Iobi Taekan te boki aei - Kiribati New Version Bible

Taekan te boki aeiBon te kaub'ai te aomata ae Iobi, e ngae ngke tiaki Iteraera ngaia, ma e aki toki n tataromauria te UEA ao bon te aomata ngaia ae e raoiroi. Ma e maroroo Tatan ma te Atua ao e taku Tatan b'a e kakaonimaki Iobi nakon te Atua i bukina ngke e kakab'aiaki iroun te Atua. E kariaia te Atua b'a e na uoti nako kaub'ain Iobi, natina, ao n tokina, bon marurungin rab'atana, b'a e na nooria b'a e na bon teimatoa naba iai Iobi ni kakaonimaki nakon te Atua ke e nang aki. Ma e bon teimatoa ni kakaonimaki Iobi.Ao a roko raoraon Iobi aika teniman b'a a na karaua nanona. A kakoaua b'a te kaub'ai bon kanikinaean ana kakab'aia te Atua. Ao ngkai a kaai ni bua marurungina ma tetekeraoina, ao a kakoaua raoraona aikai b'a E katuaaeaki iroun te Atua i bukin ana bure. Ao e kaeka Iobi b'a bon akea ana bure ao tiaki nanona b'a te b'ai ae riki nakoina aei b'a iai ana kaairua. Ao a uaia ni kauntaeka Iobi ma raoraona aikai, ao bon akea mairouia ae e taraa ni kaairua, ma n tokin te kauntaeka, a b'ara nanoia raoraona.E rangi n rawaawata Iobi, ao tabeua te tai i nanon tain te kauntaeka e buubutiia te Atua b'a e na kaota rab'atana nakoina ma ni kab'arab'ara nanon rawawatana aei. Ao i mwiina, tokin aia taetae raoraona, e iangoia Iobi b'a a aki konaa aomata ni kunea te wanawana ae e konaa ni kaekaa ana titiraki te maiu aika a nano. Bon ti te Atua ae iai i rouna te wanawana anne. E katoka ana taetae Iobi n tuea b'a bon akea ana bure ni karaoan te kaairua.Ao n te tai aei, e a moana ana taetae Eriu, te aomata ae e teitei ikekei. E kaokioki ana taeka ake e a tia n taekinaki, ma e kaburei iteran te kauntaeka ni kauoua. E katoka ana taetae Eriu n te anene n neboa te Atua i bukin ana kakaawakin nakon ana karikib'ai.N tokina E a bon kaotia te Atua nakon Iobi, ma E bon aki naba kab'arab'araa rawaawatan Iobi. Ma E onea mwiin anne, ni kaoti b'aai aika a m'aiti aika E karaoi aika a aki konaa n ataaki iroun te aomata; e aki konaa te aomata ni karaoa te b'ai ae E karaoia te Atua. E tiriburea Iobi te Atua ngkai e rangi ni kabatia te kab'araria ao e rangi n uarereke te b'ai ae e ataia, ma E taku naba b'a e bon teimatoa n riki Iobi b'a ana tia m'akuri ae e kakaonimaki. Ma ngaia are, n tokina, e taekinaki n te boki b'a e a kakab'aiaki Iobi iroun te Atua ao E a manga kauoua okiokin kaub'aina are mai m'aaina.E aki roko n te ataia Iobi b'a tera bukin karawaawataana: e namakina te korakai, ma e bon aki roko n te katinanikua te Atua ke n tannako mai rouna. E kakoaua Iobi b'a E na bon buokia te Atua n te tai teuana:Oi n iango i aon te boki aeiKatauraoi 1.1—2.13

Iobi ma raoraona 3.1—31.40

a. Ana Ngurengure Iobi 3.1-26

e. Te Moan Maroroo 4.1—14.22

i. Te kauoua ni Maroroo 15.1—21.34

o. Te Katenua ni Maroroo 22.1—27.23

u. Kamoamoaan te wanawana 28.1-28

m. Ana kabanea n taeka Iobi 29.1—31.40

Ana maroroo Eriu 32.1—37.24

Ana kaeka te Atua nakon Iobi 38.1—42.6

Te Kabane 42.7-17