Etita 8 - Kiribati New Version Bible

A Tuangaki I-Iutaia B'a A Na Kaitaraia Aia Kairiribai

1Ni bon te bong naba arei, ao te uea are Keatiti e angan te ueanaine are Nei Etita ana b'ai Aaman ni kabane, are aia kairiribai I-Iutaia. E taetae te ueanaine nakon te uea ni kaota irekerekena ma Morotekai, ao mai mwiin te tai anne, e kariaiakaki Moretekai b'a e na konaa n rooroko i matan te uea.

2Ao e buuta ana m'am'a te uea are e mena ana kanikina i aona (are e a tia ni kaokia mairoun Aaman) ao e angan Moretekai. Ao e mwiokoa Morotekai Nei Etita b'a e na tararuai ana b'ai Aaman.

3Ao e manga taetae riki Nei Etita nakon te uea, ma n ni b'aka n tang i rarikin waena. Ao e buubutiia b'a e na katoka ana m'akuri ni kam'aam'ane aika a buakaka Aaman are ana kariki Akaaka, are e a tia ni karaoia n eekiinako iai I-Iutaia.

4Ao e arora ana kainuea te uea are te koora nakon neierei, ma ngaia are, e teirake ao e taku,

5Te uea ae ko karineaki, ngkana ko tabeakinai ao ngkana ko kukurei irou, ao I butiiko b'a ko na karaoa te katanoata ni katoka ana taeka Aaman b'a a na aki karaoaki nanoia, ake taeka ake e anga natin Ammetata are ana kariki Akaaka b'a a na tiringaki I-Iutaia ni kabane i nanon abanueam.

6N na kangaa ni waaki nako ngkana e roko te kabuanib'ai aei i aoia au aomata, ao a tiringaki oin au utu?

7Ao e taku te uea are Keatiti nakon te ueanaine are Nei Etita ao Moretekai are te I-Iutaia, Nooria, I a tia ni kabaea roroan Aaman i bukin ana m'akuri ni kam'ane nakoia I-Iutaia, ao I a tia n angan Nei Etita ana b'ai nako Aaman.

8Ma e aki konaa ni katokaki te katanoata are e karaoaki n aran te uea ao e kanikinaeaki n ana m'am'a. Ma e ngae n anne, ao kam boni konaa ni koroboki nakoia I-Iutaia n aron te b'ai are kam bon taku; ma kam na koroboki n arau ao ni kanikinaea naba n au m'am'a.

9E riki aei ni kauabwi ma tenuan bongin te katenua n nam'akaina, ae te nam'akaina are Tiwan. Ao Morotekai e weteia ana taani koroboki te uea, b'a a na korea are e taekinna nakoia n te reta nakoia I-Iutaia ma taiani kowana, ao taani kairiiri, ma mataniwi n taian burawinti ake tebubua uabwi ma itiua, mai Inria ni karokoa Itiobia. A koreaki taian reta nakon taian burawinti n tatabeua ni bon oin aia taetae ma aia koroboki, ao nakoia naba I-Iutaia n oin aia taetae ma aia koroboki.

10Ao e karaoi taian reta akekei Morotekai b'a a na koreaki n aran te uea are Keatiti, ao a na kanikinaeaki n ana m'am'a. Ao taan uarongorongo a toka i aon aoti aika a biri m'aaka aika ana aoti te uea, ao a nikiri reeta n taabo nako.

11Ao a kab'arab'araaki n taian reta aikai b'a te uea e kariaia I-Iutaia b'a a na bootia ma ni buaka i bon i bukiia ni kaawa nako. Ngkana iai aomata man aaba nako man taiani burawinti aika a buakaniia m'anen Iutaia, ke ataeina, ke te naan aine, ao a konaa I-Iutaia ni kaaitaraia; a konaa n tiringiia ni kabaneia ma n anai aia b'ai ni kabane.

12E na karaoaki te moti aei ni kabutaa te abanuea are Botia, ni moa man te bong are e katanoataaki iai tiringaia I-Iutaia, are katebwi ma tenuan bongin Ata, te katebwi ma uoua n nam'akaina.

13E na katanoataaki b'a te tua b'a, a na ataia aomata nako n te burawinti, b'a a aonga n tauraoi I-Iutaia n irantaangaia i bon irouia nakoia aia kairiribai ngkana e roko te bong arei.

14Ao e tuangiia taan uarongorongo te uea b'a a na tokari ana aoti te uea ma ni kabane biriia. E katanoataaki naba te moti arei i Tutian, are atuun kaawan te tautaeka.

15Ao e kiitana te bareti Morotekai, ao e kunnikaia n te niiniira ni uea ae buru ao e mainaina, ao te raburabu ae te riinen ae tamaroa ae e beebo, ao e katokaa naba te baunuea te koora ae moan te tamaroa. Ao i mwiin anne, e a onrake kawain nako te kaawa are Tutian n te takaarua ni kukurei.

16A bane ni kukurei I-Iutaia ma ni kakatonga n i bukin namakinan reken te tokanikai.

17A bane ni karaoa aia bong ni motirawa ae e kakukurei I-Iutaia ni kaawa nako ao n burawinti nako ike e warekaki iai ana moti te uea, ao I-Iutaia a karaoa aia baka n am'arake ni kukurei. Ni koauana, a m'aiti aomata aika a maaku irouia ngkai ao a manga riki b'a I-Iutaia.