Mika 2 - Bibel 1938 - Bibelselskapet(Bibel1938)

Ei hovudårsak til denne domen yver Juda er det at dei vinnesjuke stormennene trælkar dei veike. Mika ropar ve yver dei og trugar dei og heile folket med at dei skal missa lovnadslandet, 1-5. Ein slik tale likar nok ikkje stormennene, som tykkjer betre um at dei falske profetane lovar dei timeleg njoting, men han hev sin grunn i deira eigi hjartelause åtferd mot dei arme og hjelpelause; ei slik åtferd gjer dei uverdige til å få hava landet, 6-11. Men Herren skal ein gong samla den spreidde leivningen av Israel att, fria dei or fangetilværet og gjera dei til eit mangment folk, 12-13.

1Usæle dei som tenkjer ut urett og emnar på vondt medan dei ligg på lega si! Straks det lyser av dag, set dei det i verk, for di det stend i deira makt.

5So skal du då ingen hava som spanar mælesnor yver nokon jordlut i Herrens lyd.

6Haldt upp med denne preikingi! So preikar dei. Um slikt må dei ikkje preika! Det er då ikkje måte på skjellsord!

7For ein tale, du Jakobs hus! Tru Herren er brålyndt? Eller er det soleis han plar fara fram? Er ikkje ordi mine gode imot den som fer reideleg åt?

8Men alt lenge hev no folket mitt reist seg imot meg som min uven; de dreg kåpa av folk som gjeng trygge framum og ikkje vil vita av strid - so dei berre hev kjolen att.

9Kvinnone i folket mitt driv de ut ifrå heimane deira, som var deira gleda; frå småborni deira tek de for alle tider prydnaden som eg gav dei.2 Mos 22,25-27; Matt 23,14

10Statt upp og gakk dykkar veg! For her hev de ingen kvilestad, for dykkar ureinskap skuld, som valdar tyning, ja skræmeleg tyning.3 Mos 18,25.28

11Kom nokon med svall og svik og laug og sa: Eg vil preika for deg um vin og sterk drykk - sjå det vilde vera ein preikar for dette folket!Esek 13,3-16.19

12Eg vil samla deg, Jakob, samla dykk so mange som de er; sanka i hop vil eg det som er att av Israel, eg vil føra dei saman som sauer til ei kvi, som ein buskap til sitt beite, so det vert ståk av menneske.Esek 37,22.24; Hos 1,11; Rom 11,26

13Vegbrøytaren fer fyre dei; dei bryt seg igjenom og stimar fram gjenom porten og slepp ut; kongen deira fer fyre dei, og Herren i brodden for dei.