Ieremia 23 - Kiribati New Version Bible

Rongorongon Te KaantaningaE taku te UEA:

1Ngkami aika taan kairiia Au aomata, ti te bo ngkami ma taan kaawakintiibu aika kam tiringiia tiibu ma ni kamaaenako ia.

2Kam kaantaningaaki b'a kam na kaawakiniia Au aomata, ma ngaia kam a manga kakionako ia. Ma ngaia are, N na katuaaingkami n te tuua ae korakora ngkai, ni kabooa mwiin te kaairua ae kam a tia ni karaoia.

3N na kaokiia ni kabane Au aomata nakon mwengaia man aaba ake I a tia ni kamaaenako ia nako iai, ao a na rikirake b'a te botannaomata ae e korakora.

4I berita b'a N na kakaaeia taani kairiiri aika a na tararuaia kaanga taani kaawakintiibu ni koaua. A na bane ni mena au aomata ikekei, ao a na aki manga maaku n te b'ai teuana.

5N te bong teuana N na rinea

te uea ae e raoiroi

man ana utu Tawita,

te uea ae e na wanawana

ao e na tautaeka ma te eti.

6E na rau Iteraera,

ao e na kaawakinaki Iuta

i nanon ana tai n uea.

E na aranaki te uea b'a

“Te UEA ae e anga te eti.”

7E na roko te tai are kam na manga taromauriai iai. Ma kam na aki manga aranai b'a te Atua ae E Maiu are e kamaiuia Iteraera mai Aikubita.

8Ma kam nang aranai, b'a te Atua ae e Maiu are e kamaiungkami man te aba are i meang ao man aaba nako ake tabeua ake I a tia ni kairoroingkami b'a kam na nako iai. Ao kam na manga maeka riki ni bon oin abami.

9Ngkana I iangoia burabeti,

ao I tiaoki, ao I ruru ni maaku

kaanga aron temanna ae e koronimanging,

i bukin ana taeka te UEA

ma Ana taeka aika a tabu.

10A a tia ni kaburei kamanenaakin m'aakaia

taian burabeti aika aki kakaonimaki

i aon te aba arei ni kabuta.

Ma ngaia are, E oniki aaba n uteute te Atua

nakon taian rereua aika a kabuebue.

E na Katuaaeia Burabeti aika aki kakaonimaki te UEA

11E taku te UEA b'a N na taetae ni kaangai:

E bon rangi n uarereke iangoakiu Ngai ae te UEA

iroumi ngkami aika burabeti ma ibonga,

n te aro are kam bure naba

nakon oin au Tembora!

12Ngkai N na katuuaingkami

n te kabuanib'ai,

ao kam na marannako ao kam na b'aka

i nanon te rootongitong.

Bon aio au taeka Ngai ae te UEA.

13A rangi n ribaaki irou

burabetin Tamaria,

i bukina ngkai a kab'arab'ara

n aran B'aara

ao a kairiia nako aomata.

14Ao kam rangi ni buakaka riki

ngkami burabetin Ierutarem.

Kam aki kakaonimaki nakon tuan ami mare

ao kam aki konaa n taekina te koaua.

Ao kam bon kairiia naba tabem'aang nakon te bure

ngke kam bon riai ni buokiia

ni kaokiia nako iu.

Ngkami ma kaain Ierutarem ti te bo ami m'akuri aika a buakaka

ma Totom

ao Komora.

15Kam a tia ngkami aika burabetin Ierutarem

ni kabutaa nako te aoraki nakon taabo nako.

Ao bon anne bukina ngkai I berita Ngai ae te UEA

b'a N na anganingkami te boitin ae moan te korakora

b'a kam na kanna ma n nimma.

E taku te UEA:

16Kam na aki ongo nakon aia kewe

burabeti ni kewe aikai,

ngkami aika kaain Iuta!

Te rongorongo ae a tataekinna

bon ti aia iango;

e bon aki nako mairou,

Ngai ae te UEA ae Moan te M'aaka.

17A m'ananga burabeti aikai nako ia aomata

ake a rawa ni karineai

aika a taningabono

aika a bon karaoi b'aai ake a bon tangiri.

A kaangai burabeti nako ia,

E a tia ni berita te UEA

b'a a na nako raoi b'aai nako.”

18Ma I tuangkami Ngai are te UEA

b'a a tuai man iriira

kabowin Au kauntira are i karawa

burabeti aikai

ke n ongo b'anaau n taetae.

19A a buakaka! Ma ngaia are N na

oreia n unu

n ai aron te angibuaka ae e korakora.

20E na bon aki toki unu,

ni karokoa e tia

te b'ai ae I a tia ni baaireia b'a N na karaoia.

N te bong teuana ane kam na ataa

raoi nanon te b'ai ae I nanonna.

21I bon aki kanako ia burabeti aikai

ke n tuangiia b'a a na taetae nako imi,

ma a biri ni kakaeingkami

ma n tataekina aia rongorongo nako imi.

22Ngke arona b'a a ira aia kabowi

Au kauntira i karawa,

ao a na riai n tia n

tuangkami kaain Iuta

b'a kam na katoka ami bure

ma n okirai.

23I mena n taabo nako

n taabo aika a kaan ao aika a raroa,

24i karawa ao i aon te aonnaba.

Bon akea taabo aika a raba

aika kam na konaa ni karabaingkami mairou.

25A taku burabeti aikai b'a I a tia n anganiia te mii ke te kaotioti, ao a taekina te kewe n arau.

26A nako b'aai ni kabane ake a taekin man nanoia aika a b'aoua. E na maanra aron te waaki aei?

27A tataekina miia i bon irouia ao a kataia ni karikiia Au aomata b'a a na katinanikuai, n ai aroia aia bakatibu ngke a katinanikuai ma n taromauriia B'aara.

28Ti te bo kaokoron miia ma au koaua ae kanga te uteute ao te uita. Ma ngkana a taetae burabeti i buku a na ti taekina te b'ai are I tuangiia.

29Au taeka bon te ai ae e korakora; bon te aama ae urui taiani b'a akanne.

30I bon kaaitaraia burabeti akanne akana a anai aia taeka i bon irouia ao a katanoatai b'a aongkoa Au rongorongo.

31Ao I kaaitaraia burabeti naba aikai aika a taekin oin taeka ao a taku b'a aongkoa taeka mairou.

32Kakauongo nakon te b'ai ae N na taekinna Ngai are te UEA! I kaaitaraia burabeti aika a taekin miia aika a on n taian kewe. A taekin taian mii aikai ao a kairiia aomata nako n aia kewe ma aia kainikatonga. I bon aki kanako ia ke n tuangiia b'a a na nako, ao bon akea te buoka ae e konaa n reke mairouia. Bon aei Au taeka Ngai ae te UEA.”

Uotan Te UEA

Ae E Rawaawata

33Ieremia, ngkana e titirakiniko te burabeti ke te ibonga ke tao antai ni kaangai, “Iai ana rongorongo te UEA i bukira?” ao tuangiia ni kaangai, “Bon te uota ae e rawaawata ngkami i roun te UEA, ao E na karaoa taekam.”

34Ngkana iai maibuakomi ae e kaangai, “Aio te rongorongo mai roun te UEA,” ao N na katuaaea ma ana utu nako, e ngae naba ngkana te burabeti ke te ibonga ngkoe.

35Ma, n onea mwiin anne, ko na titirakina raraom nako ke am utu nako ni kaangai, “Tera te kaeka ae e anga te UEA?” ke “Tera ae e taku te UEA?”

36E taraa n ae bon iai ami rongorongo n tatabemaningkami nako! Ma ngaia are, ngkana kam kaangai, “Aio te rongorongo mai roun te UEA,” kam a kab'aoua Au rongorongo nakon te kewe. Ururingnga b'a bon Atuam Ngai, te UEA ae Moan te M'aaka.

37Ngkana ko nakon te burabeti, e raoiroi ngkana ko titiraki ni kaangai, “Tera Ana kaeka te UEA nakon au titiraki?” ke “Tera ae E taekinna te UEA?”

38Ma ngkana ko aki ongotaeka nako iu ma ni kaangai, “Aio te rongorongo mai roun te UEA,”

39N na anaiko ao N na karenakoko nako kiraroa. Ao i mwiina, N na kiitana te kaawa ae Ierutarem are I a tia n anga nako ia ami bakatibu.

40Ko na bon aki konaa n inaomata man te kamaamaaeaki ao te b'ainrang.