1Ao e aki b'aka te karau i nanon tenua te ririki i aon Taamaria, ao e a moanna n tare te am'arake n taabo ni kabane.
2Ao E taku te UEA nakon Eria, “Naako kawara te uea are Aaba b'a N nang kab'aka te karau n te tai ae e aki maan.” Ma ngaia are, e a nako Eria ni kawara Aaba.
Kakaean Te Ran Irouia Aaba Ma Ob'aria3Ao e riki Ob'aria b'a te tia tararua ana bareti Aaba n te tai anne, ma e bon kakaonimaki naba n taromauria te UEA.
4Bon Ob'aria are e karabaia 100 Ana burabeti te UEA n taian nangananga ni b'a ake uoua ao e kakarekei kanaia ma nimaia ngke e kataia Nei Ietebera n tiringiia.
Ao e kanaanako wetean Ob'aria te uea are Aaba
5ao e taku, “Ti na riai ni kakaaea kanaia ara aoti ma ara miure Ao ngkana ti aki ao e raoiroi riki ngkana ti tiringiia. Ti na nako ni kakaaea te uteute ni kabutaa aon te aba i rarikin taiani karaanga aika a uarereke ma koburake n ran.
6Ko na nako n te kawai teuana, ao ngai te kawai teuana.” Ao i mwiin arei, ao a waakinako ni kawaia aika a kakaokoro.
7Ao ngke e tabe ni waaki nako Ob'aria i aon kawaina, ao e kaaitibo ma Eria. Ao e kinaa Eria ma ngaia are, e bobaraaki nakon Eria ao e taku nakoina, “Eria, bon ngkoe anne?”
8Ao e taku Eria, “Eng. Ko na nako n tuanga Aaba ae I mena ikai.”
9Ao e taku Ob'aria:
Ane e na tiringai Aaba ngkana I tuangnga anne. Ao bon akea te kairua ae I a tia ni karaoia.
10I tuea nakoim n aran te UEA ae maiu ae Atuam b'a e a tia te uea ni kakaaeko n taabo nako. E kanakoia aomata b'a a na tarataraiko n aaba nako, ao ngke a bon aki roko n te kuneko ao e tuangiia taani kairiiri ni kabane n aaba nako b'a a na tuea ae bon akea ngkoe i abaia.
11Ao ngkoe ko bon tangiria b'a N na tuangnga ae ko mena ikai?
12Tera ngke E waekoa n anaiko Tamnein te UEA n te tai are I kitaniko naba iai? B'a ngkana e roko Aaba n anaiko ao ko na bon aki reke i rouna. Ao ane e na manga bon tiringai.
I bon tataromauria te UEA mangke te ataeinim'aane ngai.
13Boni ngai naba are I karabaia tebubua ana burabeti te UEA n te nangananga ni b'a ngke e kataia Nei Ietebera n tiringiia. I bon anganganiia naba kanaia ma nimaia.
14Ko bon tangirai b'a N na tuanga Aaba ae ko mena ikai? E na bon tiringai.
15E taku Eria, “Boni ngai ana toro te UEA ae E maiu ae Moan te M'aaka, ao I berita n arana b'a N na kaitibo ma Aaba n te bong aei.”
16Ao e nako Ob'aria ao e tuanga Aaba te tabo are e mena iai Eria.
Ao e nako Aaba ni kawara Eria,
17ao ngke e nooria, ao e takaarua Aaba ni kaangai, “Ai boni ngkoe anne te tia kakiriwe i aon Iteraera. Ko rangi ni buakaka.”
18Ao e taku Eria,
Tiaki ngai te tia kakiriwe ae moan te buakaka ma boni ngkoe. Boni ngkoe ma am utu aika kam aki ongotaeka nakon ana Tua te UEA ngkai kam taromauria B'aara.
19Weteia aomata ni kabane i aon Iteraera ao tuangiia b'a a na kawarai i taubukin te Maunga are Karemera. Ao ko riai naba n kairiia ana burabeti B'aara ake 450 ao 400 ana burabeti Nei Aatera ake a am'am'arake n ana taibora Nei Ietebera.
20Ao e bootia aomata Iteraera ni kabane Aaba, ao a nako ni kawara Eria i aon te Maunga are Karemera.
21Ao e tei Eria i mataia ao e taku, “Ai ti maanra riki ngkami ni biribiri i marenan b'aai aika uoua? Ngkana kam taku b'a te Atua te UEA, ao taromauria. Ma ngkana te Atua B'aara ao taromauria.” Ao bon akea te b'ai ae a taekinna aomata.
22Ao e a manga reitanako ana taeka Eria man taku, bon ti ngai ana burabeti te UEA ikai, ma a m'aiti ana burabeti B'aara b'a 450.
23Uotimai uoman taiani kaom'aane. Anganiia ana burabeti B'aara temanna b'a a na tiringnga, ma ni korokoroia ni kauarerekea. Ao i mwiina a konaa ni katokaa i aon taian aia ma a na aki kauraa. N na karaoa naba ae aron anne n te kaom'aane are temanna ao N na aki naba kauraa aina.
24A na tataro ana burabeti B'aara nakon antiia, ao ngai N na tataro nakon te UEA. Ao e na atongaki b'a te Atua ni koaua ane E kauraa te ai. Ao a taku aomata, “E raoiroi te iango anne.”
25Ao e taku Eria nakoia ana burabeti B'aara, “Kam na waaki moa b'a a m'aiti riki ami koraki. Kaotinakoa te kaom'aane ao katauraoia, ma kam na aki kauraa aina. Ao i mwiina kam a tataro nakon antimi.”
26Ao a rinea aia kaom'aane ana burabeti B'aara ao a katauraoia, ao a tataro nakoni B'aara ni kabanea te ingabong arei ni butiia b'a e na kauraa ain aia karea. A ruruoia ni katobibia aia baonikarea ao a tatakarua ni kaangai, “Kaekaira B'aara!” Ma bon akea kaekaakiia.
27Ao ngke e a tawanou, ao e a moana b'ainingareaia Eria ao e taku, “Tataro ni kaooa riki b'anaami. Kam taku b'a boni iai B'aara. Tao ane e tabe ni kakantaninga ke e nako n rairaki, ke tao ane e nakonako moa nakon taabo tabeua, ke tao ane e tabe ni matu, ma kam riai ni kautia.”
28Ao a tatakarua ana burabeti ao a korokoroi rab'ataia n taiani kabaang ma taiani biti ni karokoa ae a raraabuabua. Ao anne aroia n tataro,
29ao ai bon aroia naba anne ni karokoa e a b'akataai. Ma bon akea naba te kaeka teutana nakoia.
30Ao e weteia aomata Eria ngke e tabe ni katauraoa ana Baonikarea te UEA.
31Ao i mwiina, e anai tebwi ma uoua te atiibu ni karaoa iai te baonikarea b'a karinean te UEA. E tei teuana te atiibu i bukin barongan Iteraera ake tebwi ma uoua,
32are bon te ara are E anga te UEA nakon aia bakatibu are Iakob'a. Ao e kena te m'anono Eria ni katobibia te baonikarea, ae e konaa n taua te ran ae m'aitina 13 te riita.
33E katokai taiani kai i aon te baonikarea, ao i mwiina a korokorea te kaom'aane ni kauarerekea ao a katokai taiani iriko i aon taiani kai.
Ao e tuangiia aomata ni kaangai, Kanoai aua taian tiaeki aika a buubura, ao kab'aroi i aon te iriko ma taiani kai. Ao ngke e a tia ni karaoaki aei,
34ao e tuangiia b'a a na karaoa riki te aro arei uoua riki te tai. Ao a karaoi b'aai ni kabane ake e tuangiia
35ni karokoa, e a b'aro rikaaki te ran mai aon te baonikarea ni kanoaa te m'anono are e katobibia te baonikarea.
36Ao ngke e a bo tain te angakarea n te tairiki, ao e tataro Eria ni kaangai:
Ara UEA, Boni ngkoe Atuan Aberaam, Itaaka, ao Iteraera. Ko na kaotia raoi b'a boni ngkoe Atuan te botannaomata aei, ao ngai ae am toro I boni karaoa aei n am babaaire.
37I butiiko b'a ko na kaekaai, b'a aonga aomata aikai n ataia b'a boni Ngkoe te UEA ae te Atua, b'a Ko aonga ni kaoki nanoia nakoim.
38Ao e kanakoa te ai te UEA boni ngkekei naba, ao e kabuoka te karea ma taiani kai ao taian atiibu naba. Ao e kam'aia te tano are i rarikin te baonikarea ni katobibia ma ni kam'aua te ran ni kabane are i nanon te m'anono are e katobibia te baonikarea.
39Ao ngke a noora te b'ai are e riki arei aomata, ao a bane ni bobaraaki man takaarua ni kaangai, “Bon te Atua te UEA.”
40Ao e taku Eria, “Tauia ana burabeti B'aara! Tai kabiri nakoa naba temanna.”
Ma ngaia are, a raweia ana burabeti B'aara aomata ao a uotiia nakon te Karaanga are Kition, ike e a tiringiia iai Eria ni kabaneia.
B'akan Te Karau41Ao e taku Eria nakon Aaba, “Karekea kanam ao am'arake b'a I ongo rurungaan te karau ae e korakora ae e a tabe n roko.”
42Ao e nako Aaba, ma e aki nako Eria b'a e a manga oki n tam'arakea taubukin te Maunga are Karemera. Ao ngke e roko i taberana, ao e bobaraaki ni kabo matana ma te tano
43ao e taku nakon ana tia m'akuri, “Naako taraa marawa.”
Ao e nako te tia m'akuri arei. Ao ngke e oki ao e taku, “I a tia n tara marawa ma akea te b'ai ae I nooria.” Ao e a manga tuangnga riki Eria b'a e na noora marawa itiua te tai.
44Ao ngke e taratara te kaitiua n tai, ao e taku, “I noora te nang ae e tabe n roko. Ao buburana ai aron te timoinibai.”
Ao e taku Eria, “Ko riai ni kaea mwengam ngkai. B'a e kaawa n oaki n te karau.”
45Ao i mwiin tabeua te tai, ao e tabe n uananginang karawa ma n angang, ao e a tabe ni b'aka te karau.
46Ma ngaia are, e ninira kunnikaina Eria i aona, ao e anganaki korakorana iroun te UEA n te aro are e a konaa ni biri mai ikekei ni karokoa Ietireera n rimoan Aaba.
Who We AreWhat We EelieveWhat We Do
2025 by iamachristian.org,Inc All rights reserved.
