Te Otinako 35 - Kiribati New Version Bible

Tuan Te Taabati

1Ao e weteia Iteraera Moote ao e tuangiia te b'ai are E taekinna te UEA:

2Onobong ami bong ni m'akuri. Ma kam na tabua te bong ae te kaitiua ni bong b'a au b'ai, Ngai ae te UEA, b'a te bong ni motirawa. A na tiringaki aomata akana a m'akuri n te Taabati.

3Kam na aki kaura ain kanami ni mwengami n te Taabati.

Te Angab'ai i bukin te Um'antabunrianna(Te Oti 25.1-9; 35.10-19)

4Ao e tuangiia Iteraera Moote te b'ai are E a tia n taekinna te UEA:

5N na butim'aai taian angab'ai mairouia aomata nako akana a tangiria n anga te b'ai teuana. Kam konaa n uoti mai taiani koora, tirewa, ke te buraonti;

6te buraentiibu ae e buru, ae e uraro, ke e uraura; te riinen ae e tamaroa; buraen te kooti;

7kunin te tiibu mm'aane ae e a tia n taawaaki ke te kunniman ae e tamaroa; te kai te aketia;

8b'aan te oriwa i bukin te taura; taian b'ai ni kaboiarara i bukin te b'aa ni katabutabu ao te b'ai ni kaboiarara are e kaakabubuaki; ke

9atiibu aika oniki, ke atiibu ake tabeua ake a tamaroa i bukin te raburabu ao te ub'a.

10Ngkana iai ami konab'ai, ao kam na kamanenai ni i buobuoki nakon te mwioko are I a tia n anga:

11E na riai te Um'antabunrianna n rabun taian uki, ma kaai, kaini kamatoa, ao bouana ma kainteina nako;

12te Atiniberita ma kainamona, te tabo n akoi, ao te keeten are i matana;

13te taibora ma b'aai nako ake a mena i aona, n reitaki ma te kariki are e tabu;

14te tiibu te ataei ma b'aina nako ao te b'aa;

15te baonikarea i bukin te b'ai ni kaboiarara are e kaakabubuaki; te b'aa ni katabutabu; keetenin mataroan te rin nakon te Um'antabunrianna;

16te baonikarea i bukin te angakarea ma warawarana te buraonti, kainamoana, ma b'aina nako; te boora are e buubura are te buraonti ma kainteina;

17taian keeten ma taian boua ao taian kaintei ake a katobibia te katawanang;

18taiani beke ma taian roobu i bukin te auti n rianna ao te katawanang;

19ao kunnikaia ibonga are a karauaki raoi ni karaoaki i bukin Aaron ao natina mm'aane.

Taiani B'aintangira Nakon te UEA

20Ao e bane ana taeka Moote ao a bane n taonnako aomata.

21Ao i mwiin arei, a roko koraki ake a tangiria n anga aia b'aintangira nakon te UEA, ao a uoti b'a a na kamanenaaki i bukin te Um'antabunrianna, taian taromauri, ao kunnikaia ibonga.

22Ao a roko mm'aane ma aine ma te kukurei ao a anga taian b'ainikatamaaroa n aekaia nako n aron taian biin, taabia, taian m'am'a, ao taian m'ae n roroa.

23Ao a bane aomata ni uota aia burae n tiibu aika a buru, uraro, ao a uraura, aia riinen ae e tamaroa, ao kunnikaia aika a karaoaki man buraen te kooti, ao ai uana naba ma kunin te tiibu te ataei ae e kaurauraaki ao aia kunnikai ae tamaroa.

24Ao a bane aomata nako ake iai aia tirewa ke te buraonti ke te kai te aketia n uoti b'a aia b'aintangira nakon te UEA.

25Ao a uoti aia kunnikai aine aika rangin rabakau n raranga kunnikai ni uoti aia kunnikai aika buraen te tiibu aika a buru, a uraro, ao a uraura ao taian riinen aika a tia ni karaoi.

26Ao a rangi ni kukurei ni karaoi kunnikai aine ake a rabakau aron karaoan kunnikai man buraen te kooti.

27Ao a uoti taian b'ainikatamaaroa n aroia nako taani kairiiri b'a a na kanim'aki i aon kunnikaia ma aia ub'a ibonga aika a rietaata.

28A bon uoti naba taian b'ai ni kaboiarara aika raoiroi boia b'a a na renganaki ma te b'ai ni kaboiarara are e kaakabubuaki ao b'aan te oriwa i bukin taian taura ao i bukin naba katabuaia ibonga.

29Ao e a tia Moote n tuangiia aomata te b'ai are E tangiriia te UEA b'a a na karaoia, ao angiia mai buakoia a baaireia b'a a na uoti aia b'aintangira.

Betarera ao Ooriaba(Te Oti 31.1-11)

30Ao e taku Moote nakoia Iteraera:

E a tia te UEA n rinea Betarera man barongan Iuta.

31E aki ti kaonna te UEA n Tamneina,

32ma e a tia naba n anganna wanawanana ma ni karikia b'a te tia karaob'ai ae e m'aatai

33ae e konaa ni karaoi taian korobanna man te koora, te tirewa, te buraonti, te atiibu, ao te kai.

34E kawaekoaa Betarera ma Ooriaba man te baronga are Taan b'a a na reireiniia ake tekorakina.

35Ao e a tia n anganiia te rabakau ni kabane ae te korobanna, n reitaki ma te rabakau ni korotamnei ao katamaroa n te karai ae e buru, ae e uraro, ao buraen te tiibu ae e uraura ao n rarangaia naba n te riinen ae e tamaroa.