Taian Areru 27 - Kiribati New Version Bible

(Ana Areru Tawita)Te Tataro n Nebo

1Bon ootau ma au tia kamaiu te UEA;

Akea ae N na makua.

Bon nneu ni kamanoai te UEA man taiani kanganga nako;

N na bon aki maaku.

2Ngke a eekainako aiau ma ni kataia ni kani kamateai,

Ao a na bon tae aia kai mani b'aka.

3E ngae ngkana I otab'aniniaki n te taanga ni buaka ae korakora,

ma N na bon aki maaku;

e ngae ngkana a buakanai aiau,

ma n na bon teimatoa n onimakina Atuau.

4Teuana te b'ai ae I butia iai te UEA,

ae te b'ai ae I tangiria:

b'a N na maeka n ana auti ni kabanea bongini maiu,

ni mamatakuakina kamimiin raoiroina,

Ao ni bubutiia ana kairiiri.

5E na kawakinai ni kamanoai man te kaangaanga

i nanon ana Tembora,

ao E katokaai i aon te b'a ae rietaata ae N na maiu iai.

6Ma ngaia ae N na tokanikai i aoia aiau aika otab'aniniai.

N na angakarea i nanon ana um'antabu ma te b'ana ni kim'areirei;

N na anene ni kamoamoa te UEA.

7Te UEA, ongo irou ngkana I weteiko;

Nanoangaai ao kaekaai!

8E tuangai nanou b'a N na tataro.

E ingainga nanou ni kan nora matam,

9Ma ngaia ae tai karabako mairou.

Ngai ae am Toro, te UEA

Ko a tia ni buokai;

Tai kitanai, tai taeanibai nako mai rou,

Ngkoe ae te Atua,

ae au Tia Kamaiu.

10Tao a kona ni kitanai tamau ma tinau,

ma E na m'aneai n akoai te UEA.

11Te UEA, reireiai te b'ai ae Ko tangiria b'a N na karaoia,

ao kairiirai n te kawai ae e raoiroi,

b'a a bati taan ribaai.

12Tai kariaia b'a a na karaoa ae a

tangiria nako iu:

b'a a karaoa ae kewe ibuku aomata

ma n taetae n iowawa n eekainako.

13I kakoaua b'a N na aki mate i

m'ain ae I nora raoiroin te UEA n te maiu aei.

14Ko na kaantaninga te UEA,

Ko na korakora ma n ninikoria;

Ko na kaantaninga te UEA.