1N na neboiko, Atuau, ae te Uea;
N na kamoamoako n aki tootoki.
2N na kamoamoako n te bong ae koraki
ma n neboiko n aki tootoki.
3E kakannato te UEA, ao E riai ni kabatiaki kamoamoana;
Akea temanna ae ataa aroni kakannatona ni kabane.
4A na kamoamoa am m'akuri rooro nako;
a na tataekin am m'akuri aika korakora.
5A na taekina mimitongim ma karineam
ao N na iangoi am m'akuri aika kamimii.
6A na taekin taekan am m'akuri aika korakora,
ao ngai N na kaota kakannatom.
7A na taekin arom aika raoiroi ni kabane,
ao a na anene ni kim'areirei, n anenea taekan am akoi.
8E akoi te UEA ao E nanoanga,
E aki kakai un ao E bati ana tangira.
9E raoiroi te UEA ao E nanoanga nakoia aomata
ma b'aai ni kabane aika E kariki.
10Te UEA, a na bane n neboiko am kariki-b'ai,
ao a na bane am aomata ni katituaraoiko.
11A na tataekina tamaroani m'aakam
n tautaeka ma korakoram,
12B'a a aonga ni bane aomata n atai am m'akuri
aika korakora ma ueam ae mimitong.
13Akea tokin ueam,
ao Ko na tautaeka n aki toki.
E kakaonimaki te UEA ni kakoro bukin ana taeka;
Ao E nanoanga n ana arona ni kabane.
14E buokiia akana reke n te kaangaanga;
E kakorakoraia akana mamaara nanoia.
15A bane baika maiu n taraiko ma te mata ni kakantaninga,
Ao Ko anganiia kanaia n te tai ae riai.
16Ko anganiia ma nanom n akoi,
ao a bane n rauaki iroum.
17E raoiroi te UEA ni baika E karaoi,
ao E nanoanga n arona ni kabane.
18E tauraoi ni buokiia akana butiia
ma nanoia ni koaua.
19E kareke baika a kai nanoia iai akana a karinea;
E ongo tangiia ao E kamaiuia.
20E kawakinia te UEA akana tangiria ni kabane,
ma E na kamaunaia ni kabane akana buakaka.
21N na kamoamoa te UEA;
a na bane ni kamoamoa arana ae tabu ana kariki-b'ai ni kabane n aki toki.
Who We AreWhat We EelieveWhat We Do
2025 by iamachristian.org,Inc All rights reserved.
