Etekiera 38 - Kiribati New Version Bible

Buakanakin Iteraera Iroun Koka

1E taku te UEA:

2Etekiera ae natin te aomata, ko na kabuakakaa Koka, are te tia tautaeka ae e buakaka n te abanuea are Meteka ao Tubara n te aba are Makoka. Tuangnga ni kaangai:

3Bon te UEA Ngai ae te Atua ae am kairiribai,

4ao N na kamamaarako! N na kaaki i wiim te matau ao N na uaakiniko ngkoe ma am taanga ni buaka are e korakora. Ko kaira te taanga ni buaka are a toka i aoia aoti aika a b'ain kunnikai ni buaka aika a rawawata ao a uoti taian otanga ao taiani kabaang.

5A raonaki am taanga ni buaka irouia tautian Botia, Itiobia, ao Ribia,

6ao ai uana naba mai Komera ao Beta Tokarema i meaang. Tetoakaei am taanga ni buaka!

7Ma ngaia ae ko na kakatauraoa am taanga ni buaka nakon te buaka,

8b'a tabeua riki te ririki, ao N na tuangko b'a ko na kataenikaia Iteraera, te kaawa are e uruakaki n te buaka. E a tia ni kiitanaki n te tai ae e maan, ma a tia n oki kaaina mairouia botannaomata aika ianena ake a maeka iai ngkoa. A maeka ngkai Iteraera ma te rau ni maungan oin abaia.

9Ma ko na buakaniia ma am taanga ni buaka kaanga buakanikarawa ma ni katobibia kaanga te nang.

10I ataia b'a ko na karaoa te iango ae e buakaka ngkana e roko te tai arei

11b'a ane ko na aonikaia Iteraera, te kaawa ae e mamaara ae e rau ike a maeka iai aomata ma te kaawakinaki raoi i nanon taian kaawa aika akea ooia ke mataroaia ke rokaia.

12Ane ko na kimoai aia b'ai aomata akana maeka n taiani kaawa ake bon taian b'ariko n atiibu ngkoa aika a uruaki. A maeka aomata aika kaanga taian taenikai i abaia ianena, ma a tia n okira Iteraera, te tabo ae te kabanea ni boongana n te aonnaba, ao a manin taiani kao ao a b'ain b'a aia b'ai.

13A na riki kaain Tieba ao kaain Tetan, n reitaki ma taani kabob'ai man taiani kaawa ake a uarereke i Tibein meaang b'a taan raoniko. A na tangiri taian tirewa ma taiani koora, ao ai uana naba ma taian nanai ni man ao b'aai ake a anai ami taanga ni buaka mai Iteraera.

14I ataia Ngai ae te UEA ae te Atua b'a ngkana ko noora Au aomata ae Iteraera b'a e maeka ma te rau,

15ao ane ko na kaira am taanga ni buaka ae e korakora ake taan toka i aoia aoti mai meaang.

16Ko na buakana Au aomata kaanga nangin te buaka ae rabuna aon te aba. N na kariaia b'a ko na taua abau are Iteraera, b'a a aonga botannaomata nako n te aonnaba n ataia b'a bon te UEA Ngai ae I tabu.

Motikan taekan Koka

17Ao e taku te UEA nakon Koka:

N taai ake ngkoa I tuangiia Au burabeti b'a a na kauringiia Iteraera b'a n te bong teuana N na kanakoa te kairiribai b'a e na buakaniia. Boni ngkoe Koka te kairiribai, ao e a roko te bong anne.

18Ngkana ko buakana Iteraera, N na bon rangi ni un,

19ao N na kanakoa te m'aiei ae e kakamaaku b'a e na ioioa Iteraera.

20A na bane b'aai aika a maiu i aon te aonnaba ni maakai; ika ma maanikiba ni kabane, maan aika a aki manana ao taiani man aika a kawakawa ni kabane, ao aomata ni kabane. A na ingunako maunga, a na b'aka taian katati, ao a na urubekebeke kaawa aika a buubura.

21N na kariaia maungan Iteraera b'a a na kaaitarako. A na rangi ni maaku am taanga ni buaka n te aro ae a na manga bon buaka i bon irouia.

22N na oroiko n te aoraki ao N na katuaaeko n te mate. Ko na katobibiaki ma am taanga ni buaka ni buakan karawa ma te karau, te karau te aiti, ao te burimton ae e ura.

23N na karaoi baikai ni kaotia nakon te aonnaba b'a bon te UEA Ngai ae I tabu.