1Ao e taku Iobi,
2Eng, I a kaman ongo b'aai ni kabane akanne mai m'aaina.
Ma e na kanga n tokanikai te aomata ngkana e kaitaraa ma te Atua?
3E na kangaa ni kauntaeka te aomata temanna ma Ngaia?
E kona n titiraki teuana te nga te titiraki,
ao bon akea temanna ae kona ni kaekai.
4E rangi n rabakau te Atua ao E m'aaka,
ao bon akea te aomata ae kona n teirake ni kaitaraa.
5E kam'aei maunga n te aro ae aki kantaningaaki,
ao e kamaunai naba n unna.
6E karokoa te m'aeiei, ao e ioioa te aba.
E karurui taiani boua ake a tabeka aonteaba.
7E kona ni katoka otin taai,
ao ootan taian itoi n te tairiki.
8Bon akea temanna ae buoka te Atua ngke E taakina nako karawa,
ke ngke E toubekaa nukan te mannikaakang ae kakamaaku are i taari.
9Ao te Atua, E katinetinei itoi i karawa
itoin meang, roon Nei Auti, Nei Auti, ao itoini maiaki.
10Ti aki kona n atai baika ab'ab'aki aika E a tia ni karaoi,
ao akea tokin Ana m'akuri aika kamimii.
11Ngkana E roko ao I aki nooria,
ao ngkana E taonnako ao I aki namakinna.
12E anaa te b'ai ae bon taku, ao bon akea temanna ae kona ni katokia;
akea temanna ae na kataia n titirakinna ni kaangai, tera ae Ko karaoia?
13E teimatoa unin te Atua, ao E kamanatuaia Ana kairiribai
ake a buoka Raaba, are manin taari ae kakamaaku, are e aki toki ni kakaitaraa te Atua.
14Ma ngaia are N na kanga ni kakaei au taeka
ake N na kabooi iai Ana taeka te Atua?
15Ngkai bon akea au bure, ao te b'ai ae I ti konaa ni karaoia
bon ti te bubuti Ana akoi te Atua ae au Tia Moti.
16Ma e ngae ngkana E anganai au tai n taetae n te tai aei, ma I bon aki kakoaua b'a E na kakauongo i rou.
17E kanakoa te angibuaka n oreai ma ni kakunikuna rab'atau
n akea bukina ae riai.
18E aki anganai au tai b'a N na rawea moa ikeu teutana,
E kaonrakea maiu n te mwebuaka.
19Tao N nang imanono? N nang imanonoa te Atua?
I kona ni kateia n te kabowi? Iai ae kona ni kam'ananga nakon te kabowi?
20I bon aki bure, ao I kakaonimaki, ma e aki reke maiu n au taeka,
ao b'aai ni kabane aika I taekin, a taraa ni manga kabuakakaai.
21I bon aki bure,
ao I aki tabe iai.
I a kua n te maiu aei.
22Ti te bo ngkana e tiringaki te aomata
ae akea ana bure
ma te aomata ae iai ana bure iroun te Atua.
23E ngare te Atua ngkana
e karina ni mate te aomata
ae akea ana bure.
24E anga te aonnaba te Atua nako ia aomata aika buakaka.
E kamatakiia taani moti ni kabane.
Ao ngkana tiaki te Atua ae karaoi, ao antai ae karaoi?
Kabirim'akaan Maiu25A waekoa ni birinako au bong,
ao bon akea teuana mai buakoia ae raoiroi.
26E a taonnako maiu kaanga te booti ae beibeti nako ni waekoa,
ao kaanga ai aron naba bakareren te karakara ngkana e rawea te ika.
27Ngkana I kataia ni kakukureiai
b'a I aonga ni m'anuokin marakiu,
28ao a manga okiokirai rawawatau ni kakamaakai.
I ataia b'a E taumatoaai naba te Atua
b'a te tia bure.
29E aera ngkai I boni kauntaeka naba,
ao are ai te tia bure ngai?
30Bon akea te toobu ae na kona ni kaitiaki au bure.
31E tewenakoai te Atua nako nanon te rua ae kammaira,
n te aro are a rangi ni kam'araa kunnikaiu iai.
32Ngke bon te aomata te Atua, ao N na bon kona ni kaekai Ana taeka,
N na nako ma Ngaia nakon te kabowi ni kaetieti ma Ngaia.
33Ma bon akea temanna ae kona n tei i marenara
akea ae kona n roko n anga ana moti i aora ni kauoman.
34E a tau oreakiu te Atua!
E a tau kakamaakakiu.
35B'a I aki maaku. I a kona moa n taetae
b'a I ataa ae bon oin nanou.
Who We AreWhat We EelieveWhat We Do
2025 by iamachristian.org,Inc All rights reserved.