Taeka n Rabakau 25 - Kiribati New Version Bible

Ana Taeka Riki Toromon Tabeua

1Aikai riki tabeua

ana taeka n rabakau Toromon.

A karekeaki katotoia irouia ana mataniwi

uean Iuta are Etekia.

2E neboaki te Atua

i bukin arona ni kamimii;

a neboaki taan tautaeka

i bukin kab'arab'araan taiani kamimii.

3Antai ae e konaa raoi n ataa

ana iango te tia tautaeka?

A rooti tinanikun karawa

ao a ruorikaaki nako kabin aonnaba.

4A riai ni kaitiakaki taian tirewa

i m'aain kamanenakiia

ni karaoaki iai b'aai aika a boongana.

5A riai ni kanakoaki aomata aika a buakaka

i m'aain ae e tautaeka ma te eti

te aomata temanna.

6Ko na aki kataia n rangi n taraa ni kakannato

ngkana ko tei i matan tia tautaeka.

7E raoiroi riki iroun te tia tautaeka

b'a e na katokaa riki nakoam

nakon ae ko na kamamaaeaki

i mataia ana mataniwi te uea.

Kakoaua raoi b'a ko bon eti

8i m'aain ae ko katea temanna n te bowi,

b'a ko rawa ni konaaki

ao ko kamaamaaeaki.

9Ngkana ko aki konaa ni boraoi n ami iango

ma raom temanna,

ao tai kabuakaka ana iango raom.

10Ane e na kuneaki irouia tabem'aang

ao e na bua

aomatam iai.

11Taekinan te taeka ae e eti

n taina ae e riai

kaanga ai aron te koora ae e tamaroa

ae e nneaki n te tirewa.

12E raoiroi riki te ongora

n taeka n reirei

nakon taiani b'ai ni katamaroa aika koora.

13Kaanga ai aron raoiroin te ran

ae e m'aitoro n tain te kabuebue

te tia uarongorongo ae e kakaonimaki.

14E buakaka riki te berita ae e uruaki

nakon te nangi ni karau

ae e aki uota te karau.

15E konaa n anaaki nanon te tia tautaeka

ao ni katoka te kangaanga

te taeka ae e taotaonaki n nano man tamaroa.

16E konaa ni kaorakiko kanakin

ana karewe te manibeeru ae e rangi ni m'aiti.

17Tai kabatia rokom n aia auti raoraom,

b'a ane a na kua iroum

mani manga moana ribaakim.

18Bukinaia raom

boni kaanga ewekaia

ma taian ambo ao kabaang

ao kainikatebe aika a kakang.

19Te rao ae ko aki konaa n onimakinna

i nanon tain te kangaanga

boni kaanga te maraki ni m'aka ni wii

ke te ikoaki ni wae.

20Te anene nakon temanna ae e rangi ni rawaawata

kaanga ai aron

kab'aroan te beneka

n te ikoaki ae e tangaina matana.

21Anganiia kanaia am kairiribai,

ngkana a baki.

Anganiia

nimaia

ngkana a taka.

22B'a kanga ti te bo

ma ikoikotan m'akaro n ai

i aon atuuia.

Ao ane e na anganiko

kaniwangam te UEA.

23Ngkai e bon waaki te karau

mai meang,

ao ai aron naba taeka aika a buakaka

b'a a nako man te maraki n nano.

24E raoiroi riki te mena i tinaniku

i taubukin te auti,

nakon te maeka

ma te ainenum'a ae e meremere n taai nako.

25Te rongorongo ae e raoiroi mai kiraroa

e karekea te marurung kaanga ai

te ran ae e m'aitoro ngkana ko taka.

26Kaanga ai aron karenakoan te maange

i nanon te karaanga n ran ae e itiaki

te aomata ae e raoiroi ae e kauka te kawai

nakoia aomata aika a buakaka.

27Tai kabatia kanakin ana karewe te manibeeru

ke n tangira te neboaki n taai nako.

28Te aki taotaonaki n nano

e na katikuko ma te aki konab'ai

kaanga te kaawa ae e buubura ae akea oona.