1Ao e taku B'araam nakon B'araka, “Karaoi itiua baonikarea ikai, ao uotimai nako iu, itiman kao mm'aane, ao itiman tiibu mm'aane.”
2Ao ngke a tia B'araka ni karaoa arei, ao a kareana temanna te kao mm'aane, ao temanna te tiibu i aon taiani baonikarea ake itiua.
3Ao e taku B'araam, “Taningaai ikai i rarikin am karea aikai b'a N na kaokoroai moa n te tabo teuana, b'a E na kaoti te UEA nako iu. Ngkana E kaoti, ao n na tuangko b'aai ni kabane aika E taekin.” Ao e a nako.
4Ao ngke E kaoti te Atua nako ina, ao e taku B'araam, “I a tia ni karaoi itiua baonikarea, ao I a tia naba ni kareana temanna te kao mm'aane, ao temanna te tiibu mm'aane i aoia n tatabeua nako.”
5Ao E anga te rongorongo te UEA nakoni B'araam ao E a manga kaokia nakon B'araka.
6Ao ngke e oki B'araam ao e noora B'araka ma ana aobitia n teitei i rarikin taiani baonikarea.
7Ao e taku B'araam:
E kairai te uea are B'araka are ueani Moaba
man tabukin Tiria
b'a n na katekebuakaia Iteraera
ma ni katanoata b'akana.
8Ma I bon aki kona n ekaanako te Atua!
E tuai ni katekebuakaia Iteraera,
ke ni kabuakakaia.
9“I taratara rikaaki mai taubukin te Maunga
ao I nooriia Iteraera,
Ana aomata te Atua aika ongotaeka.
10A maeka n ti ngaiia ma te rau
e ngae ngke e rangi ni m'aiti aia aomata
ma a aki kumeia
botannaomata tabeua.
“I kantaningaia b'a n na ongotaeka iroun te UEA
ni kabane au bong ni maiu
ao I kantaningaia b'a n na mate ma te rau.”
11Ao e taku B'araka, “Tera ae ko karaoia? I butiiko b'a ko na roko ni katekebuakaia au kairiribai, ma ko aki b'a ngaia ko a manga kakab'aiaia!”
12Ao e kaeka B'araam ao e taku, “I ti kona n taekin baike E tuangai te UEA.”
Ana Kauoua n Rongorongo B'araam13Ao e taku B'araka nakon B'araam “Nako mai b'a ti na nakon te tabo riki teuana. Tao ko na kona riki ni katekebuakaia m'akoron Iteraera ae uarereke riki nakon aei.”
14Ma ngaia are, e kaira B'araam nakon te katawanang ae mena i taubukin te maunga are Bitika ike a mena iai taabo n taratara nako. Ao i mwiina, e katei itiua baonikarea, ao e kareani taian kao mm'aane, ma tiibu mm'aane i aon baonikarea n tatabeua nako.
15Ao e taku B'araam “Ko na taningaai riki i rarikin am baonikarea. N na nako ikekei b'a E na kaoti iai te UEA nako iu.”
16Ao E kaoti te UEA nakoni B'araam ao E a manga anganna naba te rongorongo, ao i mwiina, E a tuangnga b'a e na kawara B'araka n tuangnga te rongorongo.
17Ao e oki B'araam ao e nooria b'a a teitei i rarikin taiani karea ma ana aobitia.
Ao e titiraki B'araka, ao e taku, “E kanga Ana taeka te UEA?”
18Ao e kaeka B'araam ao e taku:
“Kakauongo raoi
nakon au taeka.
19Tiaki aron te aomata te Atua! E aki kona ni kewe, ao E aki bibitaki naba nanona. E aki kona n ae E na aki kakoroa bukin Ana berita.”
20Akea riki te b'ai ae I kona ni karaoia i rarikin mwiokoau mai Rouna are te kakab'aiaia aomata aikai. I aki kona ni bita te b'ai are a tia ni karaoia.
21Bon te UEA ae te Atua aia Uea Iteraera. E maeka ma ngaiia ikekei, ao E aki kona ni karaoa te b'ai teuana ae buakaka nakoia.
22E kaotinakoia te Atua mai Aikubita ni korakorana ae ai aron korakoran te kao anti mm'aane.
23Bon akea te tabunea teuana ae kona n totokoia. Bon noora te b'ai ae E a tia ni karaoia te Atua nakoia Ana aomata.
24Kaanga ai aroia raian aika a tauraoi nakon te buaka, ao a bon aki kona ni motirawa ni karokoa a tia ni kab'auta konaia.”
25Ao e takaarua B'araka ao e taku, “Ngkana ngaia b'a ko na aki katekebuakaia, ao tai manga kakab'aiaia.”
26Ao e kaeka B'araam “I a kaman tia n tuangko are N na bon ti taekin baike E tuangai te UEA.”
Ana Katenua N Rongorongo B'araam27Ao e taku B'araka nakoni B'araam “Nako mai ti na kataa riki te tabo teuana. E na mena ngkoa, ao E na kariaia te UEA b'a ko na katekebuakaia Iteraera man te tabo arei.”
28Ma ngaia are, e kaira B'araam nakon te Maunga are Beore, are kaaitaraa te rereua are i meangin Taari are Mate.
29Ao e taku B'araam, “Karaoi itiua baonikarea ikai, ao uotimai nako iu itiman kaomm'aane, ao itiman naba tiibu mm'aane.”
30Ao ngke e a tia B'araka ni karaoi baike e tuangaki iroun B'araam ao e a kareana temanna te kaomm'aane, ao temanna te tiibu mm'aane i aon taiani baonikarea n tatabeua nako.
Who We AreWhat We EelieveWhat We Do
2025 by iamachristian.org,Inc All rights reserved.
