1Arau bon Ieremia. Bon te ibonga ngai, ao tamau bon Irekia ao a bane kaain au utu n nako mai Anatota are n aban te baronga are Beniamin. Kanoan te boki aei bon taekan b'aai aika E taekin te UEA nako iu.
2E moana taetaena te UEA nako iu n ana katebwi ma tenua n ririki Iotia are natin Amon te mm'aane n uea i aon Iuta,
3 Ana kabanea n taetae te UEA nako iu bon n te kanimaua n nam'akaina n ana katebwi ma teuana n ririki Tetekia are natin Iotia te mm'aane n uea. Bon anne naba te tai are a uotaki nako iai kaain Ierutarem b'a taenikai.
Rineakin Ieremia Iroun Te UEA4E taku te UEA:
5“Ieremia, bon Ngai am Tia Karikib'ai,
I a kaman rineiko b'a ko na taetae ibuku
nako ia taian botannaomata
i m'aain bungiakim.”
6Ao I kaeka ni kaangai, “I babanga n taetae, te UEA ao I rangi ni uarereke.”
7Ao e taku te UEA, “Ko na tai taku b'a ko rangi ni uarereke. Ngkana I tuangko b'a ko na nako n taetae nakon temanna, ao ko na nako! Ao ngkana I tuangko te b'ai ae ko na taekinna, ao kona taekin b'aai nako aika I tuangko!
8I berita b'a N na mena iroum ao ni kaawakiniko, ma ngaia are, ko na aki maaku.”
9E kanakoa baina te UEA, ao e riinga wiiu ao e taku, “I anganiko taeka aika ko na taekin,
10ao I kanakoko ma te m'aaka ae tab'anin raoi n taetae nako ia botannaomata i buku. Ko na taekinna nako ia kabuanib'aia ao uruaia, ao manga teirakeia ao te manga kateitei.”
11Ao te UEA, e kaota nako iu te b'ai teuana n te mii. Ao i mwiina E titirakinai ni kaangai, “Tera ae ko nooria, Ieremia?”
Ao I kaeka ni kaangai, “M'aangan te kai ae te amon.”
12Ao e taku te UEA, “E eti anne. I moantaai ni kakoroa nanon au berita.”
13Ao E kaoti b'aai tabeua ao e titirakinai ni kaangai, “Tera ae ko nooria ngkai?”
Ao I kaeka, “I noora te b'aata n ran ae e buro i meang, ao e a kaan b'aroira.”
14E taku te UEA:
N na kab'aroa te urub'ai
i aon te aba ni kabane.
15Ko na mataku ngkana
I weteia uea mai meang.
Ane a na buaka ma n taua
Ierutarem ao kaawa tabeua,
ao i mwiina, a katei aia kaintokanuea
ni mataroan nako Ierutarem.
16N na katuaaia au aomata,
i bukina b'a a kaairua
ngke a rairaki nako mairou
n taromauri bouananti.
17Katauraoiko Ieremia!
Naako tuangiia aomata
te b'ai are I mwiokoiko b'a ko na taekinna.
Ko na aki maakuia,
b'a I kaawa ni kakamaakuko
i mataia.
18E na kakorakorako m'aakau
kaanga te nono
ke taiani boua aika biiti
ke te oo ae te buraonti.
Ko na kaaitaraia kaain Iuta ni kabane,
n reitaki ma ueana ao taani kairiiri,
ibonga ao aomata.
19Ane a na buakaniko
ma a na aki tokanikai.
Bon aei au taeka Ngai ae te UEA
A na bon aki konaa n tiringko.
Who We AreWhat We EelieveWhat We Do
2025 by iamachristian.org,Inc All rights reserved.
