2.Tamuera 17 - Kiribati New Version Bible

1Ao e taku Aitobera nakon Abetarom:

Ko na kariaia b'a N na rineia tebwi ma uoua te ngaa te m'aane b'a a na buakana Tawita n tairiki,

2ngkana e a kua ma ni b'ara nanona. Ane e na aki reke ana tai, ao a na bane ni biri nako raona. Akea temanna ae N na tiringnga b'a ti Tawita,

3ngkai bon ti anne te aomata ae ko iangoa aron matena. Ao N na manga kaokiia botannaomata ni kabane nakoim kaanga te kabae te aine ae e a okira raona. E na aki teirake te kamangao imarenaia aomata ma te tautaeka n te aro aei.

Kababaan Abetarom Iroun Utiai

4Ao e kukurei Abetarom ma taani kairiiri ni kabane man barongan nako Iteraera n ana iango Aitobera ma ana kawai.

5Ao e taku Abetarom, “Kairamai Utiai are kaain Arekaite. Ti na ongo b'a tera ae e na taekinna.”

6Ao e rin Utiai, ao e tuanga Abetarom ana iango Aitobera. Ao e taku Abetarom, “Ti na karaoa ae e taku ke ti na aki? Ao ngkana arona b'a ti na aki karaoa are e taku, ko konaa ni kakaaea riki am iango ae e raoiroi riki?”

7Ao e taku Utiai:

E rangi n tamaroa ana iango Aitobera n te tai aei.

8I ataia b'a bon taani buaka raoi am koraki ni m'aane. Ti te bo ngkai ngaiia ma te tina ni bea ae e a tia n tiringaki natina. I rarikin anne, e bon rangi ni m'aiti taiani buaka aika e a tia n irii, ao ane e na bon aki konaa ni katairaa ma tabem'aang.

9E na bae n tia ni karabaa n te nangananga ni b'aa ke n taabo tabeua.

N te tai are a ongo iai b'a a tia n tiringaki am tautia, ao ane a taku aomata nako b'a e mate te taanga ni buaka ae b'anin.

10Ma ngaia are, ngkana ko ninikoria kaanga te raian ma e na bon bua naba ninikoriam. A bane n ataia aomata b'a bon te tia buaka ae e korakora tamam ao te tautia ae e ninikoria.

11Aio au iango, ko na bootia m'anen Iteraera man te kaawa are Taan i meaang rikaaki nakon te kaawa are Beerateb'a i maiaki. Ko na kam'aitiia riki am tautia nakon tanon mataniwiin te bike. Abetarom, ko na kairiia boni ngkoe,

12ao ti na bane ni buakana Tawita n te tabo are e mena iai. Ti na b'akaria kaanga te aoi ae rabuna aon te tano. Ao e na mate ma ana tautia ni kabane!

13Ngkana arona b'a a nako n rin n taiani kaawa aika a oonaki, ti na manga kabaea oon te kaawa anne ma ni uaakinna nako nanon te karaanga.

14Ao a kukurei riki Abetarom ma aomata nako n ana iango Utiai nakon ana iango Aitobera. E riki aei b'a E karaoa ana iango Aitobera te UEA b'a e na aki b'ai b'a e aonga n reke te kangaanga nakon Abetarom.

Tuangan Tawita Te Rongorongo Irouia Ionatan Ao Aimaati

15Ao e m'ananga Utiai ni kawara Tatoka ma Abiata. E kaongoa ana iango Aitobera are e a tia n angan Abetarom ma taani kairiiri i Iteraera. E bon tuangiia naba ana iango are e anganna.

16Ao i mwiina, e taku, “Kawaekoako! Kanakoa temanna b'a e na kauringa Tawita b'a e na aki tiku ni kangainaa n iteran te karaanga, b'a a kaawa ni kabuanib'ai ma raona!”

17Ao a nako n tataninga Ionatan ma Aimaati i rarikin te koburake n ran i Rokera b'a a ribaa norakiia i Ierutarem. Ao e nakon te koburake n ran te aine ae te tia m'akuri ao e anganiia te rongorongo are a na kaongoa Tawita.

18Ma a nooraki iroun te ataeinaine ae e uarereke ao e nako n tuanga Abetarom. Ma ngaia are, a kawaekoaia n nako Ionatan ma Aimaati nakon ana auti te m'aane temanna ae e maeka i Baurim. Ao a ruorikaaki nako nanon te m'anib'a ae e mena n te tabo teuana ae e uki.

19E rabuna te m'anib'a arei buun te aomata arei ao e kab'aroa te uita i aona, b'a e aonga n aki nooraki te m'anib'a arei.

20Ao a roko ana tautia Abetarom nakon te aine arei ao a titiraki ma te b'anaa ae e matoa ni kaangai, “A ngaa Aimaati ao Ionatan?”

Ao e taku neierei, “A ri nanon te karaanga are e uarereke arei.”

Ao a nako tautia akekei ni kakaaia m'aane ake uoman akekei. Ma a bon aki roko irouia, ao a okira Ierutarem.

21Ao ngke a nako tautia akekei, ao a tam'arake n otinako man te m'anib'a. Ao a nako ni kawara Tawita ao a taku, “Kawaekoako! Katauraoiko n ri nanon te karaanga!” Ao a tuangnga ana iango Aitobera.

22Ao e katauraoia Tawita ma raona ao a ri nanon te karaanga are te Ioretan. Ao ngke e a oti taai, a bane ni mena n iteran te karaanga are te iterana.

Tiringakin Aitobera i bon Irouna

23Ao ngke e nooria Aitobera b'a a aki ira ana iango Abetarom ma taani kairiiri i aon Iteraera, ao e tokara ana aati ao e okirikaaki nakon mwengana i Kiro. E tuangiia ana utu ma ana taani m'akuri te b'ai ae e nang karaoia. Ao i mwiina, e kabaea roroana i bon i rouna, ao a tauna rab'atana n te ruanimate are ana b'ai ana utu.

24E nako Tawita nakon te kaawa are Maanaim, ao e ri aon te Karaanga are te Ioretan Abetarom ma ana taanga ni buaka Iteraera.

25E katokaa Amata Abetarom b'a onean mwiin Ioaba are te kam'anta n te taanga ni buaka. Taman Amata bon Itera are man ana utu Itimaera, ao tinana bon Nei Abikaira, are natin Naati te aine, are tarin tinan Ioaba are Nei Teruia.

26A katea aia kaemb'a Iteraera ake a na koraki Abetarom n aonon Kireata.

Uotakin B'aai Nakon Tawita Mairouia Raoraona

27I mwiin rokon Tawita n te kaawa are Maanaim, ao a roko Tiobi are natin Naati te m'aane mai Rab'a i Ammon, Makira are natin Ammiera te m'aane mai Roteb'a, ao Baretirai are kaain Kireata mai Rokerim.

28Ao aikai m'aitin b'aai ake a uoti:

29Taiani kie ni matu, burangketi, boora, tiaeki n tano, taiani uita, taiani b'aare, te buraawa, te uita ae e tinimaki, taiani biin, taian rentire, ana karewe te manibeeru, te b'ata, te tiibu, ao te tiiti.

A uota te am'arake i bukin Tawita ma raona i bukina ngke a ataia b'a a bane ni baki, ma ni kua, ao a taka i mwiin te mena n te rereua.