1Ao ngke a tia ni kaaitibo Iteraera i Mitib'a i m'aain te buaka ma kaain te baronga are Beniamin, ao a karaoa te berita ae tabu: Bon akea mairoura ae na anga natina te aine b'a e na mare ma m'aanen te baronga are Beniamin.
2Ao i mwiin te buaka ma te baronga are Beniamin, ao a nako Iteraera nakon te tabo n taromauri i Betaera ao a tekateka ikekei ni karokoa bungin taai. Ao a takaarua n tang ni korakai,
3ao a tataro ni kaangai, Ara UEA, bon Atuan Iteraera Ngkoe. E aera ngkai ko kariaia b'a e na riki te aro aei? Ngkai e a bua ara baronga are teuana.
4Ao n te ingabong are i mwiina, ao a karaoa te baonikarea Iteraera ao a anga aia karea are kakukureian te UEA ma ni bubutiia Ana kakab'aia.
5Ao a titirakiniia i bon irouia ni kaangai, Iai mai buakoia barongan Iteraera ae aki roko nakon te tabo n taromauri? Ti a tia ni karaoa ara berita ae tabu b'a ane aki roko n te bowi i Mitib'a ao e na tiringaki.
6Ao a nanokawaki Iteraera n te b'ai are riki nakoia kaain te baronga are Beniamin, ao a taku, E a mauna nako ara baronga are teuana.
7Bon ti tabeman m'aanen te baronga are Beniamin ake a aki mate n te buaka. Ti na karekeia buuia b'a a aonga n aki mauna nako. Ma ti nang kanga ni karaoa anne, ngkai ti a tia ni berita nakon te UEA b'a akea mai rouia ae na manga iein ma natira aine?
8-9Ao a manga titiraki riki Iteraera, Iai te baronga ae aki roko n tain te bowi are karaoaki i Mitib'a?
Ao i mwiin te ititiraki i bon i marenaia, ao a kunea b'a ngaia a aki roko kaain Iabeti are i Kireata.
10-11Ma ngaia are, a kanakoia 12,000 aia taani buaka ma aia taeka ae kaangai, Buakana Iabeti i Kireata ao tiringiia kaaina ni kabane, ma ti aine aika tuai ni iein aika kam na kamaiuia.
12Ao a buakana Iabeti i Kireata taani buaka, ao a okira te maeka i Kanaan ma 400 aine aika ataeinaine.
13Ao a ikotaki m'aane ao a kanakoa te rongorongo nakoia m'aanen Beniamin ni B'aan Rimmon, n tuangiia b'a a tangiria Iteraera ni karekea te raoi ma ngaiia.
14Ao a roko m'aanen Beniamin mani B'aan Rimmon, ao Iteraera a kaieiniia ma ataeinaine mai Iabeti. Ma a aki tau m'aitiia aine.
15Ao a rangi n nanokawaki Iteraera, i bukina ngke a kuri ni mauna nako aia baronga teuana.
16Ao a taku naake aia taani kairiiri i aoia ni kabane:
A bane ni mate ainen Beniamin. Ao ti nang kanga ni karekeia buuia m'aanen Beniamin ake nikiraia?
17Ngkana akea natiia, ao ane na mauna nako teuana ana baronga Iteraera.
18Ma ti bon aki kona ni kaieiniia m'aanen Beniamin ma natira aine. Ti a tia ni karaoa ara berita ae matoa b'a ti na aki karaoa anne, ao ngkana ti a manga urua ara berita, ao ti na maraia.
19Ao e taku temanna, Ao tera ami iango n Ana Toa te UEA are kakaraoaki ni katoa ririki i Tiro? E na bo i Betaera, i maiakin Reb'anon, i mainikun te kawai are nako Betaera ao Tekem.
20Ao taan kairiiri, a tuangiia m'aanen Beniamin ake a tuai reke buuia ni kaangai:
Kam na nako Tiro ni karabaingkami ni nne ni kureebe i rarikiia n te tabo are karaoaki iai te Toa.
21Kam na tataningaia ataeinainen Tiro ake a na ruruoia. Kawaekoaingkami n otinako n raweia raomi i buakoia ataeinaine, ao uotiia nakon ami auti b'a buumi.
22Ngkana a ngurengure tamaia ke tariia i bukiia, ao ti na kaangai, Taiaoka n nanoangaiia n anganiia m'aane akekei b'a buuia. A aki tau m'aitiia aine ake ti karekeia i bukiia m'aanen Beniamin n te buaka are i Iabeti. Ao kam na bon aki reke n te maraia n aron ara ti boraraoi iai ngkai kam bon aki kariaia b'a a na iein ma natimi aine.
23Ao a nako m'aanen Beniamin nako Tiro ni karabaia i buakon taian nne ni kureebe. Ao a waakina aia m'aie taian ataeinaine, ao a raweia buuia m'aane akekei n tatabemaniia nako ma ni uotiia nako. Ao a nako n okira abaia m'aanen Beniamin, ao a manga karaoa aia kaawa ma ni manga moana maekaia iai.
24Ao i mwiin anne, ao a okiri mwengaia ma aia utu Iteraera ake te korakina.
A Aki Tautaekanaki Kaain Iteraera Iroun Te Uea25A aki tautaekanaki Iteraera iroun te uea ni boong akekei, ao a bane ni inaomata aomata nako ni karaoa are a bon taku b'a e eti.
Who We AreWhat We EelieveWhat We Do
2025 by iamachristian.org,Inc All rights reserved.
