Etekiera 20 - Kiribati New Version Bible

E Teimatoa Ni Kamangao Iteraera

1Itiua te ririki i mwiin te uea are Ieoiakin ao ti a bane ngaira ni kairaki nako B'aburon b'a taenikai, a roko irou tabeman taani kairiiri mai Iteraera n katebwinan bongin te kanimaua n nam'akaina. A tekateka ao a buubutiai b'a N na kaongoia ana rongorongo te UEA.

2Ao ni bon te tai arei E taku te UEA ae te Atua:

3Etekiera ae natin te aomata, a roko taani kairiiri aikai b'a a na kakaaea te b'ai ae I tangiria b'a a na karaoia. Ma ngkai I bon maiu, N na aki anganiia te kaeka teuana.

4Ko tangiria ni kauringiia, Etekiera? Ao kauringiia n aia bure aika a rangi n ribaaki ake a karaoi aia bakatibu.

5Tuangiia b'a n taai ake ngkoa Ngai ae te UEA ae te Atua, I rineia Iteraera b'a a na riki b'a au b'ai. Ao I kaoti nakoia aia bakatibu i Aikubita ao I karaoa te berita ae e matoa b'a N na riki b'a Atuaia ao Atuaia aia kariki nako.

6I tuea b'a N na kamaiuia mai Aikubita ma ni kairiia nakon te aba are I a kaman rineia. E mari te aba n te miriki ao ana karewe te manibeeru ao bon te aba ae te kabanea n tamaroa.

7I tuangiia b'a a na kaaki aia bouannanti aika a rangi n ribaaki ao a na aki manga bure n taromauriia antiia kaain Aikubita. I kauringiia b'a bon te UEA Ngai ae Atuaia,

8ma a bon kamangao naba nako iu. A rawa n ongo ao a teimatoa n taromauriia taiani bouannanti ao antiia ianena.

Ao I baaireia b'a N na katuaaia Iteraera i Aikubita i bukin marakin nanou.

9Ma I taraa n ae I a tia ni kewe i bukina ngke I a tia n berita i mataia ni kabane b'a N na kairiia ni kaotinakoia mai Aikubita.

10Ma ngaia are, I kaotinakoia ao I kairiia nakon te rereua.

11I anganiia au Tua ma au Reirei, b'a a aonga n ataa aron maiuia ae e raoiroi.

12Ao I tuangiia b'a a na karinea te bong ae te Taabati b'a kanikinaeana b'a a tabu b'a Au b'ai.

13Ma a kakaitaraai Iteraera i nanon te rereua. A rawa n iri nanon au Tua ma au Reirei nako, ao a karaoa te Taabati b'a kaanga te bong n aki akaaka.

Ao I a baaireia b'a N na kamaunaia Iteraera n te rereua ae Au moan tai ni kamaunaia ao ai Au kabanea naba.

14Ma N na bon ngareakiniia iai, i bukina b'a a tia n noorai botannaomata aika a bati ni kaotinakoia Iteraera mai Aikubita.

15I aki karaoa anne ma I a tuangiia n te rereua b'a N na kairiia nakon te aba ae e tamaroa, te aba ae e maiu reirei are I a tia ni berita iai nako ia.

16I taekina aei i bukina ngke a aki ti katinanikui au Tua ma au Reirei, ma a kamatauningaa naba au Taabati ao a taromaurii taiani bouannanti.

17Ma e ngae n anne ao I bon aki kariaia b'a a na mate i nanon te rereua.

18Ma ngaia are, I kauringiia ataei b'a a na aki karaoa aron are a karaoia aia karo ke ni katotoong aia m'akuri aika a buakaka ke n taromauria aia bouannanti nako.

19I kauringiia b'a bon aia UEA Ngai ae Atuaia ai ngaia are a riai n iri nanon au Tua ma au Reirei nako.

20I tuangiia b'a a na karinea Au Taabati ni kaotia b'a Au aomata ngaiia ao Ngai aia UEA ae Atuaia.

21Ma a bon kamangao naba naati nako iu. A rawa n iri nanon au Tua ma au Reirei nako, ao a karaoa te Taabati b'a kaanga te bong n aki akaaka.

E a rangi ni maraki nanou ao I a baaireia b'a N na katuaaia i nanon te rereua.

22Ma I bon aki. B'a N na bon ngareakinaki iai irouia botannaomata nako ake a tia n noorai ni kaotinakoia mai Aikubita.

23Ai ngaia are I karaoa Au tuea ae e matoa b'a N na kamaaenikuniia Iteraera nakoia botannaomata nako,

24i bukina b'a a tia n aki iri nanon au Tua ao a katinanikui au Reirei nako; a kamatauningaa Au Taabati ao a taromauri taiani bouannanti ake karaoaki irouia aia bakatibu.

25I anganiia taian tua ake a uota te rekenikai ao tiaki te maiu,

26ao I kariaia b'a a na anga nako iu taiani karea aika a aki kariaiakaki, n reitaki ma naati m'aane ake taiani karimoa. I karaoa aei b'a N na kakamaakuia b'a a na ataia b'a boni Ngai ae te UEA ae I katuaaia.

27Etekiera, ko na tuangiia Iteraera b'a a bon katinanikuai ma ni kamarakai

28ngke a anga karea ni kaboiarara, ao te wain nakoia anti i aon te tabuki ao i aan aroka aika korakora. I bon rangi n un, i bukina b'a a karaoi b'aai aikai n te aba are I a tia n anganiia!

29I titirakiniia b'a a taromaurii anti aikai ia, ao a kaeka ni kaangai, “Ni baangotan te aba.” Ao a bon aranaki naba ngkai taabo aikai b'a taiani baangota.

30Ao i mwiina, ko na titirakiniia Iteraera b'a e aera ngkai a katotoong aia m'akuri aia bakatibu aika a buakaka

31b'a a manga taromauri bouannanti ao a anga oin natiia b'a taiani karea. A karaoi taiani bure aikai ao a bon teimatoa naba ni kaantaningaia b'a a bon konaa n bubutiai te rongorongo b'a N na kaotia nakoia. Ngkai bon te UEA ae te Atua Ngai ae I maiu, ao N na bon aki anganiia te kaeka.

32Tao a taku b'a a konaa ni katotoongia aroia botannaomata ake tekorakina ni waakina aroia i bon irouia n taromauri taiani bouannanti aika a karaoaki n taiani kai ma atiibu. Ma bon anne te b'ai ae e na riki!

Ana Berita Te UEA

B'a E Na Manga Kaoka Aron IteraeraE taku te UEA nakoia Iteraera:

33Ngkai I bon maiu Ngai ae te UEA ae te Atua, ao N na bon tautaekaningkami ni baiu ae e korakora. Kam na namakina korakoran uniu

34ao m'aakau, ngkana I boobotingkami man taabo ake kam uamaae nako iai

35ma ni kairingkami nakon te rereua ae e katobibiaki irouia botannaomata. N na kaaitibo ma n itaramata ma ngkami. Ao i mwiin anne, N na anganingkami motikan taekami

36ma katuaaeakimi, n aron are I katuaaia naba ami bakatibu i nanon te rereua i rarikin Aikubita.

37N na kairoroingkami n tatabemaningkami b'a kam na iri taiani kainibaaire n ara booraraoi ae e matoa.

38N na kaokoroia taani bure aika taani kamangao maibuakomi, e ngae ngkana N na kaokiia mai buakoia botannaomata nako ake a maeka b'a taenikai iai ngaiia, a na aki kariaiakaki b'a a na okira Iteraera. Ao i mwiina, ane ko na ataia b'a bon te UEA Ngai.

39Waaki nako n taromauria ami bouannanti n te tai aei, ngkoe ae Iteraera, b'a N nang karaoiko b'a ko na aki karineai n te tai ae e aki maan b'a ko nang anga b'aintangira nakoia.

40ngkana e roko te bong anne, a na bane n taromauriai Iteraera i aon te Maunga are Tion, are Au maunga are e tabu i Ierutarem. N na manga atongingkami riki b'a Au b'ai, ao N na manga butim'aai ami angab'ai ma ami karea nako.

41Ngkana I kaokingkami man taabo ake kam uamaae nako iai, N na rangi ni kukurei iroumi, n ai aron kukureiu ni boiararan bubun ami karea. A na bane n nooria botannaomata nako n aonnaba b'a I tabu,

42ao kam na ataia b'a bon te UEA Ngai are I kaokingkami nako Iteraera, te aba are I berita iai nakoia ami bakatibu.

43Ao i mwiina, kam na uring ami bure aika a buakaka, ao kam na ribaingkami i bon iroumi i bukin karaoan b'aai aika a buakaka. A karaoingkami b'a kam na aki butim'aeaki irou,

44ma ngaia ae kam bon riai ni katuaaeaki. Ma N na karaoa nakoimi te b'ai ae e na reke iai karinean arau, ao kam na ataia b'a te UEA ae te Atua Ngai.

Te Ai Mai Maiaki

45E taku te UEA,

46Etekiera ae natin te aomata, rairaki nako maiaki ao kauringiia taiani buakonikai

47ake N na kaura ma ni kabuoki aroka ni kabane aika a mawaawa ma aika a m'au. Bon akea te b'ai ae e konaa ni katoka te ura n te aro are e na rakanako nako meaang ma ni kabuoki b'aai ake a mena i aon kawaina.

48A na bane n ataia aomata nako b'a bon Ngai ae I kaura, ao e bon aki konaa ni katokaki.”

49Ma I ngurengure, te UEA ae te Atua, I aki tangiria ni karaoa te b'ai anne! A taku aomata b'a I kamangaongaoiia n Au rongorongo nako.”