1N te bong teuana, e iango Tawita ao e taku, “N na rangini miimi ngkana iai ana utu Tauro aika teimatoa ni maiu. Ngkana iai, ao N na bon kaota akoaia, b'a I a tia ni karaoa au berita nakon Ionatan.”
2Ao Tawita, e wetea Tiba are temanna mai buakoia ana taani m'akuri ana utu Tauro. E taku Tawita, “Boni ngkoe Tiba.”
“Eng boni ngai.”
3Ao e titiraki Tawita ni kaangai, “Iai ngkai ana utu Tauro ae e maiu? Ngkana iai, ao N na bon akoia.”
Ao e kaeka Tiba ni kaangai, “E boni maiu naba ngkai temanna natin Ionatan te m'aane, ma e aki konaa n nakonako.”
4Ao e titiraki Tawita ni kaangai, “Ao e ngaa ngkai?”
Ao e kaeka Tiba ni kaangai, “E maeka i Roteba iroun Makira are natin Amiera te m'aane.”
5Ao e kanakoia tabeman ana taani m'akuri Tawita b'a a na anaa natin Ionatan te m'aane mai Roteba.
6Arana bon Mebiboteta, ao bon tibun Tauro te m'aane. E roko iroun Tawita ao e boobaraaki.
Ao e titirakinna Tawita ni kaangai, “Bon Mebiboteta ngkoe?”
Ao e taku, “Eng, teuae ko karineaki.”
7Ao e taku Tawita, “Ko na aki maaku. N na akoiko b'a ngaia tamam Ionatan. N na anganiko te aba are ana b'ai tibum are Tauro. Ao i rarikin anne, ko na am'aam'arake i rarikiu n au taibora.”
8E a manga bobaraaki riki Mebiboteta ao e taku, “E aera ngkai ko tabeakinai? E manena riki te kamea ae e mate nako iu.”
9Ao e wetea Tiba are mataniwiia ana taani m'akuri Tauro ao e taku, “N na angan Mebiboteta b'aai ni kabane ake ana b'ai am toka are Tauro ma ana utu ngkai bon tibun Tauro Mebiboteta.
10Ko na m'akuri ngkoe ma natim m'aane ake tengaun ma niiman i bukin Mebiboteta. Kam na unika te aba ma n uoti uaana nakoina, b'a a aonga n reke kanaia ana utu ma ana taani m'akuri Tauro. Ma e na am'aam'arake Mebiboteta ma ngai n au taibora.”
11Ao e kaeka Tiba ni kaangai, “N na karaoi b'aai ni kabane akana ko taekin teuae ko karineaki.”
12Ma ngaia are, a m'akuri ana utu Tiba i bukin Mebiboteta.
13E m'auku Mebiboteta, ma e a maeka i Ierutarem ao e am'aam'arake man ana taibora Tawita, kaanga aroia oin natin Tawita. Ao e a reke oin natina, ae arana Mika.
Who We AreWhat We EelieveWhat We Do
2025 by iamachristian.org,Inc All rights reserved.
