Etekiera 36 - Kiribati New Version Bible

Rongorongo I bukin Maungan Nako Iteraera

1E taku te UEA:

Etekiera ae natin te aomata, ko na tuangiia maungan nako Iteraera

2b'a boni Ngai ae te UEA ae te Atua ae I taekina ae e kaangai:

A na b'ainingareai ngkai ami kairiribai ao a na taku b'a aia b'ai ngkami aika maunga.

3A uruaningkami ma ni kamanatuaingkami man itera ni kabane, ao a kataenikaingkami aia botannaomata ianena ao a b'ainingareingkami.

4Ma ngaia ae kam na bane n ongora ngkami aika maunga ao tabuki, raanga n ran ma m'arua, nakon te b'ai ae I karaoia. A na wene n uruaki ami kaawa nako, ao a na bae ni ngare ma ni kamamaaingkami botannaomata nako.

5Ma N na rairaki nakoia botannaomata aikai ma uniu ae e korakora, ai moara ra riki ake a oom'aaka ngareia ni ngareakiniko ma n taui ami tabo n uteute nako.

6E a bati n tau rawawatami, ao I rangi n un Ngai ae te UEA ae te Atua! A tia ni kamamaaeko botannaomata,

7ma ngaia ae ngkai N na kamamaaia ma ni kab'ainrangiia. Bon anne au berita ae e matoa.

8A na rikirake aroka i aon maungan nako Iteraera ao a na kariki uaa i bukiia Au aomata, b'a a nang okira mwengaia n te tai ae aki maan.

9N na tararuaingkami ni kamaraua te tano ao n uniki taiani uita ni karaabeen ami maunga aika maiu reirei.

10A na oki Iteraera ma ni manga katea ami kaawa aika a urubekebeke ma ni maeka iai.

11A na bungiaki naati, ao a na bungi natiia naba maan. Ko na aki manga kiitanaki n arom ngkai, ma ko na onrake irouia aomata ao e na karaoaki ae e raoiroi nakoim nakon ake mai m'aaina. Ao ane ko na ataia iai b'a bon te UEA Ngai.

12N na kaokiia Au aomata nakon mwengaia, ao a na maeka i aon taiani maunga, i bukina b'a aia b'ai ngkoe, ao e na aki manga tare kanaia ake a reereke man karaabeen am maunga.

13E boni koaua ae ko bukinaki b'a ko aki karekei am'arake aika a tau i bukiia am aomata ao ko kabakiia am aomata.

14I berita b'a ma n te tai aei, ko nang karekei kanaia aomata ngkoe ae te aba ao ko na aki manga kabakiia. Bon aei au taeka Ngai ae te UEA.

15Ko na aki manga ongo b'anaaia botannaomata ake tabeua ni ngareakiniko ma ni mata ni kakaniko riki nakoim. Bon aei au taeka Ngai ae te UEA ae te Atua.

E Na Riai Ni Karineaki Te UEA

16E taku te UEA:

17Etekiera ae natin te aomata, ngke a maeka ngkoa Iteraera n oin abaia, a kabaarekaa te aba n aroia ake a karaoi, n aron kam'araan te aine ae e aoraki n aine.

18A tiritiri ao a taromauri bouannanti, ake a kabuakaka aon te aba. Ma ngaia are, I katuaaia Au aomata ni marakin nanou

19ao I kauamaae nakoia nako ia botannaomata ake tabeua, n aron ae a bon uaa korona.

20E kamatauningaaki arau n taabo nako ake a nako iai, i bukina b'a a kab'ainrangiia Au aomata ianena n aia taeka are a taku b'a I a tia ni kairoroia Au aomata b'a a na kiitana oin abaia.

21E tabe nanou n aia taeka ianena i buku,

22ma ngaia are, ko na tuangiia Iteraera Au taeka ae e kaangai:

Kam a tia ni kamatauningaa arau ae e tabu i buakoia botannaomata nako ake kam maeka i buakoia ngkai. Ma ngaia ae, e bon riai n aki reke nakoimi te b'ai ae n nang karaoia ngkai nakoimi. N na kaokingkami nakon mwengami ti i bukin karinean arau

23ao ni kaotia naba nakoia ianena b'a I tabu. Ao ane a na ataai iai b'a bon te UEA Ngai ae te Atua. Bon aei au taeka.

24N anaingkami man aia botannaomata nako ianena ma ni bootingkami ma ni kaokingkami nakon mwengami.

25N na tatauringkami n te ran ae e itiaki, ao kam na riki n tau i buku. N na teboki ni kanakoi b'aai ni kabane akana a kabaarekaingkami, ao N na kanakoi ami bouannanti aika a rangi n ribaaki.

26N na kanakoi nanomi aika a matoatoa ao N na anganingkami nanomi aika a boou ao n tangira te kakaonimaki. E na ti reke iroumi te iango aika a itiaki,

27i bukina b'a N na karina Tamneiu i nanomi ao ni karikingkami b'a kam na rangi ni kan ongotaeka nakon au Tua ma au Reirei nako.

28Kam na manga maeka riki n te aba are I anganiia ami bakatibu; kam na riki b'a Au aomata, ao Ngai N na riki b'a Atuami.

29N na kaawakiningkami mani b'aai aika kam na kam'araa iai. E na taonako ami tawaana n taiani uita, ao akea ae e na manga baki.

30A na onrake arokami n taiani uaa, ao a na rikirake taiani uita n ami tawaana nako, n te aro are kam na aki manga mamaa i bukin aki taun kanami.

31Kam riai n uring aromi aika a buakaka ao kam riai n ribaingkami i bon iroumi n te b'ai ae kam a tia ni karaoia.

32Kaain Iteraera, I aki karaoi aikai i bukimi. Kam aki toki ni bubure nako iu, ao kam bon riai ni kamaamaaeaki ao ni kab'ainrangaki n te b'ai ae kam a tia ni karaoia. Bon aei au taeka Ngai ae te UEA ae te Atua.

33Ngkana I tia ni kaitiakingkami, N na manga karaoingkami b'a kam na katea ami kaawa akana a urubekebeke ma ni kamaekaingkami iai.

34E na manga kamarauaki tanon abami, ao akea ae e na manga oki n nooria b'a te aba ae akea kain aona.

35Ma, a na taetaekinna b'a ti te bo tikiraoina ma te nne n aroka are Eten. A na aki manga noori taian kaawa aika a wene n uruaki, ma a na noori ami kaawa aika a korakora aika a onrake irouia aomata.

36Ao ane a na ataia botannaomata akana nikira ni maiu akana i rarikimi b'a bon Ngai ae I a manga katei taabo ake a uruaki ao ni manga uniki taian tawaana aika akea kain aoia. Bon aei au taeka Ngai ae te UEA ae I karaoa te berita aei.

37N na manga kaeka riki ami tataro nako, ao N na karikirakea ami botannaomata kaanga te nanai n tiibu ae e korakora.

38A na manga kaonaki taiani kaawa aika a wene n uruaki n taian aomata, n aron Ierutarem ngkoa ngke e onrake n taian tiibu ake a na kareanaki i bukin te toa. Ao ane kam na ataia iai b'a bon te UEA Ngai.