1E koaua ae e raoiroi te Atua nakoia Iteraera,
nakoia ake a itiaki nanoia.
2Ma e kuri ni bua au kaantaninga;
E kaan ae na toki au onimaki
3i bukin nanobwiu irouia ake a kainikatonga
ngke I noori b'aai b'a a nako raoi i bukiia aomata aika buakaka.
4A aki mate ni maraki;
A marurung ao a maiu raoi rab'ataia.
5A aki rotaki n te rawaawata n aia aroia aomata tabem'aang;
A aki kaitibo ma kaangaanga n ai aroia tem'angina.
6E riki te kainikatonga b'a kanga ai aron m'aen roroaia;
ao te kakam'arua b'a kunnikaia;
7A oti nako baika buakaka mai nanoia;
Ao akea te bae a iaiangoia b'a ti te kario kaantaninga aika bubuaka.
8A ngareakiniia aomata tem'angina ao a atoatong taeka aika aki raraoi;
A kainikatonga ao a kario iango n ribuaka b'a b'ain ekakinakoaia tem'angina.
9A tabeki taeka aika buakaka b'a taekan te Atua are i karawa;
Ao a tataetae n aki akaaka i aon te aba,
10n te aro are a ongo aomata irouia
ao a ingainga nanoia ni kani kakoauai taeka ake a atong.
11Ao a kaangai, “E na aki ataia te Atua;
E na aki kona ni kunea te Atua are Moan te M'aaka.”
12Anne aroia aomata aika buakaka.
A bati aia b'ai ao a aki toki ni karereke aika bati riki.
13E boni matebuaka kawakinau b'a N na itiaki,
N akea te bure ae I karaoia.
14I karawawataaki n te bong koraki;
E karekeaki kaiu ni katoa ingabong.
15Ngke arona b'a I a tia n atong taeka akanne,
Ao I a tia n aki riki iai b'a temanna i buakoia am Aomata.
16I kataia n iaiangoa aron te kaangaanga aio,
Ma boni moan te kaangaanga irou
17ni karokoa are I rin nako n am Tembora;
Ao I a ataa ngkanne iai te bae e na riki nakoia aomata akana buakaka.
18Ane Ko na kaakiia n te tabo ae kamaranran,
Ao Ko na kab'akaia n ototoiia!
19A mate nabangkekei;
A roko n tokiia ae kakamaaku.
20Ti te bo ngaiia ma te mii are toki kaotina n te ingabong;
Ngkana Ko uti, Te UEA, ao a mauna naba.
21Ngke e rawaawata nanou,
n ai aron ae e teke burou iai,
22E roo nanou, ao I aki ataib'ai,
Kanga ai aron te man ngai i matam.
23Ma ae I bon memena naba i rarikim n taai nako,
Ao Ko tautaua baiu.
24Ko kairiirai n am Taeka n Reirei,
Ao Ko na m'aneai rimwi nakon te neboaki.
25Akea riki temanna i karawa ae na buokai b'a ti Ngkoe;
Ao akea riki temanna i aonnaba ae I tangiria i rarikim.
26E kona n rikirake ni mamaara nanou ma rab'atau,
Ma bon te tia kakorakoraai te Atua,
ao ti Ngaia ae I kainanoia.
27A na kabuanib'ai maiuia akana kitaniko;
Ko na kamateia akana aki kakaonimaki nakoim.
28Ma ngai, e raoiroi irou
te kaania te Atua.
B'a I rineia b'a te tia katanai,
N na katanoatai b'aai ni kabane
ake E a tia ni karaoi.
Who We AreWhat We EelieveWhat We Do
2025 by iamachristian.org,Inc All rights reserved.
