Itaia 13 - Kiribati New Version Bible

Katuaaean B'aburon

1Aio te rongorongo ae I anga i bukin B'aburon:

2Ko na anga te kanikina, takaarua n anga te babaaire

n te tabo ae e rietaata i aon te tabuki ae akea arokan aona,

ao kotea te kawai

n rin nakon aia mataroa

taan tautaeka aika a kamoamoa i B'aburon.

3E a tia n tuangiia

ana tautia aika a bane aroia

ao ana Aomata aika a kakannato

b'a a na kaota aron unna.

4Ongora nakoia koraki n aomata aika a kakarongoa

i aon taiani maunga!

A ikoti aia taanga ni buaka

taian abanuea, ao taian botannaomata

E a bootia taanga ni buaka

te UEA ae Moan te M'aaka

i bukin te buaka.

5E waaki n nakomai te UEA

ma te tiritiri ao te un ae moan te korakora

man te aba ae e raroa

e uota ana b'ainibuaka

b'a e na kamaunaa te aonnaba.

6Kam na tang ma ni katuu ranin matami!

E a roko te bong

are e na karokoa iai te urub'ai

te UEA ae Moan te M'aaka.

7A na bane ni maaku aomata ni kabane.

A na akea angin taiani bai;

a na mauna nako taian anginnano.

8A na bane ni ruru aomata n te maraki

kaanga te aine ae e ariri ni bung;

ane ana taraia i bon irouia

ma te mata ni maaku.

Akea Te Nanoanga

9N na kaota au aki nanoanga ke au aki akoi

Ngai ae te UEA

ngkana e roko te tai arei.

N na kamaunaa te aonnaba ni marakin nanou

ao taani bure naba ni kabane

akana a maeka i aona.

10E na mauna te oota

man taian itoi ake i karawa;

e na onikaki ootan te ingabong nakon te roo,

ao e mate ootan

nam'akaina.

11N na katuaaea te aonnaba ae e buakaka aei

ma aomatana

i bukin aia bure nako.

N na kamanatuaia taani kainikatonga aika a kakamaaku

aika a iowawa.

12E na kaangaanga kunean te koora ni koaua

irouia taian nikira ni maiu.

13I rangi n un,

Ngai ae te UEA ae Moan te M'aaka

Ngaia ae N na ioioa karawa

ao e na rurubenebene te aonnaba.

14A na bane ni biri

nakoni mwengaia aomata nako,

kaanga aron birin te ria ae e kakioaki,

ao tiibu aika a uamaae nako

ngkana akea te tia kaawakin tiibu.

15A na tiringaki n te kabaang

koraki ake taian taenikai.

16Ane a na nooriia natiia m'aane

ngkana a oreaki ma taiani b'a,

a na iraeaki mwengaia,

ao a na tangakoaki buuia.

17A na aki konaa ni kabooaki kaain Miria

n te tirewa ma ke koora,

ao I kanakoia

b'a na buakana B'aburon.

18A tiringiia rorobuaka

n aia kanoanikatebe;

e na bon akea te nanoanga ae e na nooraki

nakoia ataei aika a uarereke ao naati.

Kamaunaan B'aburon Iroun Te UEA

19E mimitong ao e korakora

te kaawa ae e buubura ae B'aburon,

kakatongaia botannaomata.

Ma e na riki b'a kaanga taiani kaawa aika a buubura

ake Tootom ao Komora

i mwiin uruakana

Irou Ngai ae te UEA.

20Ane a na akea ae e na maeka i B'aburon.

E na bon akea naba taani m'am'ananga aika a na maeka ni kaaniia,

ao a na aki kariaia aia nanai n tiibu

taani kaawakin tiibu b'a a na katoki kuaia ikekei.

21Bon ti manin te rereua aika,

a na maekana b'aina aika a uruaki

taian aure, ao taian aotireti,

a na eweewe iai taiani kooti

22A na tangitang taian aiena, ao taiani kameanti

man nonon nako B'aburon

ao baretina ake a tamaroa.

E a roko ana bong!