1-5Ao a iangoa rinean te tia kairiiri ae ninikoria ae Iebeta are natin Kireata taani kairiiri man te baronga are Kireata b'a e na kaira buakanaia kaain Ammon.
E ngae ngke boni kaain te kaainga are Kireata Iebeta, are a tia ni kanakoaki man te aono are a maeka iai. Bon natin ainen mataawa Iebeta, ma ai tarina nako bon natin buun tamana ma temanna.
Ao a taku nakoina ai tarina, Bon tiaki ngkoe raoi kaain ara utu, ma ngaia are, akea b'ain ara utu teuana ae ko na anganaki. Ao a tuangnga b'a e na kiitana te auti.
Ao e nakon te kaawa are Toba Iebeta, ao a iria aomata aika akea aroia i bukin iangoan te m'ane.
Ma ngaia are, a nako taani kairiiri mai Kireata ni kawara Iebeta ao a taku,
6Taiaoka ma ko na iriira n okira Kireata b'a ko na kairiira n te buaka b'a ti aonga ni buakaniia kaain Ammon.
7Ao e taku Iebeta, Ao e aera ngkoa ngke kam ribaai? Bon tiaki ngkami ngkoa ake kam kanakoai b'a N na kitaniia au utu? Ao kam a roko ngkai i bukina ngkai kam a taonaki n te kangaanga.
8Ao a taku taani kairiiri, Tiaki i bukin anne ma ngkana ko kairiira nakon te buaka, ao ti na karikiko b'a te tia tautaeka i Kireata.
9Ao e taku Iebeta, E raoiroi, ngkana I iringkami ao E karekea au tokanikai te UEA i aoia kaain Ammon, ao kam na bon karikai b'a ami tia tautaeka?
10Ao a taku taani kairiiri, Eng, bon ara taeka aikanne ao bon te tia kakoaua te UEA.
11Ao e nako Iebeta nako Mitib'a ma taani kairiiri mai Kireata. A bootaki kaain Kireata n tabo n taromauri ao a karika Iebeta b'a aia tia tautaeka. Ao e anga naba ana berita Iebeta nakoia.
12Ao i mwiin te bootaki, ao e kanakoa ana tia uarongorongo Iebeta nakon uean Ammon ma te rongorongo ae kaangai, Tera ae kam ukoukoria, kam ukoukora te buaka? Kam a tia ni buakana abau, ao I kan ongora b'a tera bukina?
13Ao e taku uean Ammon, Tuanga Iebeta b'a bon abau te aba aei, ni moa man te Karaanga are Arenon are i maiaki, nakon te Karaanga are Iaboka are i meang, ao nako maeaon te Karaanga are te Ioretan. Ao ngke a otinako Iteraera mai Aikubita, ao a iraea naba. Tuanga Iebeta b'a e na kaokia nako iu, ao a na akea te buaka.
14Ao e a manga kaoka ana taeka Iebeta nakon uean Ammon,
15ao a tuangnga ana taeka Iebeta ae kaangai:
Bon akea te aba ae anaia Iteraera mai rouia kaain Moaaba ma kaain Ammon.
16Ngke a roko Iteraera mai Aikubita, ao a m'ananga i nanon te rereua nakon Taari are Mate ao ni manga bo nako Kateti.
17Ao a kanakoa te rongorongo nakon uean Etom ao a taku, Taiaoka, ti na ri nanon abami. Ma e rawa uean Etom. A kanakoa naba te rongorongo nakon uean Moaaba, ma e rawa naba ni kariniia Iteraera. Ma ngaia are, a tiku Iteraera i Kateti.
18Ao tabeua te tai i mwiina, ao a m'ananga nako Iteraera nakon te rereua, n ri mainikun Etom ao Moaaba, ao a manga kaemb'a i mainikun te Karaanga are uarereke are Arenon. Bon tian Moaaba mai mainiku te Arenon, ao ngkai a aki ri nanona Iteraera, ao a bon aki roko naba n te toua tanon Moaaba.
19A kanakoa aia rongorongo Iteraera nakon uean Amora are Taion are maeka i Etibon ni kaangai, Taiaoka, kariaia ara aomata b'a a na ri nanon abami nakon abaia.
20Ao e aki kakoauaia Iteraera te uea are Taion, ao e botiia ana taanga ni buaka. Ao a kaemb'a i Iaati, ao i mwiiina, a buakana aia kaemb'a Iteraera.
21Ma E buokiia Iteraera te UEA ni kataenikaia Taion ma ana taanga ni buaka. Ao a bane n reke abaia kaain Amora ake a maeka iai ana aomata Taion irouia Iteraera,
22ni moa man te Karaanga are te Arenon are i maiaki nakon te Karaanga are Iaboka i meang, ao man te rereua are i mainikun te Karaanga are te Ioretan are i maeao.
23Ao a tuanga naba uean Ammon te b'ai are e taekin Iebeta are kaangai:
E buokiia ana Aomata te UEA ni kataenikaia kaain Amora ma n anai abaia. Ao ngkoe, ko taku ngkai b'a e na reke naba iroum te aba anne?
24Ngkana atuami Kemoti ao e taua te aba man anganingkami, e koaua b'a akea ami b'ai iai? Ma ngkana E anaa te aba anne te UEA ma n anganiira, ao bon abara!
25Ko boraoi ma B'araka are natin Tibore te m'aane? Bon uean Moaaba ngaia, ma e aki kan uneaki ma Iteraera ke ni buaka ma ngaira.
26A tia ni maeka Iteraera i Etibon ao Aroera ao ni kaawa aika uarereke ake i rarikiia, ma kaawa ake i mataniwiin karaangan te Arenon ae uarereke i nanon te maan ae 300 te ririki. E aera ngkai ko aki tataningaa te tai aei ni iangoa kaokakina ngkana ko taku b'a bon abam?
27Bon akea te kaairua ae I a tia ni karaoia nakoimi, ao e rangi ni kaairua ngkai ko a iangoa te buaka. I tataro nakon te UEA b'a E na kaotia b'a tao e eti Iteraera ke Ammon.
28Ma e aki tabeakina ana rongorongo Iebeta uean Ammon.
29Ao E niniia Iebeta Tamnein te UEA, ao e nako Iebeta n ri nuukan Kireata ma Manate, ma ni kateirakea te taanga ni buaka. Ao n tokina, e a roko i Mitib'a i Kireata, ike
30e berita iai nakon te UEA ni kaangai,
31N na anga b'a au karea nakoim te moani b'ai ane otinako ni kawarai
32ngkana Ko kataenikaia kaain Ammon ma ni kaokai nakon mwengau ma te maiu.
33Ao Iebeta ma ana taanga ni buaka a kataenikai 20 kaawa ake i marenan Aroera ma Minnita, ao tabeua riki ni karokoa Abera Keramim. Ao i mwiin anne, ao a aki manga kona ni buakaniia riki Iteraera kaain Ammon.
Natin Iebeta Te Aine34Ao ngke e a okira mwengana Iebeta i Mitib'a, ao te moan aomata are e otinako ni butim'aia bon natina te aine. E katanga te timbere, ao e b'ab'atere i bukin ana tokanikai tamana, ao bon ti ngaia natina.
35Ao e tang Iebeta, O, ao e raeuaaka kunnikaina i bukin rawawatana ao e taku nakon natina, I a tia ni berita nakon te UEA, ao I riai ni kakoroa bukina. Otinakom ni kawarai e bon riki b'a uruakin nanou.
36Ao e taku natina, Tamau, ko a tia ni berita nakon te UEA, ao E anganiko te tokanikai i aoia kaain Ammon. Ao ngkai ko riai ni kakoroa nanona, e aoria ngkana N na mate iai.
37Ma te moan b'ai moa, I bubutiiko b'a ko na kariaiakai b'a N na nako ma raoraou b'a ti na m'am'ananga n neweaba n aaba ake a tabukibuki b'a ti na kaai n tang b'a I a aki kona n iein ma ni karekea natiu.
38Ao e taku Iebeta, E na reke nakoim 2 te nam'akaina.
Ao e nako te ataeinaine ma ataeinaine tabeman ni m'am'ananga i aon aaba ake a tabukibuki i nanon 2 te nam'akaina, ao a tang i bukina b'a e a aki kona n iein ma ni karekeia natina.
39Ao i mwiina, e okira tamana, ao e karaoa te b'ai are a tia ni berita iai tamana, ao e aki iein te nati arei.
Ao bon anne bukina are
40a aki toki n nanakonako iai ainen Iteraera i nanon 4 te bong ma n tangitang ni katoa ririki.
Who We AreWhat We EelieveWhat We Do
2025 by iamachristian.org,Inc All rights reserved.
