Jeremia 28 - Bibel 1938 - Bibelselskapet(Bibel1938)

I same tidi spår Hananja at åket åt Babel-kongen skal verta brote, og dei heilage gognene koma attende innan tvo år med Jekonja og dei hine som er burtførde, 1-4. Jeremias ynskjer at det må verta so, men segjer og til han at fyrst når ordi hans sannar seg, er provet gjeve for at Herren hev sendt han, 5-9. Hananja bryt sund det åket som Jeremias bar, og forkynner at soleis skal åket åt Nebukadnesar verta brote, 10.11. Jeremias forkynner han at Herren i og med Nebukadnesars herredøme skal leggja eit jern-åk på nakken åt folki, og at Hananja skal døy same året; det gjeng so, 12-17.

1Same året, i den fyrste tidi Sedekias Josiasson var konge i Juda, i det fjorde året, i femte månaden, sa Hananja Assursson, profeten frå Gibeon, til meg i Herrens hus so prestane og alt folket høyrde det:

2So segjer Herren, allhers Gud, Israels Gud: Eg hev brote sund Babel-kongens åk.

3Um tvo år vil eg føra attende til denne staden alle dei gognene i Herrens hus som Nebukadnesar, Babel-kongen, tok frå denne staden og førde til Babel.Jer 27,16

4Og Jekonja Jojakimsson, Juda-kongen, og alle hine burtførde frå Juda som er komne til Babel, fører eg attende til denne staden, segjer Herren; for eg bryt sund Babel-kongens åk.2 Kong 24,12-13

5Då svara profeten Jeremias profeten Hananja so dei høyrde det både prestane og alt folket som stod i Herrens hus -

6profeten Jeremias sa: Amen! Det gjere Herren! Herren setje i verk det som du hev spått, so han fører attende frå Babel til denne staden gognene i Herrens hus og alle dei burtførde!

7Men høyr no det ordet som eg talar for øyro på deg og alt folket:

8Dei profetane som hev vore fyre meg og deg frå ævordsleg tid, dei spådde mot mange land og store rike um ufred og ulukka og sott.

9Den profeten som spår um fred - når ordi åt den profeten sannar seg, då kann alle sjå at Herren i sanning hev sendt den profeten.

10Då tok profeten Hananja åket av nakken på profeten Jeremias og braut det sund.Jer 27,2

11Og Hananja sa so alt folket høyrde det: So segjer Herren: Soleis vil eg um tvo år brjota sund Nebukadnesars, Babel-kongens, åk og taka det av nakken på alle folki. Då gjekk profeten Jeremias sin veg.Jer 28,2-3

12Men etter profeten Hananja hadde brote sund åket og teke det av nakken på profeten Jeremias, kom Herrens ord til Jeremias, og det lydde so:

13Gakk og seg til Hananja: So segjer Herren: Eit tre-åk hev du brote sund, men att-istaden hev du laga eit jarn-åk.

14For so segjer Herren, allhers Gud, Israels Gud: Eit jarn-åk hev eg lagt på nakken åt alle desse folkeslagi, so dei skal tena Nebukadnesar, Babel-kongen, og dei lyt tena han; ja, jamvel dyri på marki hev eg gjeve han.Jer 27,6; Dan 2,37-45

15Då sa profeten Jeremias til profeten Hananja: Høyr no, Hananja! Herren hev ikkje sendt deg, men du hev fenge dette folket til å lita på lygn.Jer 23,21; 29,31-32

16Difor segjer Herren so: Sjå, eg tek deg burt frå jordi; i dette året skal du døy, for di du hev preika fråfall frå Herren.Jer 29,21-22.31-32

17Og profeten Hananja døydde same året, i sjuande månaden.