1E tuangai te UEA b'a N na anganingkami tuua ma reirei aikai, ma ngaia are, kam kona n ongotaeka iai n te aba are E anganingkami. Ai ti teutana riki te tai ao kam nang ri nanon te Karaanga are te Ioretan ma n taua te aba.
2Ao ngkana kam tangiria ni kaananau maiumi ma kanoami, ao kam na taromauria te UEA ma n ongotaeka n ana Tua.
3Kakauongo raoi, Iteraera. A taromauria te UEA ami bakatibu, ao E berita b'a E na anganiira te aba aei ae bati iai te miriki ma ana karewe te manibeeru. Ongotaeka raoi i rouna, ao kam na tetekeraoi ma n riki b'a te botannaomata ae korakora.
4Kakauongo, Iteraera. Bon ti te Atua ni koaua te UEA ae Atuara.
5Ma ngaia are, kam na tangira te UEA ae Atuara ma nanomi ni kabane, tamneimi ni kabane, ao korakorami ni kabane.
6Ururing ana Tua
7ao tuangiia ami ataei n taai nako. Taetaekinna n taai nako, ni mwengami ke i aon te kawai ke i aoni kiemi n te tairiki, ke ngkana kam uti n te ingabong.
8Koroi katotongaia ao kabaei i aon baimi ao ram'ami b'a kam aonga n uringnga.
9E karaoa ana Boraraoi te UEA ma ara botannaomata i aon mataroan auti ao taiani kawai n rin nakon te kaawa.
Taromauria Te UEA N Ti NgaiaAo e taku Moote nakoia Iteraera:10E berita te UEA nakoia ami bakatibu ake Aberaam, Itaaka, ao Iakob'a b'a E na anganingkami te aba aei. Ngkai, E na karokoingkami ikekei ma n anganingkami ami kaawa aika buubura, ma taian kateitei iai aika tamaroa aika kam aki karaoi,
11ao auti aika on ni b'aai aika tamaroa aika kam bon aki kamenaki ikekei. E na anganingkami taiani m'anib'a te UEA aika kam bon aki ekei, ao taiani nne ni kureebe ma oriwa aika kam aki uniki. Ma ngkana kam a rangi n tibutaua n am'arake n te aro are kam a aki kona riki n am'arake,
12ao kam na aki m'aninga ae bon te UEA ae kainaomataingkami man te toronaki i Aikubita.
13Taromauriia, ao ongotaeka iroun te UEA ae Atuami ma te maaku ao te ruru, ao berita b'a kam na kakaonimaki nakoina.
14Tai karaoi b'aai aika rekereke ma atua ake a taromauriaki irouia botannaomata akana i rarikimi.
15Ngkana kam taromauriia atua tabeman, ao E na rangi n un te UEA iroumi, ao E na kamaunaingkami mai aon te aonnaba. E mena iroumi te UEA ae Atuami,
16ma ngaia are, kam na aki kataia ni kakoaua b'a E kona ni buokingkami n aron are kam karaoia ngkoa i Mata.
17Ongotaeka n taai nako nakon tuua ake E a tia te UEA n anganingkami
18-19ao maiuakina te maiu are E tangiria. Ao kam na kona iai n rin n te aba ma n anaia mairouia ami kairiribai, n aron are E a tia ni berita iai nakoia ami bakatibu.
20Ao ane a na titiraki natimi n te bong teuana ni kaangai, E aera te UEA ngkai E anganiira tuua ma reirei aikai?
21Ao kam na kaekaia ni kaangai.
Bon tooro ngkoa ngaira iroun uean Aikubita, ma E kamanena m'aakana ae korakorana te UEA ni kainaomataira.
22Ti bon nooria ngke E karaoi taiani kakai, ao b'aai aika kakamaaku nakon te uea ma ana aobitia, ao raona ni kabane.
23E kainaomataira te UEA mai Aikubita b'a E aonga ni karokoira n te aba aei, n aron are E a tia ni berita iai nakoia ara bakatibu.
24Ao bon anne bukina are E tangiria iai b'a ti na ongotaeka nakon ana Tua ma n taromauriia ma te maaku ao te ruru.
25Ao ngkana ti karaoa anne, ao E na kaawakiniira ma ni buokiira b'a ti na tetekeraoi.
Who We AreWhat We EelieveWhat We Do
2025 by iamachristian.org,Inc All rights reserved.
