1Ao i mwiina, ao te UEA ae Atuaia Iteraera e tuangiia burabeti ake Akai ao Tekaria b'a a na taetae n Arana nakoia aomatan Iuta ao Ierutarem. Ao a karaoa arei.
2Ma ngaia are, a tuangiia aomata Terub'abera are te koowana ao Iotua are te ibonga b'a a na moana karaoan te Tembora, ao a kaungaaki irouia ana burabeti te Atua.
3A ikotaki te koowana are Tatenai mani m'akoron te tautaeka Maeao, ao ana tia buobuoki are Teeta Botenai ao aia mataniwi. Ao i mwiina, a nako Ierutarem ao a taku nakoia aomata, “Antai ae e tuangingkami b'a kam na manga karaoa te Tembora aei?”
4Anganiira araia taani m'akuri iai.
5Ma te Atua e bon tararuaia aia taani kairiiri taian Iutaia. Ma ngaia are te koowana ma ana mataniwi, a manga iangoia b'a a nang aki katokiia aomata man karaoan te Tembora ni karokoa a tia moa ni kaongoa Taraiati man ongora ana iango iai.
6Ma ngaia are, a kanakoa te rongorongo te koowana are Tatenai, Teeta Botenai ao aia taani iango nakon Taraiati,
7ae a kaangai:
Te uea ae Taraiati, ko na tekeraoi.
8Ti nako Iuta ike e kateaki iai ana Tembora te Atua ae e kakannato n atiibu aika a rangi ni buubura, ao tatangaia aika taiani kai aika a nim ma taian oo. A bane ni m'akuri korakora aomata, ao e buti m'aaka te m'akuri.
9Ao ti titirakiniia ake a tararua te m'akuri b'a a na tuangiira, b'a antai ae e anganiia te kariaiakaki b'a a na manga moana katean te Tembora.
10Ti bon titirakiniia naba araia aia taani kairiiri, n te aro are ti na konaa ni koroi araia nakoim.
11A taku b'a ngaiia bon ana toro te Atua ae e tautaekana karawa ao aonnaba. Ao a taku b'a a manga karaoa te Tembora are e a bon tia ni karaoaki n ririki ake a b'akanako iroun uean Iteraera temanna ae e rangi ni kakannato.
12Ti kaongoaki b'a a tia aia botannaomata ni kauna Atuaia, ai ngaia are E a kariaia b'a a na kataenikaiaki iroun Nebukaneta, are uean B'aburon are e uotiia nako b'a taenikai i B'aburon. Ao Nebukaneta e kamaenikuna aia Tembora ni kab'aka,
13E ngae n anne, ma n ana moan ririki ni uea Tairati are uean B'aburon, ao e kanako taeka b'a e na manga kateaki te Tembora n te tabo are e tei naba iai mai m'aina.
14E anai b'aai aika a koora ao a tirewa, ao e kaaki i nanon ana Tembora antina i B'aburon.
15A taku naba b'a i nanon ana moan ririki ni uea Tairati i aon B'aburon, ao e anga ana taeka b'a e na manga kateaki ana Tembora te Atua i Ierutarem ni bon te tabo naba are e tei iai mai m'aaina. Ma ngaia are Tairati, e rinea Tetibata b'a te koowana i Iuta, ao e kanakoi b'aai ake a karaoaki man te koora ao te tirewa nakoina b'a e na karin n te Tembora.
16Ao e a m'ananga Tetibata nako Ierutarem, ao e kawenea aan te Tembora ao e boni waaki nako te m'akuri.
17Te uea ae ko karineaki, tuanga temanna b'a e na wareki rongorongo nikawai i B'aburon, ao kakaaea raoi taekan te uea are Tairati, ngke e anga ana taeka b'a e na manga karaoaki ana Tembora te Atua i Ierutarem. Ti na karaoi b'aai ni kabane akana ko taku b'a ti na riai ni karaoi.
Who We AreWhat We EelieveWhat We Do
2025 by iamachristian.org,Inc All rights reserved.
