1Ao ni bon te tai naba arei, ao e a aoraki natin Ieroboam te m'aane are Abiia.
2-3Ao e taku Ieroboam nakon buuna.
Bita teim b'a a aonga n ae akea ae ataiko b'a buu ngkoe. Ao i mwiina ko na nako Tiro, are e maeka iai te burabeti are Aiia, uoti nakoina tebwina kariki, tabeua keeke aika a uarereke, ana karewe te manibeeru, ao bubutiia b'a e na tuangko te b'ai ae e na riki nakon natira te m'aane. E konaa n tuangko b'a boni ngaia are e tuangai b'a N na riki b'a te uea.
4E katauraoia ao e nakon ana auti Aiia i Tiro.
E a boni kara n te tai aei Aiia ao e a matakii,
5ma E tuangnga te UEA ni kaangai, Ane e na roko buun Ieroboam n titirakiniko i bukin natina te m'aane. N na tuangko te b'ai ae ko na tuangnga.
Ao ngke e roko buun Ieroboam n ana auti Aiia, ao e karikia b'a te aomata temanna.
6Ma ngke e ongo m'akaikaina Aiia ngke e nakon te mataroa, ao e taku:
Rin nako! I bon ataiko b'a buun Ieroboam ngkoe. E aera ngkai ko kataia ni bitiko b'a aongkoa te aomata temanna? Bon iai au rongorongo ae kananokawaki nakoim.
7Ko na tuanga buum te rongorongo aei, ae e roko mai roun te UEA ae Atuan Iteraera. Ko bon ataai Ieroboam b'a boni ngai ae te UEA ae I rineiko mai buakoia aomata b'a ko na tia kairiiri i aon au Aomata ae Iteraera.
8I bon anaa naba abanuean Tawita mai irouia ana utu ao I anganiko. Ma ko bon aki katotonga Au tia m'akuri are Tawita. E rangi n ongotaeka n taai nako irou, ao e kakaraoa ae e eti.
9Ko a tia n rangi ni kamaraka nanou, ngke ko kaaki taekau; ao ko karaoi bouananti man te koora. Ieroboam. Ko a tia ni karaoa te m'akuri ae moan te buakaka riki nakon are a tia ni karaoia uea ni kabane ake mai i m'aaim.
10Ao i bukin aei, ao N na kamaunaa am utu n tiringiia m'anena ni kabane ma ataei ni m'anena, aika tooro ke aika inaomata. N na kamaunaa am utu, n aron te ai ngkana e kabuoka te maange.
11E na kang rab'ataia am koraki ake a mate n te kaawa, taiani kamea, ao e na kang rab'ataia ake a mate i tinanikun te kaawa taian ikare ake taian kia. Aei bon Au taeka Ngai ae te UEA, ao N na bon aki manga bita nanou.
12Ao anne te rongorongo nakoni buum. Ao nakoim, Ko na okira mwengam, ao i mwiin teutana te tai are ko roko iai, ao e na mate natim te m'aane.
13A na bane Iteraera n tangitang i bukin matena. Ma e na bon riki ngaia b'a te kabanea n aomata mai i buakoia ana utu Ieroboam ni karaoaki raoi te taunimate i bukina, i bukina b'a bon ti ngaia ae E kukurei te UEA ae Atuan Iteraera i rouna.
14E na waekoa te UEA ni manga rinea te uea ae e boou, are e na tiringiia ana utu Ieroboam. Ao I bon koaua b'a e na waekoa.
15A tia aomatan Iteraera ni kauna te UEA ngke a katei bouanantin Nei Aatera. E na katuaaia te UEA ni karokoa a ioaki kaanga uteute i nanon te karaanga. E na uotia nako mai i aon te aba are E anganira ngkoa aia bakatibu, ao E na kauamaaeia ni karokoa te Karaanga are Iuberetiti.
16E tuuriia Iteraera ana bure Ieroboam, ao a riki b'a taani bure Iteraera iai. Ma ngaia are, E nang kamaunaa Iteraera te UEA.
17Ao e nako buun Ieroboam n okira mwengana, n te kaawa are Tireta.
Ao ni bon te tai are e toko iai waena n ana auti, ao e a mate naba natina te m'aane.
18A bane n roko Iteraera n tang n tain taunakina, n aron are e a tia n taekinna ana Toro te UEA are Aiia.
Maten Ieroboam19A bane ni koreaki rongorongon b'aai ni kabane ake e karaoi Ieroboam ngke e uea, n reitaki naba ma taian bonibuaka ake e tokanikai iai n te boki are Rongorongoia uean Iteraera.
20E uea i aon Iteraera i nanon 22 te ririki, ao i mwiina e mate, ao e a manga uea natina te m'aane are Nataba i mwiina.
Uean Iuta are Roboam21Ao E uea Roboam are natin Toromon te m'aane i aon Iuta ngke 41 ana ririki ni maiu, ao e tautaekana Iteraera mai Ierutarem are Ana kaawa te UEA are e rineaki are E na taromauriaki iai i nanon 17 te ririki. Boni kaain Ammon tinana ae Naama.
22A aki ongotaeka iroun te UEA kaain Iuta ao a kaunna riki nakon are a tia ni karaoia aia bakatibu.
23A boni karaoi naba oin aia baangota, ma taamnein anti Ianena n taian atiibu, ao a katei bouannanti i bukin taromaurian te anti are Nei Aatera i aon taian tabuki ao i aan nuun kaai aika a korakora.
24Ao ae e a rangi ni buakaka riki, ainen matawa b'a a na m'akuri n te baangota, ma ni karaoi katei aika a kammaira, aika kateia botannaomata Ianena are e a tia ngkoa te UEA ni kanakoia mai aoni Kanaan.
25Ao ngke e a tia Roboam ni uea i nanon aua te ririki, ao e buakana Ierutarem uean Aikubita are Titiaka.
26E anai b'aai ni kabane aika a kakaawaki man te Tembora, ao te bareti, ni ikotaki ma otangan Toromon ake koora.
27Ao e onei mwin otanga koora Roboam n taian otanga aika buraonti, ao e tuangiia taan tararuaa mataroan b'a a na tararuai raoi taian otanga ake buraonti.
28Ni katoatai ngkana e nako Roboam nakon Ana Tembora te UEA, ao a uouoti otanga taan tararua. Ma a aki toki ni kakaoki nakon aia ru tautia ni buaka n te tai are bane tabeia iai.
29A bane n tauaki rongorongon b'aai ni kabane ake e karaoi te uea are Roboam i nanon ana tai ni uea n te boki ae Rongorongoia Uean Iuta.
30A aki toki ni bubuaka ngaia ma Ieroboam.
31Boni kaain Ammon tinan Reoboam are Nei Naama, ma ngke e mate Reoboam, ao e taunaki i rarikiia ana bakatibu i Ierutarem. E a manga uea natina te m'aane are Abiiam.
Who We AreWhat We EelieveWhat We Do
2025 by iamachristian.org,Inc All rights reserved.
