Itaia 38 - Kiribati New Version Bible

Kurini Maten Etekia N Te Aoraki(2 Uea 20.1-11; 2 Rongo 32.24-26)

1Ni bon te tai naba anne, ao e a aoraki Etekia ao e a kani mate. Ma ngaia are, I a nakoina ao I taku, “E taku te UEA b'a ko na aki marurung. Ko nang mate, ma ngaia are, ko a riai ni karaoi m'akuri aika a kainanoaki aika a riai ni katiaaki.”

2Ao e rairaki nakon te oo Etekia ao e tataro ni kaangai,

3“Ko na aki m'aninga ae I a tia ni kakaonimaki nakoim. I a tia ni ongotaeka iroum ma nanou ni kabane, ao I karaoi b'aai nako aika ko taku b'a a eti.” Ao i mwiin aei, e a tang n takaarua.

4Ao i mwiina, e a kanakoa te rongorongo te UEA nako iu

5i bukin Etekia ae e kaangai:

Bon te UEA Ngai ae te Atua, ae I taataromauriaki iroun am bakatibu are Tawita, I a tia n ongo am tataro, ao I nooriko ngke ko tang. N na kamaiuko riki i nanon tebwi ma nimaua te ririki,

6ao N na kaawakiniko ma te kaawa aei mai roun uean Aturia.

7Ao ngkai N na kakoauaa raoi nakoim b'a N na bon kakoroa raoi nanon au berita.

8Ko noori nuun te b'akantaai i aon a na kaintam'arake te uea are Aati? N na manga karaoi taian nuu aikai b'a a na manga okirikaaki tebwiina te euta ni wae.

Ao ane e na okirikaaki te nuu tebwiina te euta ni wae. Ana Anene N Nebo Etekia

9Aio te b'ai are e koreia Etekia ngke e a marurung:

10I taku ngai b'a N nang mate

i nanon au bong n rorobuaka

ma ni kabureaki n akea au tai

i abaia maate.

11I taku ngai b'a N na aki manga

oki n nooriko, au UEA,

ke aomata nako

aika a maeka n te aonnaba aei.

12E anaaki mairou maiu

kaanga te autinrianna ae e kab'araaki ma ni uotaki nako

iroun te tia kaawakintiibu.

Ko koreai kaanga karain te kunnikai

man te b'aini karao kunnikai mai roun te tia raranga kunnikai;

ko urubekeai

n te bong ao te ngaina.

13Ni karokoa te ingaabong are i mwiina, I taku ngai

b'a ko nang kamanti riiu

kaanga te raian ae e rangi ni baki;

ko urubekeai

14I tang n ai aron te tuwaaro;

I tanginiwenei n ai aron te taobe.

A uraura matau

i bukin kakaaeam, te UEA.

I a tira.

Taiaoka nakomai buokai.

E a oneaki maiu nakon ae e maai;

N na aki nakonako raoi ni karokoa mateu.

15Bon akea te b'ai ae I konaa n taekinna

ni kaekako,

i bukina ngkoe ae ko karaoi

baikai nako iu.

E a oneaki maiu nakon ae e maai;

ao N na aki nakonako raoi ni karokoa mateu.

16E uota te maiu nako iu aomata nako

am taeka ma am m'akuri,

ao ngai naba.

I butiiko b'a ko na manga kamarurungai

ao ni kakorakoraai.

17A roko taai aika a matoatoa n aron aikai

i bukin iangoan arou.

Ma e kaawakinai am tangira

man te kabuanib'ai i nanon te m'anono ae e nano,

ao Ko aki kubari

au bure nako.

18Bon akea temanna ae e konaa ni kaaitauko

mai buakoia ake a mena i abaia maate

ke n neboiko;

akea mai nanon te m'anono ae e nano aei

ae e konaa ni kaantaningaiko

b'a ko na kaota nakoina

aron am kakaonimaki.

19Bon ti aomata aika a konaa ni karab'ako,

n aron ae I karaoia n te bong aei.

Rooro nako a na kaongoia te roro ake i mwiia

aron am kakaonimaki.

20Ko na kamaiuai, Ngkoe te UEA,

ao ni kabane ara bong ni maiu

ti na anene i nanon am Tembora

n taian b'ainikatangitang

aika taiani karai.

Ana Taeka N Reirei Itaia Nakon Etekia

21I tuanga ana tia m'akuri te uea are Etekia b'a e na kaaki tabeua taiani biiku aika a kamantaki i nanon manekan Etekia, ao ane e na marurung.

22Ao i mwiina, e a kakaaea te kakoaua Etekia b'a e na manga taromauri n ana Tembora te UEA.