Ieremia 10 - Kiribati New Version Bible

Ana Taeka Te UEA

I bukin Taian Bouannanti

1-2E taku te UEA:

Ongora i Rou,

ngkami aika Iteraera.

Kam na aki irii kateia

botannaomata aika ianena

aika a mamaaku ngkana

a noora te b'ai teuana

ae e kamimii ae e riki i karawa.

3Bon akea nanon aia aro!

A koroi ni kab'akai taian aroka,

ao a karaoi taian banna iai i bukin aia bouannanti,

4a kabiria n te tirewa ma te koora

ao i mwiina a neeraia ni kamatoa

b'a e aonga n aki b'aka.

5Bon ti te bo te bouannanti

ma b'ain kakamaakaia maan.

E bon aki konaa n taetae,

ao e na bon ti uouotaki.

b'a e aki konaa n nakonako.

E aera ngkai e taromauriaki te bouannanti

ae e aki konaa ni buobuokingkami ke ni kaikoakingkami?

Neboan Te UEA

i roun Ieremia

6Ara UEA, ae E korakora ma ni m'aaka

bon ti Ngkoe te Atua.

7Bon aia Uea botannaomata nako Ngkoe.

A riai n taromauriiko aomata ni kabane.

Bon akea riki te aomata

ae e wanawana nakoim.

8Bon akea manenan taiani bouannanti,

ao bon taian nanobaba aomata

akana a taromauriia!

9A karaoaki taian bouannanti irouia aomata.

E korobanna te kai te tia korobanna.

E amana kooran Ubati ke te tirewa mai Taretiti

te tia m'akuri n te biti

b'a rabunana.

Ao i mwiina, e kunnikaiaki te bouannanti

n te kunnikai ae e buru ma ni beebo.

10Te UEA, bon ti Ngkoe te Atua

ni koaua ae e maiu.

Ko na tautaeka n taai nako.

E m'aieie te aonnaba

ngkana ko un,

ao a mauna nako botannaomata.

11Ko tuangai b'a n na taekinna

b'a a aki karaoa taiani karawa ma aonnaba

taian bouananti,

ao Ko na kamaunai taiani bouananti

Ngkoe ae te UEA.

12Ko karaoa te aonnaba

ao ko taakin taiani karawa

ni wanawanam ao m'aakam.

13A rurunga raan ake n taiani karawa

n am taeka.

Ko kabetirakei naang

ko kanakoi taian ang

man am autinib'ai

ao ko karaoa te iti

i nanon te karau.

14A rangi n nanobaba

aomata aika a karaoi taian bouananti!

A na b'ara nanoia

i bukina b'a a bon aki maiu

antiia ni kewe.

15Kaanga bon ti taian b'ai ni keekewe

ao a na manga kamaunaaki

ngkana e a roko te tai.

16Ko karaoi b'aai nako

Ngkoe ae Atuaia Iteraera,

ao ko rinea Iteraera

b'a am b'ai ni koaua.

Aram bon te UEA

ae Moan te M'aaka.

E Na Tewenakoaki Iuta Man Abana

17Ao I kaangai nako ia kaain Iuta,

“Booti ami b'ai;

kam a katobibiaki.

18E taku te UEA b'a e na uotingkami

taiani kangaanga aikai nakon te kataenikaiaki,

ao ane kam na karenakoaki man abami

kaanga te atiibu are kanoan te bana.”

19Ao a kaeka aomata ni kaangai,

“Ti a ikoaki

ao ti nang mate.

E aera ngkai ti taekinna

b'a ti aki konaa ni kaitaraa te maraki?

20A uruaki mwengara;

ao a mate natira.

Bon akea nikiraia

ake a na buokiira ni kakaaea kamanoara.”

21Ma I kaangai nako ia,

“Bon taian nanobaba ara taani kairiiri

i bukina b'a a rawa

n ongo i roun te UEA.

Ai ngaia ae ti a maae nako

kaanga tiibu.

22“E na ongo te aba karongoaan te urub'ai

mai meaang

ae kaanga ai aron te baa.

Ao n te tai ae e aki maan, a na uruaki ara kaawa nako

ao a na maeka iai taian tiakaore.” Ana Tataro Ieremia

23I ataia te UEA b'a ti

aki tauu aron maiura

ngaira aika aomata.

24Ko na kaeta arou, n aron ae e bon riai ni karaoaki nako iu,

ma ko na aki marakinnanoai,

b'a I kaawa ni mate.

25A rawa ara kairiribai

n atongko b'a te Atua

ke n taromauriiko.

A a tia ni kamaunaia ara aomata

ao a katuka ara botannaomata

b'a te b'ai ae e wene n urubekebeke.

Ma ngaia ae Ko na un irouia

ao kakioia nako!