Taian Areru 1 - Kiribati New Version Bible

Boki Teuana(Areru 1—41)Te Kukurei ni Koaua

1E a kab'aia te aomata

ae aki iri nanoia taan reirei aika buakaka,

ae aki katotoong aroia taani bure

ke n raoniia aomata aika akea manenaia i bukin te Atua.

2Ma kukurein nanona bon ana Tua te Atua;

e waawarekia ma n iaiangoia ni ngaina ao ni bong.

3Ti te bo ma te kai are e tei i rarikin te tabo n ran:

e maiureirei ao e kariki uaana n ana tai n uaa,

ao e aki rai baana.

A bane ni materaoi baike e karaoi.

4Ma tiaki aio aroia aomata aika buakaka;

ti te bo ngaiia ma aron te maange ake a ukaki nako n te ang.

5Ma ngaia are, a na kabuakakaaki iroun te Atua

ao a na kaokoroaki mai buakoia ana Aomata te Atua.

6A kairiiraki ma ni kawakinaki iroun te UEA aomata akana a raoiroi,

ao aomata akana a buakaka a toua kawain te kabuanib'ai.