2.Tamuera 5 - Kiribati New Version Bible

E A Riki B'a Uean Iteraera Tawita(1 Rongo 11.1-3)

1Ao a kaaitibo taani kairiiri mai Iteraera ma Tawita i Eberon ao a taku, “Bon am koraki ngaira.

2Ngke e bon uea naba ngkoa Tauro, ao ko bon kairiia naba ara botannaomata nakon te buaka. E a tia ni berita te UEA b'a ko na riki b'a te tia tautaekana Iteraera ma ni kaawakinna kaanga te tia kaawakintiibu.”

3Ao e karaoa ana boraraoi ma taani kairiiri Tawita i nanon tain te boowi, ao e butiia te UEA b'a e na riki b'a aia tia kakoaua. Ao i mwiina, a kab'aroa b'aan te oriwa taani kairiiri i aon atuun Tawita ni kaotia b'a e a uea man te tai aei i aon Iteraera.

4Ai tenibwi ana ririki ni maiu Tawita n te tai are e riki iai b'a te uea, ao e tautaeka i nanon abwi te ririki.

5E maeka i Eberon i nanon ana moan ririki ake itiua ma te iterana te ririki ao n tautaekana ti Iuta. Ao i mwiina, e a manga m'aing nako Ierutarem, ike e a tautaekani iai Iteraera ma Iuta i nanon tenibwi ma tenua te ririki.

E kataenikaia Ierutarem Tawita(1 Rongo 11.4-9; 14.1-2)

6A maeka kaain Iebuti i Ierutarem, ao a kaira ana taanga ni buaka Tawita ni buakaniia. A aki kaantaningaia kaain Iebuti b'a e na konaa n rin, ma ngaia are, a taku nakoina, “Ko aki konaa n rin ikai! Ti konaa ni kakionakoko, e ngae ngkana ti mataki ke ti aki konaa n nakonako!”

7Ao e taku Tawita nakoia ana taanga ni buaka, “Kam na riai n rin man kawain te ran ni karekeia kaain Iebuti aikai.

8I aki ribaia aomata aika a aki konaa n nakonako ke a mataki.

9Bon anne bukina ngkai iai te tua ae e kaangai, “Bon ti aomata aika a konaa n nakonako ke a noraaba aika a kariaiakaki i nanon te tembora.”

E taua te nono are i aon Maungan Tion Tawita, ao i mwiina, e a manga m'aing nako ikekei, ao e arana te tabo arei b'a Ana Kaawa Tawita. Ao e a manga karaoa te kaawa arei, ni moanna man kanoaan nanona are mai mainiku.

10Ao e riki b'a te uea ao te tia tautaeka Tawita ae e korakora, i bukina ngke E mena te UEA ae Moan te M'aaka i rarikina.

11E kanakoia ana mataniwi tabeman Uean Turo are Iram nakon Tawita. Ao a airi ma ngaiia taani kaabenta ma taani koroatiibu, ao a uoti kaai aika taian tiira b'a aonga ni konaa ni katea ana bareti Tawita.

12Ao e ataia Tawita b'a bon te UEA ae e karikia b'a te uea i aon Iteraera ao E a tia ni karikia b'a te tia tautaeka ae e korakora i bukin karaoan te raoiroi nakoia ana aomata.

Bungiakin Natin Tawita Te Mm'ane i Ierutarem(1 Rongo 14.3-7)

13Ao i mwiina, ngke e a kiitana Eberon Tawita nako Ierutarem, e a mare ma aine aika a m'aiti ao a riki natina aika a m'aiti.

14Aikai natina ake a bungiaki ikekei: Tiammua, Tiobaba, Natan, Toromon,

15Iba, Eritua, Nebeki, Iabia,

16Eritiama, Eriata, ao Eribereta.

Buakan Tawita ma Kaain Biritia(1 Rongo 14.8-17)

17Ao a ongo kaain Biritia ae e a uea ngkai Tawita i aon Iteraera, ao a roko nakon aaba ake a tabukibuki ni kataia ni taua. Ma e ataia Tawita ao e nako n rin n ana nono.

18Ma ngaia are, a kaemb'a n te M'arua are Rebaim.

19Ao e titirakina te UEA Tawita ni kaangai, “N na buakaniia kaain Biritia ke N na aki? Ko na katokanikaiai ke ko na aki?

Ao E tuanga Tawita te UEA ni kaangai, “Buaka! N na katokanikaiko.”

20Ao e buakaniia kaain Biritia Tawita ao e konaiia. Ao e taku, I taratara te UEA ngke e urua aia taanga ni buaka kairiribai kaanga te ieka ae e korakora.” Ma ngaia are, e arana te tabo arei b'a “E uruaniia te UEA”

21Ao a uoti nako naba taian bouananti ake a katikui kaaini Biritia imwiia ana taanga ni buaka Tawita.

22Tabeua te tai i mwiina, a manga oki kaain Biritia nakon aaba ake a tabukibuki ao a katei kaemb'a ni M'aruan Rebaim.

23E titirakina te UEA Tawita b'a tera ae e na karaoia, ao e kaeka te UEA ni kaangai:

Ko na aki buakaniia mai mataia. Naako katobibia mai akuiia ao buakaniia mai buakon taian aroka ake marubere.

24Kam na tataninga ikekei ni karokoa ae kam na ongo karongoaia taanga ni buaka aika a m'aati mai taberan taian aroka. Ao kam na kawaekoaingkami ni buaka! Nanon te tang anne b'a I a tia n rimoami ni m'aati ni buakaniia aia taanga ni buaka kaain Biritia.

25Ao e ongotaeka Tawita iroun te UEA ao e konaiia kaain Biritia. E a bon kakionakoia ni karokoa a roko i Keeb'a are te kawai n rin nako Ketera.