Taeka n Rabakau 22 - Kiribati New Version Bible

Boonganan Te Aroaro ae e Raoiroi

1E kakaawaki riki

te aroaro ae e raoiroi ao te karineaki

nakon te tirewa ma te koora.

2A kaai ni karikaki

iroun te UEA

te kaub'ai ma te kainano.

3Ngkana kam noora te kangaanga ae e roko

ao tai nanobaba

ni m'ananga ni kainetia

kaiangoraoiko ao karabako mai iai.

4Karinea te UEA ao m'akuri i bukina!

Kam na anganaki te kaub'ai, teimatoan te maiu,

ao te karineaki b'a kaniwangami

5E m'ananga i nanon te kawai te aomata ae te tia kewe

ao e onrake n taiani b'ai ni kam'ane aika a kateketeke.

Kararoako mai iai!

6Reireiniia natim

ae e raoiroi,

ao ane a na teimatoa n kaakaraoa ae e raoiroi

ngkana a ikawai.

7A tautaekanaki aika a kainano irouia aika a kaub'ai,

bon taian toro irouia taan kataarau,

aomata aika taan tangob'ai.

8A reereke n te kangaanga taani kakiriwe,

ao a tiotionako

i bukin buakakan nanorietaia.

9E kakab'aiaia aomata nako te UEA

akana a anga te am'arake n akea boona

nakoia aomata aika a maiu ni kainano.

10A na manga roko n tokiia

te ngurengure ma te un,

ngkana kam kakioia nako

aomata aika a kauniia tem'angina.

11Bon raoraoia aomata ni kabane

aika a raoiroi

aika a taetae n akoi te uea.

12E tarataraia aomata nako

aika a iangoraoi te UEA,

ma e aki kakoroi aia babaaire

taani kam'anea te aba aika taani kewe.

13Tai taningaroti n te aro are ko na kaangai,

“I a aki nako ni m'akuri n au buakonikai b'a e kaawa ni kanai te raian!”

14Ti te bo ana taeka te aine ae e buakaka

ma te m'anono ae e nano;

kam na b'aka nako nanona

ngkana kam kauna te UEA.

15A bane n nanobaba naati

ma e na kawanawanaia

kaetakiia ae e matoa.

16Kam ruuti ngkana

kam kewea te aomata ae e maiu ni kainano

ke kam anga te b'aintangira nakon te kaub'ai.

Taeka N Rabakau aika Tenibwi

17Aikai taian taeka n rabakau tabeua

mairouia aomata aika a wanawana,

ma ngaia ae kakauongo raoi nako iai

ngkana I reireiningkami.

18Kam na boni kukurei

b'a kam atai taian taeka n rabakau aikai

ao kam a konaa n taekin man ami ururing.

19I reireiniia n te bong aei,

b'a a aonga

n onimakina te UEA.

20I a tia ni koroi tenibwi taian taeka n rabakau

aika a on n taeka n reirei aika a tamaroa.

21Kam konaa n onimakiniia

b'a ngaia aika a na anganiko taeka aika a eti

nakoia akana a tabeakiniko.

Te Moan Taetae

22Kam na aki karekea aromi

mairoun ae e maiu ni kainano

ke ni kam'aneia n te kabowi.

23Bon te UEA te tia tei i bukiia,

ao te b'ai are kam karaoia nakoia,

e na manga karaoia nakoimi.

Te Kauoua n Taetae

24Kam na tai iraorao ma aomata

aika a nanorieta.

25Kam na manga katotoongia

ma n reke n te b'ainikam'ane.

Te Katenua n Taetae

26Kam na aki anga ami b'ai teuana

i bukin kab'araan ana taarau te aomata temanna.

27E na bua ami kainiwene

ngkana akea ami m'ane.

Kaua n Taetae

28Kam na tai kam'ainga te tia

are e a tia ni kaweneaki irouia ami bakatibu.

Kanimaua n Taetae

29Ngkana kam karaoa raoi ami m'akuri,

ao kam bon m'akuri iai i bukin te tia tautaeka

ao kam na bon aki manga riki b'a te toro.