1Ao e taku Toob'a,
2Iobi, E aki rau nanou n am taeka,
ma ngaia ae N nang bon kaekako.
3Ko kabuakakaai n am taeka ni kawai,
ma I atai kaboan am karaki.
4Ko bon ataia b'a n taai ake ngkoa
ngke E moan karika te aomata te Atua i aonnaba,
5ao bon akea te aomata ae buakaka ae e kukurei n te tai ae maan.
6E ngae ngke e roota karawa
m'aakana ma kainikatongana,
7ma e na ukaki nako n ai aron te bubu.
Koraki ake a rangi n tataneiai ma ngaia ngkoa,
a na mimi b'a e ti bua nako naba.
8E na bua n ai aron te mii, kaanga te mii ae kakamaaku n te tairiki,
ao e na aki manga oki n nooraki.
9E na bua man te tabo are e bon mamaeka iai ngkoa.
10Ao natina a na kaoki
baike e kimoai tamaia
mai rouia aika kainano.
11E taneiai ni marurung rab'atana ngkoa ma ni maiureirei,
ma n te tai ae aki maan,
ao e na oneaki rab'atana nakon te bubu.
12E rangi ni kangkang i wiina te buakaka,
13n te aro are e karin i wiina tabeua ni kanreeni.
14Ma e a manga bitaki nakon te b'ai ae maai te am'arake are i nanon wiina,
kanga ai aron maain te b'ai ae kamamate.
15Ma E na karekea te anga te Atua are a na bua iai
taiani kaub'ai ake e kimoai.
16A na mate ni boitinin
te naeta ae kamamate.
17E na aki maiu ma n noori karaangan b'aan te oriwa,
ke taian raanga n ran ake e raanga iai te miriki ma ana karewe te manibeeru
18E riai ni kaoki b'aai ni kabane ake a tia n reke i rouna i m'aain ae na kamanenai;
e na bon aki reke te kukurei i rouna man b'aai akana e a tia ni karekei.
19I bukina b'a a karawawataia aomata ma n aki m'annanoia aika kainano,
ao a taui aia auti aomata.
20E aki kona ni ngae nanona ni mataai.
21Akea nikiran te am'arake ngkana e am'arake;
ma n te tai aei ao e a roko n tokina kaub'aina.
22Ane a na manga rabunna ana b'aikoraki,
ao ane e na taonaki n taian karawawata.
23Ke e kang b'aai nako akana e kani kang!
Ane e na bononnanoia te Atua ni katuaaea n aron te am'arake are e kanna.
24Ngkana e kataia ni biri nako n rawea maiuna man te kabaang are te biti,
ao e na manga teke ma ni b'aka n te kaini katebe are te buraati.
25E na rinnako te kainikatebe i nanon rab'atana.
E na ewaranako te ato ma n otinako taran te kainikatebe mai akuuna,
ao e na roko i rouna te maaku ae korakora.
26A bane ni kamaunaaki taiani kaub'ai ake e kaawakin;
a na kabuokaki ma ana utu n te ai ae aki kauraaki i roun te aomata.
27E kaotaki ana bure te aomata i roun karawa,
ao e kakoaua naba ana bure i roun te aonnaba.
28A na bane ni kamaunaaki kaub'aina
ni korakoran unin te Atua.
29Bon aei tokiia aomata aika buakaka,
tokiia are E a tia te Atua ni kataua i bukiia.
Who We AreWhat We EelieveWhat We Do
2025 by iamachristian.org,Inc All rights reserved.
