Nakoaia Ibonga 25 - Kiribati New Version Bible

Te Kaitiua n Ririki(Te Tua 15.1-11)

1Ngke e mena Moote i aon te Maunga are Tinai, ao te UEA e tuangnga

2b'a e na kaangai nakoia Iteraera: Ngkana kam a tia n roko n te aba are N na anganingkami, ao e riai te motirawa teuana te ririki ni katoa itiua te ririki.

3Kam kona n unukii uita ma kureebe i nanon onoua te ririki,

4ma n te kaitiua n ririki kam na riai ni kamotirawai ami tawaana ma ami nne ni kureebe b'a karineakiu, ngai ae ami UEA.

5Aio bon tain te motirawa ae e b'anin i bukin ami tawaana ma ami nne ni kureebe, ma ngaia are, tai anai te naan uaa mai iai.

6E ngae n anne, ma ngkami ma ami toro ma ami taani m'akuri akana a tangoaki,

7n ikotaki ma ami man aika kawakawa akana a manana ma akana aki manana, a na am'arake man aroka aika bon riki i rouia.

Ririkin te Iubire

8E taku te UEA nakoia ana Aomata: Ni katoa abwi ma ruaiwa te ririki

9n te katebwina ni bong n te kaitiua n nam'akaina, ae te Bong ni Kab'arabure, a na katangaki te naa ni bu i aon te aba ni kabane.

10E tabu te kanimabwi n ririki, bon te tai n inaomata ma ni kukurei ngkae a nangi bane n oki oin aia b'ai aomata nako, ao tooro a nang okiri mwengaia n aia utu nako.

11Aei bon ririkin te kukurei ae kororaoi, ma ngaia are, tai ununiki ao tai rikoi uaanikai man ami tawaana ma ami nne ni kureebe.

12N tain te kukurei ae tabu aei kam na ti am'arake mani kaai ake a bon riki i rouia.

13N ririkin te Iubire aei, ao a riai ni bane n oki b'aai nakoia naake bon aia b'ai.

14Ma ngaia are, ngkana kam kabooa ni karekea ke tao kam kabooa nako te tabo n ununiki, baairea raoi boona ao tai babakanikawai.

15E na riai ni baireaki boona mani m'aitin te uaa are e na kona ni karekeaki mai iai i m'ain rokon Ririkin te Iubire are e na roko.

16Ngkana tao e rangi n ab'ab'aki te tai i m'ain rokon te Iubire anne, ao e na buubura boona, i bukina b'a te baere e kabooaki ni karekeaki bon te uaa are e na reke man te aba anne.

17Boni Ngai te UEA ae Atuami, ongotaeka i Rou ao tai kataia ni baabakanikawaiia tabeman.

18Ngkana kam ongotaeka nakon au tua nako ma au reirei, ao kam na maeka ma te rau n te aba,

19ao kam na kim'areirei ni uaana aika bati.

20Tai kataia n raraoma i bukin kanami i nanon te kaitiua n ririki ngkae kam ribaaki b'a kam na aki ununiki ma n tai iai.

21N na taraia raoi b'a kam na taiia ae e tau i nanon te kaonoua n ririki i bukin tenua te ririki.

22N te kawanua n ririki kam na marike man are kam taiia man te kaonoua n ririki, ao n te karuaiwa n ririki kam na am'arake man ake kam uniki ma n taiia man te kawanua n ririki.

23Akea te aba ae na kabooaki ni karekeaki raoi, ke ni kabooaki nako raoi. Abau ni kabane, tiaki abami, b'a kam ti maeka iai i nanon te tai ae e uarereke.

24Ngkana e na kaboonakoaki te aba, ao e riai n anganaki moa te tia b'aib'ai ni koaua iai b'a e na kabooa.

25Ngkana iai i buakomi Iteraera ae e maiu ni kainano ae e kairoroaki b'a e na kabooa nako abana, am koraki ni kaan ae na kabooa ni kaokia,

26ti ngkana iai ana m'ane. Ao rimwi riki, ngkana e a reke am m'ane ae ko kona ni kaokia iai.

27Ngkana e nang okiriko b'a ko nangi manga bon abanna, ao ko riai ni kab'aka nakon te aomata ane e mena i rouna ngkai abam anne, te m'aiti ae e na kaaitaraa m'aitin are e nang reke i rouna i m'ain rokon Ririkin te Iubire.

28Ma ngkana akea am m'ane ae ko kona ni kab'aka iai te m'aiti ae e tau nakon te tia abaaba, ao ko na tataninga ni karokoa rokon Ririkin te Iubire.

29Ngkana ko kabooa nako te auti ae e mena i nanon te kaawa ae e ooaki, ao bon ti teuana te ririki taina ae ko riai ni kabooa ni kaokia iai.

30Ngkana e bane teuana te ririki ao ko aki kabooa ni kaokia, ao e a riki naba b'a ai bon ana auti ni koaua te aomata are e kabooa ngkoa, ao e na aki okiriko n Ririkin te Iubire.

31Ma te auti ae e mena i tinanikun te kaawa, e kona ni kabooaki ni kaokaki n te tai n aki akaaka kanga ai aron te tawaana. Ao e riai ni kaokaki nakon te aomata are bon abana ni koaua n Ririkin te Iubire.

32Ngkana iai kanoan Rewi ae iai ana auti i nanon te kaawa ae ooaki, iai i rouna n taai nako te m'aaka ni kona ni kabooa ni kaokia.

33Ao aia auti aika aki kabooaki ni kaokaki i rouia, a na kaokaki n Ririkin te Iubire, i bukina b'a bon aia b'ai ni koaua i buakoia Iteraera.

34Akea taabo n uteute aika abaia kanoan Rewi ae e na kona ni kabooaki nako: bon abaia ni koaua.

Buokaia KainanoE taku te UEA:

35Ngkana iai i buakomi aika a kainano aika aki kona ni kamaiuia i bon i rouia, kam riai ni buokiia, n ai aron ae kam riai ni buokiia iruwa aika a maeka i buakomi.

36Tai karekeia b'a b'aai ni kareke raka n te aro are e na anaaki te bakao mai rouia, ke tao ni kabooa nako te am'arake nakoia ni karekea te raka iai.

37Kam na aki tangira rakan te m'ane are kam anga b'a e na taarauaki irouia aomata nako aika a maiu ni kainano, n ikotaki naba ma te am'arake are a kang.

38Uringnga, bon te UEA Ngai ae Atuami. I kamaiu ngkami mai Aikubita ao I anganingkami te aba are Kanaan, b'a I aonga n riki b'a Atuami.

39Aongkoa iai tabeman i buakoia ami koraki aika rangi ni kainano n te aro are a nang kabooia nako nako imi b'a tooro.

40Kam riai ni karikiia b'a taani m'akuri, ma tiaki tooro. N Ririkin te Iubire ao a na kainaomataaki,

41ma ngaia are, ngaiia ni ikotaki ma natiia a na oki nakoni mwengaia ma aia utu ao nakon naba aia b'ai.

42I kairiia mai Aikubita b'a au taani m'akuri, ma a na aki kabooaki nako b'a tooro.

43Ma ngaia are, ongotaeka i Rou, ao tai b'ainikiriniia aika a aki kaub'ai.

44Ngkana kam kani karekeia ami toro, kabooia man reeti ake tabeua

45ke mairouia iruwa akana a maeka n oin abami, ao karikiia b'a ami b'ai.

46Kam kona ni b'ainiia, ao kam kona naba ni katikuia irouia natimi ngkana kam mate, ma tai toroniia oin ami aomata, ke tao ni b'ainikiriniia.

47Ngkana tao iai i buakomi te Iteraera ae e rangi ni bati ana taarau n te aro ae nang kaboonakoa iai ngaia nakoia iruwa akana i aon abami,

48e kona ni kainaomataaki iroun ana koraki, n aron tao teuane tarina, ke teuane m'anena,

49ai tamana, ai m'anena, ai tarina, ke temanna riki ae kaain ana utu. Ma ngkana boni iai aia m'ane ae e tau m'aitina, ao e kona ni kabooa inaomatana iai.

50E riai ni kaaitibooa ma te aomata are e kabooia ngkoa, ao a na wareki ririki ake e moani kabooaki iai, ao ni bairea raoi naba booia iai ni kaineti ma m'aitin te ririki are i m'ain Ririkin te Iubire are e na roko.

51Ngkana ai ti tabeua te ririki i m'ain Ririkin te Iubire, ao e na m'aiti naba boona ae na kaokia.

52Maanin te tai boni m'aitin te m'ane ae na kab'aka.

53Ao ngkana e riki b'a te toro irouia iruwa i aon oin abana, a na taraia ana aomata b'a e na aki buraakiakonaki.

54Ngkana e a bon reke angan kainaomataakina man aanga aikai, ngaia ma natina a na kainaomataaki n Ririkin te Iubire.

55Iteraera, boni Ngai te UEA ae Atuami, ao I kaotinakoingkami mai Aikubita b'a au taani m'akuri ni koaua.