1Ni boong aika a na roko,
e na riki b'a te kabanea n rietaata i buakon maunga
te maunga are e tei iai ana Tembora te UEA,
e na bura i aon tabuki nako.
A na b'ab'aroakinna botannaomata nako.
2Ao a kaangai aomata,
“Ti a rierakea ana tabuki te UEA,
are e mena iai ana Tembora Atuaia Iteraera,
b'a E na reireiniira baika E tangirira b'a ti na karaoi.
Ti na nakonako i nanon kawai ake E a tia n rinei.
A roko ana taeka n reirei te UEA mai Ierutarem,
ao E taetae nakoia ana aomata mai Tion.”
3E na katoki taiani ikaakaiwi i marenaia botannaomata
ake a korakora ake a kaan ma ake a raroa nako.
A na oniki aia kabaang b'a b'aini kamarauan te tano,
ao aia kainiwai b'a biiti i bukin kaitiakan aroka.
E nangi toki te buaka i marenaia botannaomata,
akea riki te manga katauraoi i bukin te buaka.
4E a tia ni berita te UEA
ae moan te m'aaka
b'a a na bane ni maeka aomata ma te rau
i buakon aia nne n aroka ni kureebe
ma arokaia biiku
ao akea ae e na manga kakamakuia.
5A taromauri oin atuaia botannaomata n tatabeua nako, ma ti na taromauriia te UEA ae Atuara ma n ongotaeka i rouna n aki toki.
Okiia Iteraera Man Te Kataenikaiaki6E taku te UEA, “E a roko te tai are N na manga kaokiia ma ni bootia iai aomata ake I a tia ni katuuaia ngkoa, aomata ake a karawawataaki n te kataenikaiaki.
7E ngae ngke a raroa nako man mwengaia ma ni m'auku, ma N na manga waakina te reitaki ae e boou ma nikiraia ake a aki taenikai, b'a a na riki b'a te botannaomata ae e korakora. Ao N na uea i aoia i aon te maunga are Tion ni karokoa tokin aonnaba.”
8Ao ngkoe, Ierutarem ae ana taua n taratara te Atua n taraia ana aomata n ai aron te Tia Kawakin Tiibu, ko na manga okira tib'angam are bon atuun te aba n uea ae b'anin, ake ko abani ngkoa.
9E aera ngkai ko tangi n takaarua? E aera ngkai ko maraki n ai aron te aine ae ariri? Tiaki i bukina ngkai a akea am uea? Tiaki i bukina ngkae a mate am tia iango?
10Kam na minomino ni ngirangira n tang ngkami aika kaain Ierutarem n ai aron te aine ae e bung, b'a kam a riai ni kiitana ami kaawa ngkai, ao kam na maeka n taabo aika a m'awawa. Kam na nako B'aburon, ma E na bon kamaiungkami te UEA ikekei mairouia ami kairiribai.
11A bootaki botannaomata aika a m'aiti b'a a na buakaniko. A kaangai, “E na riai ni kamaunaaki Ierutarem! Ti na noora te kaawa b'a e na bon urubekebeke raoi.”
12Ma a aki ataa nanon te UEA te botannaomata aei. A aki ataia ae a bootaki b'a a na bane n oreaki n ai aroia taian uita aika a bootaki, b'a a na oreaki ni kaakaki kuniia.
13E kaangai te UEA, “Kam na nako n oreia ami kairiribai ngkami aika kaain Ierutarem! N na kakorakorako n ai aron te kaom'aane ae iai korona aika biiti, ao iai naba ana kau ni wae ae te buraonti. Ko na kamanatuaia botannaomata nako, ao ko na uotii mai nako iu Ngai ae UEAN te aonnaba ni kabane, kaub'ai ake a reke mairouia botannaomata ake a konaiia n te buaka.”
Who We AreWhat We EelieveWhat We Do
2025 by iamachristian.org,Inc All rights reserved.
