Ana Anene Toromon 8 - Kiribati New Version Bible

Ngkana Ti Ngai Ma Ngkoe...E Taku Neierei:

1Ngke tao arona b'a m'aneu ngkoe,

ao I konaa ni kiiti ma ngkoe

n taabo nako ike ti kuba ni kaaitibo iai,

ao akea ae e konaa

ni kaburea are I karaoia.

2I konaa ni kairiko nakon

mwengan tinau,

are e reireinai b'aai ni kabane aika I atai.

I konaa n anganiko te wain ae e kangkang

ma ranin uaanikai naba.

3Kaaki baim te maing i aan atuu

ao rab'atai

ni baim are te atai.

4Ataeinainen Ierutarem,

berita nako iu ni m'aakan

te ria ma te anterobe

b'a akea ae e na kauta te tangira

i m'aain tauraoina.

A taku Raoraoia:

5Antai te ateiaine aei

ae e roko man te rereua

man raraa angan

teuare e tangiria?

E taku Neierei:

I kakiriwea am tangira

i aan te kai ae te aboro

ike ko bungiaki iai.

6Ko na tai m'am'aninga taekau

ao kanim'a te burenibai i baim

b'a ko aonga n ururingai.

E korakora riki

uram'aakan te tangira

nakoni m'aakan te mate,

ao e korakora riki nakon te ruanimate.

7E aki konaa ni b'ab'a te tangira

n taiani marawa ke taiani ieka;

e aki konaa ni kabooaki,

e aoria ngkana tera ae e b'aintangiraaki.

A Taku Raoraona:

8Bon iai tarira ae e uarereke

ae a tuai

n toro mammana.

Tera ae ti na karaoia

ngkana iai ae e kan mare ma ngaia?

9Bon tiaki te oo ngaia

ae ti na konaa ni kamanoa

i akuun te otanga te tirewa.

Ao tiaki naba ngaia te ruu

ae ti na konaa ni kaawakinna

i akuun te mataroa te kai.

E Taku Neierei:

10Bon te oo ngai ni katobibia te kaawa ae e buubura,

ao mammau bon taian taua,

e na reke i rouna te kukurei

ngkana e ti taraai.

11Bon iai ana nnenaroka ni kureebe Toromon

i B'aara Amon,

are e kaakab'aka boona nakoia tem'angina

n te m'aiti ae teuana te ngaa

te m'akoro n tirewa n tatabeua nako.

12Bon ti au b'ai n ti ngai au nnenaroka ni kureebe!

E na boni kaawakina ana tirewa Toromon

ao koraki ake tem'angina

a na bon kaawakina naba tib'angaia man te raka.

E taku Teuarei:

13Ko mena i nanon te nnenaroka

ao a katobibiko raoraom.

Tera ngke I ongo b'anaam!

E taku Neierei:

14Kawaekoako nako iu, Raou ae e tangiraki!

Kabirim'akako riki nakon te ria

nakoni maungan taiani boiarara.