Itaia 55 - Kiribati New Version Bible

Ana Kakao Te UEA

1Nakomai mooi n te ran

ngkana ko taka!

Nakomai kana te b'ai ae ko kan kanna,

ngkana akea am m'ane!

Mooi n te wain ao te miriki

ae akea boona.

2E aera ngkai ko bakataea am m'ane

i aoni b'aai aika tiaki raoi taian am'arake?

E aera ngkai ko m'akuri korakora i bukin b'aai

aika a aki konaa n anganiko te rau n nano?

Kakauongo raoi irou

ao ane ko na kukurei

ni kana te am'arake aika kabanea ni kangkang.

3Kakauongo raoi!

Nakomai nako iu ao ko na maiu.

N na berita nakoim i bukin

te tangira ae akea tokina ao te kakaonimaki

n aron are I berita iai naba nakon Tawita.

4I karikia b'a te tia kairiiri ao te tia tautaeka

i aoia botannaomata nako;

ao bon ngaia au tia kakoaua nakoia.

5Ko na weewete nakoia botannaomata nako

aika a tuai ni kinaaki.

Ao ko tuai naba ni kinaia,

ma ane a na biribiri n roko

i bukina ngke bon te UEA Ngai,

ae Atuaia Iteraera ae e tabu,

ao I a tia ni karineko.

A M'aaka Ana Taeka Te UEA

6Rairaki nakon te UEA!

E boni konaa naba n reke.

Weewetea te Atua! E kaan.

7Kaaki kawaim nako aika b'aoua

ao am iango aika a buakaka.

Okira te UEA ae Atuara.

E na nanoangaiko

ao ane E na kab'arai am bure nako.

8E taku te UEA:

“Tiaki ti te arona au iango ma arou nako

ma ngkoe.

9A rietaata riki au iango ma arou nako

nakoim

kaanga taiani karawa

ngkai a rietaata riki nakon te aonnaba.

10“E b'aka te karau ma te tinoo mai karawa.

Ma a aki konaa n oki

ngkana a aki teboka te aonnaba

are e kariki taian Atiniberita i bukin bwebwen aroka

ao te uita i bukin te am'arake.

11Ao ai anne naba aron au taeka nako.

A aki konaa n okirai

ngkana a aki karaoa te b'ai are I kanakoia iai b'a a na karaoia.”

A Na Karaoa Aia Bootaki Ni Kukurei Ana Aomata Te Atua

12Kam na karaoa ami bootaki ni kukurei,

ngkana kam a kainaomataaki

ma ni m'ananga n okiri ami auti ma te rau.

Ane a na anene taiani maunga ao taian tabuki

ngkana kam rirarikiia,

ao ane a na uboubo taian aroka.

13Ane a na maiu taiani m'aiango ao taian motere

i nanon taian tawaana

ngkoa ake a onrake n taiani kai aika a kateketeke.

Ao ane a na tei ni maiu aroka aikai

b'a taian kabane nikira ni maiu aika taani kakoaua

mimitongin te UEA.