Iobi 23 - Kiribati New Version Bible

Ana kaeka Iobi nakon Eribati.

1Ao e taku Iobi,

2“I bon teimatoa naba ni kaaitaraa te Atua,

ma ni kauntaeka nako Ina.

I bon aki kona ni katoka ngurengureu.

3Tera ngke I ata te tabo ike E mena iai,

N na kona iai n roko n te tabo are E mena iai.

4B'a N na kaoti ngurengureu i matana,

ma n tabeki tangiu ni kabane nako Ina.

5Ao n te aro anne,

ao E na taetae nako iu, ao N na atai ana taeka.

6E koaua b'a E na kabanea korakorana ni kaaitaraai?

E aki, ma E na bon ongora nakon te b'ai ae N na taekinna.

7Ngkana e roko te tai arei, ao E na bon ongora ni ngurengureu ngkai bon te aomata ngai ae I b'ab'aina te eti;

ao au tia motikitaeka ae te Atua, E na anganai te inaomata ae akea tokina,

ao E na katanoataai b'a te aomata ngai ae akea ana bure.

8I a tia ni kakae i mainiku, ma bon akea te Atua ikekei;

ao I bon aki kunea naba ngke I kakaae i maeao.

9E a tia ni m'akuri te Atua i meang, ao i mainiku,

ma I bon tuai naba man nooria.

10Ma e ngae n anne, ao E atai m'anekau ni kabane te Atua;

ao ngkana E kataai, ao E na bon kakoauaai b'a bon akea au bure.

11I toui m'anekana ni kabane,

ao I tuai man rairakinako mai iai.

12I karaoi Ana mwioko ni kabane

ake E tuangai b'a N na karaoi.

13E aki kona ni bitaki; bon akea ae kona n rairia,

ke ni katokia man karaoan te b'ai are E tangiria

14 E na bon kakoroa bukin te b'ai ae E iangoia i buku;

are bon teuana mai buakon Ana iango.

15I ruru ni maaku i matana, ao ngkana I karaua ni iangoa te Atua,

ao I onrake n te maaku.

16E a tia n urua ninikoriau te Atua ae m'aaka,

17ao I kainaki i nanon te ianroo,

ao e rabuna matau te rotongitong.