Itaia 17 - Kiribati New Version Bible

Kamaunaakin Tamateko

1Aio te rongorongo ae taekan Tamateko:

Ko a reke n te kabuanib'ai Tamateko!

E na roko n tokina are te uruaki.

2E na tiku n rereua

kaawa aika a uarereke ake i rarikin Aroera,

ma ti temanna te tiibu n tiku ikekei

ao akea ae e tabeakinna.

3A na mauna ana nono nako Iteraera

E na mauna nako

abanuean Tamateko;

a na rangi ni kainano taiani nikira ni maiu iai

kaanga aron are e riki nakon Iteraera.

E a tia ni berita i bukin aei

te UEA ae Moan te M'aaka.

Te Bure Ao Te Karawaawataaki

4Ngkana e roko te tai arei,

e na karuoaki rikaaki

te botannaomata ae e mimitong ae Iteraera mai eta;

ao a na rinikangenge kaaina

ake a mari ngkoa.

5E na riki Iteraera kaanga uitan taian tawaana

n te M'arua are Rebaim

aika a taiaki aika uita aika a itiaki.

6Iteraera kaanga te kai ae te oriwa

ae e oreaki n te kai,

ae e nikirana ti uoua ke tenua nikiran uaana

ke tao ti aua ke nimaua

aika a rangi ni rietaata

ke ni m'aangana ake a rangi ni uaa.

E a tia ni berita b'a e na bon koro bukin aei

te UEA ae Atuan Iteraera.

7Ane a na tanrikaaki aomata n te tai anne n onimakina te Tia Karikib'ai, Atuan Iteraera ae e tabu.

8A tia ni karaoi taiani baonikarea i bukin kabuokan taiani b'ai ni kaboiarara i bukin antiia are Nei Aatera, ao a tia naba ni katei taiani boua aika a tabu i bukina. Ma ane a toki aia taromauri n taabo aikai.

9E taui kaawa aika a korakora Iteraera ao e kakionakoia kaaina ake a maeka ikekei. Ma ane a na wene n uruaki taiani kaawa aikai, ma n onrake n taian uteute ao taiani buakoako ni kai.

10Iteraera, ko a tia ni m'aninga taekan

te Atua are e kamaiungkami,

teuare bon te b'a ae e korakora

ike e na konaa n reke iai maium.

Kam unika taiani kabanea n tamaroa ni uee

i bukin karinean antiia ianena.

11Ane e na butinako m'aangana

ao e na uee

ni bon te moaningabong naba anne,

ma ane e na bon akea uaana nakoimi,

i bukina b'a ane kam na karawaawataaki

n te maraki ae akea tokina.

Kamanoakiia Ana Aomata Te Atua

12Bon naoni marawa

aika a karongoaa taiani botannaomata.

13Ma e ngae ngkana a rurunga

kaanga te ieka ae e kakamaaku,

E na tuangiia te Atua

b'a a na oki rikaaki.

A na riki b'a kaanga te bubu,

ke kaanga te uteute ae e ukaki nako n te ang

are e karabinobinoaki ri aon taian tabuki

n te angibuaka.

14E na rangi ni korakora

aia buaka n te bong,

ma ngke e a ingabong

ao a mate.

bon anne te b'ai ae e na riki

nakoia akana a ewekiira ma ni kurib'aia abara.