Warekaia Iteraera 3 - Kiribati New Version Bible

Natin Aaron aika Mm'aane

1Ngke E taetae ngkoa te UEA nakon Moote i aon te Maunga are Tinai

2ao i aoni kawaia ni katabuaki natin Aaron ake aman

3ake Nataba, Abiu, Ereata, ao Itama b'a taiani ibonga.

4Ma E a manga tiringa Nataba, ao Abiu te UEA i nanon Rereuan Tinai ngke a kamanena te ai ae aki kukurei te UEA iai ngke a anga karea nakon te UEA. Ao ai bon ti Ereata ma Itama, ao tamaia are Aaron aika a karaoa te m'akuri n ibonga, i bukina ngke bon akea naba kanoaia Nataba ma Abiu. Bon ti Ereata ma Itama aika a kakaraoa te m'akuri n ibonga ngke e maiu tamaia.

Nakoaia Kanoan Rewi

5Ao E taku te UEA nakoni Moote:

6Ko na anga te baronga are Rewi nakon Aaron are te ibonga. A na riki b'a taani buokia,

7ao a na m'akuri i bukin Aaron n te Um'antabunrianna, ao i bukiia naba Iteraera ni kabane.

8A na m'akuri i bukiia aomata ni kaawakin b'ain nako te Um'antabunrianna.

9A rineaki i bukin buokan Aaron ma natina mm'aane,

10aomata ake a tia n rineaki b'a ibonga. Ngkana iai ane kataia ni karaoa aia m'akuri ibonga, ao e na tiringaki.

11I a tia n rinea te baronga are Rewi mai buakoia Iteraera, ao a na kaokoroaki b'a Au b'ai.

12Ngke I tiringiia aia karimoa kaain Aikubita, ao I baaireia b'a N na b'ainiia naati mm'aane ake aia karimoa Iteraera n aia utu nako, ao n aia kao ma aia tiibu nako naba.

13Ma ngkai I a butim'aia kanoan Rewi b'a oneani mwiin natiia Iteraera aika karimoa mm'aane. Warekaia Kanoan Rewi

14Ao E taku te UEA nakoni Moote n Rereuan Tinai,

15“I tangiria b'a ko na weteia utuun, ao kaaingan te baronga are Rewi. Ao warekia mm'aane akana a tia ni koro teuana aia nam'akaina ni maiu.”

16Ao e ongotaeka Moote, ao e wareki m'aitiia.

17Ao a riki natin Rewi ake teniman mm'aane ake Kerition, Koata, ao Merari b'a atuun aia kaainga.

18Araia natin Kerition mm'aane bon Ribeni, ao Timei.

19Araia natin Koata mm'aane bon Amram, Itiia, Eberon, ao Utiera.

20Araia natin Merari mm'aane bon Maari, ao Muti. Ao aikanne natin, ao tibun Rewi mm'aane; boni ngaiia ake a riki b'a taani kairiri ni kaaingan nako Rewi.

21Araia kaaingan Kerition ake uoua bon Kanoan Ribeni, ao Kanoan Timei,

22ao m'aitiia mm'aane ma ataeinimm'aanena ake a tia ni koro teuana aia nam'akaina ni maiu bon 7,500.

23A na katei auti n rianna kanoan Kerition i maeaon te Um'antabunrianna,

24i aan ana kairiri Eriataba are natin Raera te mm'aane.

25Aia m'akuri n te Um'antabunrianna boni kaawakinan te Um'antabunrianna, ma rabunana are mai tinaniku, ma te roki are ni mataroan te Um'antabunrianna,

26ma taian roki ake a tine n te o ni katobibia te Um'antabunrianna. Ao ai uana naba ma roobun mataroan te o ma te baonikarea. Tabeia kanoan Kerition bon te katei baikai ao te kab'aranakoi.

27Araia kaaingan te baronga are Koata bon kanoan Amram, kanoan Itiia, kanoan Eberon, ao kanoan Utiera.

28Ao m'aitiia mm'aanena ma ataeinimm'aanena ake a tia ni koro teuana aia nam'akaina ni maiu bon 8,600.

29A na katei auti n rianna kanoan Koata i maiakin te Um'antabunrianna

30i aan ana kairiri Eritaban are natin Utiera te mm'aane.

31Aia m'akuri n te Um'antabunrianna bon kaawakinan te Ati ni Berita, te Taibora i bukin te Kariki ae Tabu, Kaintein te Taura, te Bao ni Karea, B'ain nako te Taromauri, ao te Roki are i matan te Tabo are Moan te Tabu. Tabeia kanoan Koata bon te katei baikai, ao manga te kab'aranakoi.

32Ereata are natin Aaron te mm'aane, boni ngaia mataniwiia kanoan Rewi, ao boni ngaia naba are e na tara raoi te m'akuri n te Um'antabunrianna b'a e na tia raoi.

33Araia kaaingan Merari ake uoua bon kanoan Maari, ao kanoan Muti,

34ao m'aitiia mm'aanena ma ataeinimm'aanena ake a tia ni koro teuana aia nam'akaina ni maiu bon 6,200.

35A na katei auti n rianna kanoan Merari i meangin te Um'antabunrianna, i aan ana kairiri Turiera, are natin Abiera te mm'aane.

36Aia m'akuri n te Um'antabunrianna boni kaawakinan kain te Um'antabunrianna, ma kaai ni kateitei, kaai ake bangaki, ao kaai ake taian aana, ao b'aina riki tabeua.

37Ao tabeia naba kaawakinan te boua are kamatoaan te o, ao te beke, ao taian roobu. Tabeia kanoani Merari bon te katei baikai, ao te kab'aranakoi.

38A na katei aia auti n rianna Moote ma Aaron ao natina mm'aane i matan te Um'antabunrianna, mai mainikuna, ao n tararua naba aroia Iteraera b'a a na taromauri raoi. Ngkana iai ae na kataia ni karaoa ana m'akuri Moote ma Aaron, ao e na tiringaki.

39Ma ngaia are, a ongotaeka Moote ma Aaron iroun te UEA, ao a warekia kanoan Rewi n aia kaainga nako. Bootan m'aitiia kanoan Rewi ake a tia ni koro teuana aia nam'akaina ni maiu bon 22,000.

Kariaiakaia Kanoan Rewi B'a Taan Onomwi I bukiia Karimoa Mm'aane

40Ao E taku te UEA nakoni Moote, “Karaoa tauani mwiin m'aitiia karimoan utuia Iteraera n tatabeua nako aika nati mm'aane akana a tia ni koro teuana aia nam'akaina ni maiu.

41Bon Au b'ai, ma N na kariaia kanoan Rewi b'a oneani mwiia, ao N na kariaia naba aia man kanoan Rewi b'a oneani mwiin aia man Iteraera ake taiani karimoa naba.

42E ongotaeka Moote, ao e wareki m'aitiia taiani karimoa mm'aane,

43ao m'aitiia bon 22,273.

44E a manga taku te UEA,

45“A na riki kanoan Rewi b'a Au b'ai, ao a na onei mwiia taiani karimoa mm'aane, ao aia nanai ni man, a na onei mwiin taiani karimoa n aia nanai ni man Iteraera.

46Ma ngkai a raka riki m'aitiia taiani karimoa mm'aane nakoia kanoan Rewi, ao a na riai ni manga kabooaki ni kaokaki mai Rou, te raka are 273 te mm'aane ma te ataeinimm'aane.

47Kam na anaa nimaua te m'akoro n tirewa ae boraoi rawawatana ma are e b'ainaki n te Um'antabunrianna, b'a boon temanna.

48A na anganaki Aaron ma natina taian m'ane aikai.”

49Ao e rikoi taian tirewa Moote man te raka ni mm'aane, ao n ataeinimm'aane ake a tib'a bungiaki are 273.

50Bootan rawawatan te tirewa bon 1,365 ni kabotauaki ma te rawawata are e b'ainaki n te Um'antabunrianna.

51Ao i mwiina, ao e a angan Aaron ma natina mm'aane n aron are E a tia ni baaireia te UEA.