Taian Areru 42 - Kiribati New Version Bible

Boki Uoua(Areru 42—72)(Te Areru i bukiia ana aomata Kora ao i bukin aia Mataniwi taan anene)Ana Tataro te Aomata ae raroa nako mani Mwengana

1Aron tangiran ranni karaanga iroun te man ae te ria,

Ao ai aron naba tangiram irou, te Atua.

2E korakora tangiram irou, te Atua ae ko maiu.

N ningai ae N na roko iai i matam n taromauriko?

3Bon ti kanau

rannimatau ni ngaina ao ni bong;

Ao a aki toki ni kaangai nako iu

au kairiribai, “E nga Atuam?”

4E uruaki nanou ngke I uring boong ake a tia n nako:

Ngke I m'ananga ma aomata aika bati, ni kairiia nakon um'an te Atua;

Ao a anene ma te b'ana ni kakatonga

ma n nebonebo nakon te Atua.

5E aera ngkae e rawaawata nanou?

E aera ngkai I aki rau?

N na kaantaninga te Atua,

Ao N na manga neboia:

B'a bon au tia kamaiu ao Atuau.

6E uruaki nanou;

Ma ngaia ae I uringko man te

maunga ae Oman,

Ae te tabo ae e moa mai iai

te aba ae Ioretan,

Ao man te maunga ae Mitia,

7A waaki ni b'aro riaou am nao,

Kanga ai aroni marawa ae un,

Ke te raanga n ran

ae rurunga b'arona.

8E na kaota ana Tangira ae Teimatoa te UEA ni ngaina,

B'a e aonga n reke kunau n te tairiki,

Ae au tataro nakon te Atua ae anganai te maiu.

9I kaangai nakon te Atua ae te tia kamanoai,

Ko aera ngkai Ko m'anuokai?

I aera ngkai N na teimatoa n rawaawata ni b'ainikirinau

iroun te tia ribaai?

10I rangi ni maraki n aia taeka ni kaenaena;

B'a a aki toki ni kaangai nako iu,

“E nga Atuam?”

11E aera ngkae e rawaawata nanou?

I aera ngkai I aki rau?

N na kaantaninga te Atua,

ao N na manga neboia:

B'a bon au tia kamaiu ao Atuau.