia te Atua ae kakorakoraai,

Ao E kaeta kawaiu.

33E kabirim'akai waeu;

n ai aron te ria

E buokai b'a N na aki kabuanib'ai

i aoni maunga.

34E reireiai te aro ni buaka,

B'a I aonga ni kabongana

te kaini-katebe ae matoatoa.

35Boni Ngkoe otangau ao au Tia kamaiu;

I a riki ni kakannato i bukin am Buobuoki nako iu;

Ao I kawakinaki man

te kabuanib'ai ni m'aakam.

36Ko kawakinai b'a N na aki reke irouia aiau;

Ao I tuai n taenikai.

37I kaeia taan ribaai ni karokoa ae a reke irou,

Ao I kamateia.

38I tiriboia, ao a aki kona n teirake;

A konaaki b'a a mate.

39Ko anganai korakorau ni buaka,

ma au tokanikai i aoia aiau.

40Ko kabirinakoia aiau mairou;

I kamateia taan ribaai.

41A tangira buokaia, ma akea ae buokiia;

A wetea te UEA, ma E aki ongo irouia.

42I kamanatuaia ni karikiia

n aroni bubun te tano

are e na ukia

nako te ang;

43Ko kamaiuai mairouia aomata

akana rawa n ongeaba

nakoia taan tautaeka,

Ao Ko katautaekaai i aoia botannaomata;

ao a riki b'a au toro

44A baraaki ni karineai aomata aika ianena;

ngkana a ongo taekau, ao a ongeaba.

45A kerikaaki korakoraia,

ao a roko man ruru man aia nono.

46E maiu te UEA; E na kamoamoaki te tia kamanoai!

E na neboaki te Atua ae au tia kamaiu.

47E katokanikaiai i aoia aiau;

E kakiia botannaomata i aani m'akau,

48Ao E kamaiuai mairouia taan ribaai.

Eng, Ko katokanikaiai i aoia aiau,

Ao Ko kawakinai mairouia taan tiritiri.

49Ma ngaia ae N na karaoiroiko, te UEA

i buakoia botannaomata,

Ao N na anene ni kamoamoako.

50E angan ana king taian tokanikai;

E teimatoa n aki toki ana tangira

nakon are E a tia n rineia,

Are Tawita, ma ana kariki.